Том 7 (Вторая половина XV века, литература эпохи исторических размышлений)

Прешедшу же единому лету, не престааше врагъ, ненависть нанося брату на святаго. Прочее же не могый с помысломъ братися, приходит къ святому, хотя ему исповедати свой помыслъ и ненависть, юже имяше к нему. И яко прииде в келию святаго и видевъ мужа, устыдевся святолепных его сединъ и срама ради ничто же не рече, о немже прииде. И тако хотяше прочее от келии святаго изыти, святый же, яко прозорливый даръ имея, позна брата, яко утаи помыслъ и старцу не глагола, о немже прииде. И удръжа брата, и начятъ ему глаголати всю, елико имяше, ненависть на святаго, и коим помыслом прииде к нему. Брат позна, яко ничто же святаго не утаится. Срама вкупе и студа исполненъ, прощениа прошааше, о нихъже к нему съгрешаше неведениемъ. Святый же, утешая его, глаголаше: «Не скорби, брате Феодоре! Вси бо съблазнишася о мне, ты же единъ истинъствова и позна мене грешника быти. Кто бо есмь азъ грешный и непотребный?»

Брат, виде святаго тако смиряющася, множае съкрушаше себе, вину исповедая, еже на святаго туне имяше. Святый же, яко виде брата кающася и съкрушающа себе, отпусти его прочее, рекъ: «Иди, брате, с миром в келию свою. Ктому не приидет на тя таковая брань». Оттоле же прииде брат в чювъство и каяся бяше о съгрешении и отсюду велию веру стяжа къ святому. Жив же брат в том манастыри прочаа лета живота своего въ всяком целомудрии, донележе и къ Господу отиде.

Елма убо и се немало дарование блаженому бяше от Бога. Егда прихождаше кто странных въ обитель ону, мнози бо тогда от различных странъ и градовъ прихождаху къ святому, ови хотяще видети святаго и ползоватися от него, инии же изволяюще съжительствовати ему, святый же, яко прозорливъ даръ имея, еще тем входящим в монастырь, и прозорливым окомъ разсмотряше их и братии, ту прилучившимся, поведаше, яко: «Съй братъ с нами хощеть съжительствовати, съй же хощеть прочь отити». Темже обои събывахуся по пророчьству святаго.

Брат преждереченный Зеведей прииде некогда къ святому благословитися. Святый же оконца келии открывъ и видить лице Зеведея оного черлено суще. И рече ему: «Что, брате, случися, тебе быти?» Он же вину въпрашаше. Святый же рече ему: «Вижу тебе, брате, не постничьское лице имуща, но мирьское и паче упитовающихся». Устыде же ся тъй Зеведей, начатъ въздержатися, яко да не ктому будеть поношенъ святым.

О БЕСНУЮЩЕМСЯ

Приведоша человека некоего къ святому, Феодора именемъ, зле стражуща от нечистаго беса. Святый же начят Бога молити и Пречистую Его Матерь о злостражущем Феодоре. Готовый же къ услышанию молящихся Богъ и Пречистая Непорочная Мати Его не презре молениа святаго своего угодника Кирила. Темже исцеление получивъ, тотъ Феодоръ ктому не хотяше из манастыря прочь изыти, да не ктому тажде постражеть от лютаго беса. Темже и молит святаго еже пострищи его въ иночьскый образъ. Святый же, видевъ его усердие и приатъ его, и въ иночьскаа одеваеть его, и с прочими братиами причте, и нарече имя ему Феофанъ. Пребысть же въ обители блаженаго Кирила в целомудрии и послушании и въ всяком смиреномудрии множае 10 лет, дондеже къ Господу отиде.

ЧЮДО СВЯТАГО О ЦЕРКОВНОМ ВИНЕ

Некогда же вина недоставшу къ церковней службе, и нужда бяше литоргии быти. Темже священникъ приходить, възвещает преподобному, яко вина не имуть. Святый же призывает еклисиарха Нифонта и въпросив его, аще вина не имут. Онъ же сказа ему, яко не имуть вина. Повеле ему святый принести съсуд, в немже бяше обычно вину быти. И отыде же Нифонтъ принести съсуд, якоже повеле святый, и обрете съсуд онъ исполненъ вина и паче преизъобилующь, и текущь прочее. И о сем въ удивлении быша вси, ведяху бо, яко вина не бяше: токмо единъ съсуд и тъй сухъ. Темже вси прославиша Бога и Пречнстую Его Богоматерь, темже съсуд тъй с вином на время много къ церковной службе не умалися, но паче изъобиловаше, дондеже иное вино принесено бысть.

По неколицех же летех бывшу гладу в людех немалу. И таковаго ради утеснениа и нужды мнози от неимущих прихождааху въ обитель святаго. Нужди ради глада святый же повелевааше даати хлебы просящим к тех насыщению. И тако дааху по вся дни нищим хлеба доволно. Не бяху бо тогда села, отнудуже хлебъ приимаху, но нечто мало имяху от приномисыя тем милостыня — брашна, елико довлети братиамъ токмо. Но якоже слышавше окрестъ тоя обители живуще человеци, яко питають приходящих глада ради, и сего ради множайши начаша приходити и тамо насыщатися. Но елико брашна взимаху оттуду, толико паче множахуся и преизобиловаху. Видевше же хлебникы бывающее, глаголаху: «Якоже прежде вино умножив, не сущу ему, то паче может и брашна умножити». И тако малыми брашны препиташася людие мнози, изобилова помощию Владычица нашеа Богородица и Приснодевы Мариа и молитвами святаго Кирила, даже и до новаго хлеба сиа быти тако. Възвестиша же святому чюдо бывшее сама та братиа, иже своима рукама брашно емлющихъ: «Елико бо, — рекоша, — приходяще, взимахом брашна, толико паче множае обретохом исполнену бывающу и не суть умаляеме мучницы». Святый же благодать въздааше Богови, творящему дивная и преславьная.