Том 8 (XIV - первая половина XVI века, переводная литература)

Послахом прежде, духовное мое чадо, Божественая Писания от патриархия же Антиохийския и святаго Симеона Чюдотворца обители, и мое, недостойнаго, имуща книжная сведительства и извещения о духовных наших братьяхъ, нарицаемые цатох, показующе тех непорочное отвсюду благодатью Христовою, въ яже о вере и распрях и сънмицах чистом быти таковымъ свершене и всякого зазора вышим благодатью Христовою. Сице паки и зде о духовных и любимых отцехъ и братьях наших ивирох, еже Богъ укрепи и дарова за молитвъ святыхъ, съвъкуплеше, и еже обретохом от Божественых Писаний, съчетахом сия и послахомъ тебе Божья ради любве и подобныя ей къ искренему. И ты паки другым ти подай и исполняя божественыя любве уставъ, яко да яве будут сия, яже предварших летъ в различных книгах лежащая от небреженья же не испытуема, ниже являема, и сице рещи погребена и яко въ мраце крыема. Сего ради азъ, недостойный Никонъ, иже по духу отець твой, поспешьством Божиимъ сия трудолюбьствовавъ, послах ти первая убо о духовныхъ наших братьях, нарицаемых цате, и ныне пакы о духовных и любовных наших отцехъ и братьях ивирохъ, яко да азъ, недостоиный Никон, рабъ тех святыя молитвъ и любве божественыя бъвъ Божию милость на себе привлеку, якоже изначала и прежде обои, азъ же и сии отци наши и братья, божественымъ Духомъ усвояеми, божественою любовью уставъ исполняюще делом и словом елико по силе.

Сии бо духовнии и възлюблении отци наши и братья изначала убо ведение обращениа ихъ от суетных идолъ к истинний християньстий вере блаженый Феодоритъ епископъ Кирьскый в Церковнем списании поведуют[273] о иже от гръцкыя земля пленены блаженыя оны въ женах добродетелныя Нонны,[274] како языкъ ивирскый обра<тися> на християньство от суетъных идолъ, и убо яже таковаго начала тамо сказует. Въ другой же паки повестней книзе пишет сице: яко въ царство великого Константина[275] Иверия въ православную веру приде и християньство прият, уврачевана бывши от нея. Сыну бо царя ивирскаго въ люте недузе бывшю, царь, уведевъ, християнинъ бысть, и тъи же и вси. И храмъ моляше царя създати. Царь же еже убо о съпружници бывшее чюдо хваляше же и славляше, храм же не хотяше създати. Лету же мимошедшю, тый на ловъ изиде. И человеколюбивый же Владыка того якоже Паула улови, мрак бо на нь внезапу напад, не оставляше напред пойти. И ловящеи убо солнечныя лучя обычно наслаждахуся, тъ же единъ невидения связанъ бысть язами. Въ недоумении же сый, и умение обрете спасения. И абие мрак онъ прейде на свет. И призвавъ иже Веселеила, начялохудожника, примудрости исполнившаго, и того сподоби благодатью, якоже божественый описати храм. Они же основание копаху же и зиждаху. И яко свершися храм, требоваху свещенника обрести. И сему обретение чюдная жена створи, увеща бо началника языку оному къ гричкому послати царю и просити да послет ему учителя благочестью.

Царь же великый Констянтинъ, съ обрадованиемъ посланьникы приимъ, посла имъ Еустафья, патриарха Антиохийскаго, съ многою честью. И шед тамо, крести и всих съ царемъ и освяти въсъзданый храм, и створи имъ сборнаго епископа, въобразивы ему божественым уставом под властию быти патриарху Антиохийскому. Царь же ивирскый и съветнице его уставиша патриарху антиохийскому въ подани ему ароматом святаго мира токмо тысящу селъ въ земли ивиръстий, яко да от прихода их подаются аромата миру. Въ Антиохии бо бе уставъ освящатися миру, и оттуду подаяшеся по всему миру. Инде бо не освящашеся миро. И зде убо тако.

Паки в другой книзе повестней глаголет, яко при Констянтине царе Копрониме,[276] патриарху сущю блаженому Феофилакту въ Антиохии, придоша от Ивирия инока два и възвестиша блаженому Феофилакту, яко в нужди суть християне селъ иверьских, не имуще сборнаго архиепископа. От дний бо блаженаго Анастасья, священномученика и патриарха Антиохийскаго, не поставлен бысть им архиепископъ сборный остроты ради путныя и заеже не смеяти кому агарянъ ради мимо ходий.[277] И сборным судом своих митрополитъ и архиепископъ и епископъ повелителное писание даст ивиром поставлятися от епископъ предела его, иже въ дни тыя сборному архиепископу ивирскому, поеже быти избранию от них, и створити и жребий, и по жребью идеже божественая благодатью объявитъ, поставитъ того по церковному уставу. И створиша написано въспоминание о том и съшедый сборъ и запечатьливъ въдаст им, и поста<ви> единого от обою посланую мниху, Иване именемъ. Бяху же села патриархова въ Иверии тысяща изначала уставлена; и устави даяти на коеждо лето по времени патриархомъ дань от тех селъ его, златник тысящу окуплени ароматом святаго мира.[278] И на всяко лето даяхуся даже до Ивана святаго патриарха Иерусалимского. При Оресте святейшем патриарси Антиохийстемъ, идущи ему на моление киръ Василию,[279] уставлено же бысть въспоминание имети патриарху Антийохийскому единому в Иверии,[280] и посылати екзарха[281] на посещение о ересехъ и истязании о душевных съблазнох и взимати уряжденая от селъ онех.