Том 8 (XIV - первая половина XVI века, переводная литература)

Се же веждь, духовное мое чадо, зане якоже и прежде при днехъ блаженаго патриарха киръ Феодосия[257] вручено ми бысть и повелено учительство, недостоину сущу ми, ныне же паки не простиша мя оставити се предначальствующии и архиереи сборныя и апостольскыя Церкви, но паче подтвердиша и написаша съ утверждением повелителное и послаша ми то с киръ Самоилом митрополитом Аданьским. Да яко смотрих, тяготно ми быти и паче меры моея, не приях то, но възвратих сие моляся, за еже любити ми безмолвие и странничьство. Ныне убо паки облегчиша то, якоже лепо бяше, безбедне и послаша ми е съ духовным братом киръ Козма киръ Романовем ту сущаго затворника.[258] И убояхся суда Божия паки второе възвратити то, яко не имат некое неудобьстве же паче меры моея, ниже забавляюще мя в иже имех прежде разум. Паче же и писаша ми, яко принуждает тя сборная Церкви на се. И сего ради прияхъ то благословне, аще и недостойну сущу ми, от сборныя и апостольския Церкви, яко от рукъ Господа и Бога и Спаса нашего и Пречистыя Его Матери Богородица и владыкы нашего Петра верховнаго апостоломъ, немже и патриаршьским престоломъ всего Въстока Антиохийский град почтенъ бысть.[259] Азъ же аще и недостоинъ, но якоже непщую убо, яко инокъ и рабъ сый рабом сборныя и апостольския Церкви. И аще не сице бы было, но имело бы некое неудобьство, не бых приялъ отнуд якоже мя занеши. И обаче якоже предрекох, аще не бы было свободно, ниже изветом послушания послушалъ бых, за иже отдесна прельсти и бесовьскых же и человечьскых. И еще же и самоя воля яко «кождо привлачится и прильщается от своея похоти»,[260] якоже пишет.

И се подобает ти ведети, чадо духовное, яко и кроме и выше преднаписаных братий наших глаголемых цать, ихже ради и вина сия изложена бысть, и о нех такожде иже в зазоре сущих, или в вере, или в деянии, и аще о едином или о мнозехъ, или о ученицех, или о учетелех, подобает се духовным нашим отцемъ яко да по первых о них святыхъ отцехъ, и сии творят о иже в зазоре сущих, или от слышания, или от своего мнения, но истязовати яве такова и тако съставляти и разсужати и судити и изрицати, или добръ есть таковый, или инако некако, но убо якоже лепо есть, а не всь языкъ или иже от него учимыя, аще не зле явишася. Бываетъ бо множицею, якоже многажды бысть и мнози развращения мудръствующе, инехъ правая учат якоже и съпротивное, и не тъчью о вере, но друзии паче о деянии боящеся книжнаго словеси, глаголющаго: «Горе напаяющему искреняго своего питья мутна»;[261] и Господу глаголющю къ ниже творящим ни искренему глаголющим путь жизни: «Рабе лукавый и ленивый» и прочая.[262] Пакы инем образом многажды бывает въ ученицех и благочестиви неции суще елико учими суть: добрая внутрь себе сдержавают, блазньная же вне изметают, якоже бывает о чтении, или о вере, или о деяньи; обаче въ иже о Бозе могущих. Аще ли еще немощни суть блазньна и обоа. Тамжде пакы бывает инем образом, и учитель убо здраве и добре учит, ученикъ же по развращенному своему нраву вся смяте и искриви, якоже рече и великий апостолъ Петръ въ едином от своих посланий о некых сердцемъ неутверженых ради учительствъ святаго апостола Павла яко «развращают та»,[263] по своих яве яко волях обращают. И ради сих всех и сим подобным подобает истязовати добре же и здраве о сих и тако износити изреченье, якоже рехом. Паче же и всем многа боязнь есть и беда пакости ради искреняго, и съблазнъ предлежит от речения, якоже пишет въ Еуангельих яко «уне есть жерновный камень привязати ему» и прочаа.[264] Еже протолкова божественый Златоустъ, сия съблазнъ глаголя быти възбраненье праваго пути. Обаче на сие приходит, яже предрекохом, съблазнъ къ искренему. Аще ли несть таково явлено испытанье, с дерзновеньем и любовью Божьею и искреняго, якоже учимы есмы, но скровно некако и льстивне и яко в мраце крыема и лестью и словом ратуема, се всем благосмыслящим явлено есть и отнуду же имат рожденье, познавают, яко от тмы и зависти и прочих злобных действъ и рождений елма «все являемое о таковых на свет происходит»,[265] якоже пишет, и не лепо есть таковаа и подобнаа сим тмы дела боголюбным сматряти душамъ или веровати и сприобщатись таковым.