Том 8 (XIV - первая половина XVI века, переводная литература)

Добро убо есть еже учити въ время благословно и ползевати искреняго, но множае паче требует божественая благодати и бестрастья такожде и приемлющему, якоже и апостолъ в разделеньи дарованьом, начиная сие, глаголет: «Еда вси учителе» и прочаа.[266] И тако может с Богомъ здраве уставляти и рассуждати и судити и изрицати, и о едином коемждо книжное благословное сведетельство приводити, якоже пишет о праведнице, яко «расмотритъ словеса своя на суде».[267] Аще ли же и божественей благодати не споспешьствующи, и учай такожде таковаа истязует, и аще страстен сый от естественых страстий и побеждаемъ, неверная же от него глаголемая и блазньна отвсюду суть привлачим и прелщаем от своея похоти, и подобныхъ мне порабощенъ, увы, и побеждаемъ в которуюждо страсть; и не тъй обладает и водит тыя идеже хощет, но тыя одержат паче того и обладают, и отводят идеже не хощетъ. И сего ради «имже кто побежденъ бысть, тому и поработися», якоже пишет. И инде глаголет, яко «еликы страсти въ души, толико владыкъ». И убо таковъ есть и тъ, яковже иже въ пророце Исаи глаголемый: «Пророкъ учя безаконью».[268] Но обаче благочестивыя и Богомъ хвалимыя аще и внимают себе, якоже выше рехом, не могутъ вредити, но не внимающая и подобныя мне, якоже речеся, миролюбныя и сластолюбивыя. Обаче убо таковаа скоро искушаются, якоже реша отци: «Тако въ человецех бывающая въскоре обличаются». Подобает убо комуждо пребывати въ своих пределех и мерах и познавати своя, и не мнети себе глава быти, нога сый, якоже Богословъ Великый Григорье. И тъй самый святый Шестый сборъ[269] въ 64 правиле възбраняет учити посреде, яковже аще есть, и възлагати на ся санъ учительскый, не имущю повеленье от сборныя Церкве. Се бо есть любоначальства и тщеславья страсть и сим подобныя душевныя страсти с лютою гордостью, пагубныя и вредныя, и якоже глаголют отци, неудобь исцельны, паче же неисцельны. Но обаче ниже в таковых подобает отрицати или отчаяватись до конца; яже бо от человекъ невъзможная, вся възможна от Бога; глаголет бо въ божественей Лествице сице, яко: «Блудныя убо человеци, лукавыя же ангели, прозорливыя же Богъ ицелити может».[270] Обаче ты съ опаством хранися от таковых, възлюбленое мое чадо духовное, да не како с ними пребывая ты убо вредишися велми. Сих же по зде когда человеколюбець и всещедрый Богъ, яко-же весть, ицелит, ты же пребудеши от съжительства их неисправленъ. Не хощю же тя не ведети и паче же нужнейшее, яко убо яже о православней вере, цела н нескудна и безъ какова-любо мненья хранима суть вся опасно Божьею благодатью, и несть потреба възысканья или истязанья о сих. Но о деянии Божиихъ законъ и божественых правилъ святыхъ сбор и прочих святыхъ отець преданья, иже въ Божественых Писаниях, есть намъ тщанье, яко не видим та въ общемъ хранима.

И сия убо о сих нужных написахом тебе къ ведению твоему мало, яко да не яже о вере испытуеши, но едина точью, яже о деяниих, и множея ничто. Яко да не всуе въ словопрения себе вълагаеши мятежя. Книгу, яже знаеши, Толкования заповедемъ Господнимъ,[271] яже написах поспешением Божиимъ въ уности моей и есть зде въ Святемъ Симеоне Чюдотворци. Ныне же паки поспешьствомъ Божиим, пречистыя Богородица написана бысть другая, имущи Божественая Писания, являющая же от неведения бывающая падения въ нас християнех, яже и небрегома оставлена быша въ предъварщих летех, — о раздорехъ монастырьских и инех различных винах нужных. Мала же есть, не достижащи до единаго златника, а несть велика, якоже первая. Положена же быша зде, въ сборний Церкви, рекше в патриархии Антиохийстий, яко нужна есть и требует ю Церква, такожде и въ святемъ Симеоне чюдотворци. И сего ради послах ю ту, и да възложена будет, аще и недостоину сущю ми, даръ въ Святое Въскресение. И аще ю препишеши и ты и друзии, на ползу бывает души. И паки да есть въ Патриархии якоже и зде. Сборная бо Церкви патриархия истязаша ту съ опаством и въсприяша. И въ сборную Церковь възложена бысть и прията благодатью Христовою яко нужна. Сего ради и ты и сущии ту, трудолюбьствовавше ту с Богомъ, о недостоиньстве моемъ помолитеся, и Богъ за молитвъ Владычица наша Богородица и всех Его святых, да будет покрывая и сохраняя тя от всякого зла и спасетъ тя въ Своемъ царствии.

У святаго и живоноснаго Гроба Господня створи въместо мене до земля метаний, 12 такожде и святыя Голгофы и в Гефсимании[272] и блаженому и святому моему владыце патриарху, яко недостойный азъ Никон рабъ рабом его, и прочим владыкамъ моимъ и отцемъ, подобне же и братьямъ, иже прилучатся ту, метания всем, да помолятся о мне, яко да мя помилует Богъ и съхранитъ мя, недостойнаго, молитвами Богородица и всех святыхъ, аминь.

СЛОВО 37. ТОГОЖДЕ О ДУХОВНЫХ И ВЪЗЛЮБЛЕНЫХ ОТЕЦЪ И БРАТЬИ НАШИХ ИВИРОХ К ДУХОВНОМУ МОЕМУ ЧАДУ ИНОКУ ГЕРАСИМУ