Том 8 (XIV - первая половина XVI века, переводная литература)

И обаче ту пакы житие великого отца нашего Савы процетше,[251] обрящете сих съжительствующих великому и въ благосъзданни Церкви повеленом от святого арменьскою беседою пети уставъ свой, грьком же особно пети. Якоже и зде братья наша поют арменьскою беседою, грице же паки особь, въ различныхъ же ликох, заеже не имети две церкви, точью же Трисвятую песнь гръчъскы глаголют, якоже и въ сем иже въ святем отецъ наш Сава предаде ради мнения и прилога Петра Кнафеова еже «распныся нас ради».[252] И ту паки житие великого отца нашего Феодосия прочетьше, обрящете с ним жительствующих и въ Церкви арменьскою беседою особь поющих уставъ свой. И доволеет нам подражати сию обою великую светилу. А еже въ гричьстее Церкви повеленом быти от великого отца нашего Савы и от великого Феодосия входити и причащатися Божественных Таинъ, яко же видится ради оскудиния священничьства бе, зане опасьтво много имяху святии и отци о священничьстве и едва некогда въ мнозе сборе приемляху единого священика имети или никакоже. Ведяху бо тяготу и беду священничьства. И сведительствует ее самое житие великаго отца нашего Савы, и такожде великаго отца нашего и начялника общим житием Пахомия,[253] яко и въ обою сею монастирохъ въ лаври же и в опщем житии колици иноце быша и своего от ту сущих инокъ въ презвитерьское рукоположение не имяху, но времени зовущу, от ближних презвитеръ призывахуся створити имъ священну службу, яко принужденом быти тем последь же, а не инем некыим. И сам убо великый Пахомье тяготы священничьства избеже. Великый же отець нашь Сава рукоположение неволею и нехотя от патриарха Ерусалимьскаго прият, суди вътяготу сам въсприяти. Сия есть вина, якоже от житий святых и от инех писаний иже по Бозе любопотрудивыйся обрящетъ истиное. Опасство же и беду, яко же и предрекохом, священничьства, не точью прочая божественая писания являют, но иже о священничьстве 6 словъ Златоустовых пространнейше глаголют,[254] аще и о архиерействе беседует. И обаче иже с Богомъ другое что лучшее истиннейше разумевый, да пользует процитаюшая и мене, яко невежда есмь, поселянинъ и ползу въ всякой вещи взыскуя.

Обаче много испытавъ, еже по силе, за братью нашю сия цаты, и не обретеся нигдеже яко оттоле от дний яве яко великых отець наших Феодосия и Савы, егда и прежде святый и великый иже въ Халкыдоне сборъ[255] еретикы армены отлуций проклятъ начальствующая им, потом же паки тем обоим светилом предреченым Феодосию ж и Саве подвизавшимся и плевелы от чистыя пшеница разлучившим,[256] и православным сим братьям нашим и подобным них оставшим и съ единым къ сборний Церкви с православными, и не обретеся нигдеже яко оттоли съгрешишя въ какове-любо вещи, или поне въ распрех, или сънмицах, якоже неции от наших многажды пострадаша, иже изначала от божественных отець добре начьнше, последь же въ распря и сънмиця увратишася. Сия же братья наша дажде до днесь отци наши и ти сами блажении патриарси, егда на сборе подвигается что на еретикы армены, аще обрящется кто о сих разумъ имея божествены, тех имут с Богомъ на ополчение супротивных, яко и языкъ и писания их сведущих. Яко и зде при блаженых патриарсихъ въ наших временех бысть, и множайшим сущим еретиком арменом, от сих же зело мали неции на сборе ниже языкъ подвигнути, или глас испустити оставиша еретикы на православныя отнудъ. Сия вся мы, елико по силе испытавше о сих братьях наших, глаголемых цаты, обретохом. Могый же с Богомъ и множае что ползевати нас, и се с радостью въсприемлем, яко суще невежде мы и яже премудрых и книжнийших не сведяще, ниже силы писменемъ и таковых разумьных разум не сведя, тъчъю сия вся испытавъ съ опаством от внешних и паки от внутреняя свести извещение приимъ, съсведительствующим книжным и отецьскым приданием. И всь покой мой, якоже знаеши, створил есть Богъ ради молитвъ Богородица зде, и паки за молитвъ святаго Симеона в той Святий и Дивний Горе господина нашего святаго Симеона Чюдотворца. И овогда убо тамо, овогда же зде, сежду и почивая, якоже имат разум мой, егоже веси. Кождо бо аще не обрящет якоже любит и хощет, не упокаяется или плотско, или духовно.