Том 8 (XIV - первая половина XVI века, переводная литература)

Якоже бо оставлеши в бразде пшеница еже в количьстве малости и еже в качьстве образа своего свойство себе не остави, но, в себе пребывая, клас пребывает, премного разньствуя сам себе величьствомь и добротою, и быстротою, и образом, и по тому же образу и человечьское естьство оставлеше в смерти вся яже о немь свойства, елика ради страстьнаго устроения притяжа, — бещестие глаголя, тля, немощь, еже по взрастох различье, себе не оставляеть, но якоже в класе некыи, к нетлению преставляет, в честь, и в славу, и еже во всем свершение, и еже не ктому жизнь самая съсматряти естествеными свойствы, но духовно некое и бестрастное проити устроение. Сие бо есть душевнаго тела свойство, еже присно некым течением и движениемь от еже в немже есть изъменитися и прелагати в другое, яже бо ныне не въ человеце точью зримъ добрая, но и в садовох и пасътвах. Ничтоже в тогдашнем житьи останет.

Мнить же ми ся и всеми съглаголовати апостольское слово нашему непщевании о вскресении, и се показует еже и наше уставление обдержит, глаголя ничтоже ино быти вскресение...

Понеже убо в первем бытии мирстем — сия от Писаниа навыкохом, — яко «прозябе земля былье травное»,[336] якоже слово рече, таже от проращения семя бысть, емуже на землю низъпадшю, то же пакы виде иже исперва прозябшаго, встече, рече божественый апостолъ и о вскресении бывати. Не точью же сему от него научаемся на великолепное преставлятися человечьству, но яко уповаемое ничтоже ино есть, разве еже в первых бяше. Понеже бо исперва не клас от семене, но от класа семя, по сих же се от семене прозябает, якоже и приточное последование яве показует, нужа убо всему еже вскресения ради възрастающему нам блаженьству к сущей исперва въсходити благодати. Клас бо суще исперва образом некымъ, понеже зноем злобным исхохом; въсприемши же земле смертью разрешихся, пакы в весну вскресения клас пожатное се зерно телесное велик же и часть и правъ и на небесную высоту протяжен, вместо стеблия и осилья нетлением и прочими от боголепных позваний украшен. «Подобает бо, — рече, — мертвеному сему облещися в бесмертьство и тленному сему облещися в нетление».[337] Нетление же, и слава, и честь, и сила естьства ради быти исповедается. Якоже первее въ еже по образу беша и пакы уповаема суть.

Первый бо клас — первый человекъ Адам; понеже злобным входом естьства на множьство разделися, якоже бывает плодъ в класе. Сице и кождо насъ, облажшеся класнаго оного вида и земли примесившеся, пакы въскресение на первобытную доброту възрастающе, и вместо единого перваго класа безъчистъни от нивь бывающи.

А еже по добродьтели житье в сем к злобе различье имать, яко ови и зде в житьи добродетелью себе възделавше, абие в ниве клас възрастают. А иже злобою изможданна и ветротленна бысть в житьи сем яже въ душевнемь семени сила, якоже глаголемая бесплодная, иже таковых художнии глаголють бывают, сице и сии, аще прорастуть вскресением, многою наглость от Судия приимуть, яко не могуще въстещи въ класа видъ и быти оно, еже бехом преже еже в землю низъпадения. Служение же настоящаго житом плевелом же и тернию есть сбирание совзрастъшими семены. Всяцей питающий корень силе к лучшему притекши, ихже ради ненапитано же и несвершено плодом присное же пребысть семя, с прирастъшим прозябением подавлено. Елма убо зде елико лестно же и чюжее истачается от питомаго въ ищезновение приидеть, божественому и невещественому огню, яже чрес естьства поядшу, тогда въ благопищно естьство и плодъ обратится, ради таковаго прилежанья же и тщания общи видъ, иже изначала нам от Бога въсприложены, всприимше. Блажени же, имже абие свершеная доброта класовная совосияет спрозябающими въскресения ради.