Том 8 (XIV - первая половина XVI века, переводная литература)

Аще ли всеми сими будет действено въскрсение, суетне намь и непотребне кь жизни оной сдетельствуеть Действуей вьскресение. Но убо и быти ли потребно есть веровати вскресению и не суетно быти? Темже да внимаем Слову, яко да нам всячскыми в велении подобное свершитися.

СИЯ УБО ВПРАШАЙ, СЛЫШИ ЖЕ И ОТВЕТ

Не недоблествено, по глаголемей риторикии, еже о въскресении догматом начинание, препирателне новотворьными словесы окрестъ обтекы истинну. Яко иже не велми расмотрившим истинно таиньство пострадати что по-лепоте противу слову и мьнети не вне подобающаго отводитися реченых недоумением. Имат же и сице рече истинна, аще и немощно имамы от подьбных противу вещати слову. Но убо истинное слово о сих въ таиных премудрости скровище хранимо есть, тогда въ явление прияти хотя, внегда делом въскресения таиньству научимся, егда не ктому требе будет намъ глаголъ къ уповаемых явлению. Но якоже в нощи пребъдевающим мноземъ движимом словесемъ о солнечном сияньи, каково есть, празно творит словеса прописание явлешися точью лучьная благодать, сице всяко промысль смотрьне, будущаго въскресания, прикасающися ни во чтоже показуеть, егда будет намъ въ искусе чаемое. Елма же потребно есть не всячьскы неистязана оставити принесеная нам спротивления, сице от сих слово всприимемъ.

Помыслити же подобает первее, который разум есть еже о вскресении веления и что ради от святаго Писания речено бысть и веруется. Темже убо якоже кто уставом некым такое обоемъ пропишет, сице речем, яко: въскресение есть еже древле естьства наше то устроение. В первей бо жизни, и еже самъ бысть сдетель Богъ, ни старость бе, якоже подобаше, ни младенчьство, ни яже по многонравных болезнех страсти, ниже ино что от телесных страданий ничтоже. Ни бо лепо бяше таковая створити Богу. Но божествена некая вещь бяше человечьское естьство преже дажь не во устремлении быти злаго человечьскому. Сия бо вся входом злобным нам совнидоша. Темже ниедину нужю имети хощет еже кроме злобы житие, во иже тоя ради случившимся быти. Якоже последует иже в зиму путьствующему померзати тело, или еже погоряще и лучи ходящему почерневает видением, аще ли кроме обоих сихъ будет, избавляется всяко и почернения, и померзновения, — и ничьтоже благословне взищет, еже о некыя вины прилучающееся, вине не сущи, — тако и естьство наше страстно бывше, нужнеми последованми страдателной жизни принесено бысть, к бестрастному же блаженьству паки встекше, не ктому злобными беседованми сприведется. Елма убо елика от бесловесныя жизни человечьскому примесишася естьству, не первее быша в нас — преже дажь в страсть злобы ради впаднути человечьскому, нужа убо есть оставлешим страсти и вся, елика с нею видима суть, оставим. Темже никтоже благословне в житьи ономъ яже о страсти оноя прилучьшаяся взыщет. Якоже бо аще кто, на себе сквернаву имея ризу, обнажится таковаго одения: не ктому отверженаго нелепоту на себе видить, тако нам, совкупльшим мертвую ону и гнусную одежю, от бесловесных кожей намъ наложную. Кожю же слыша, образъ безсловеснаго естьства разумевати ми мня, яже къ страсти присвоивъшеся, одеяни быхом. И вся, елика безсловесныя кожа о нас суть, во отложении одежнемъ съотлагаемъ. От бесловесныя же кожа смешение, зачатие, рожество, скверна, доение, пища, гною извергь, еже по-малу къ свершенью ращенье, уностьство, старость, недугъ, смерть. Аще она убо на насъ не будут, како намъ яже от онех останут? Темже суетно есть иного некоего устроения в будущюю жизнь уповаемаго, заеже никако той с причащающимся к велънию воскресения. Что бо общее имат изможданье и многоплотие, истаянье и добелство, и аще что ино тленному естьству телесному прилучается — противу жизни оной, яже текущаго же и мимоходящаго житийскаго пребывания очюждена есть?

Едино ищет точью въскресения слово — еже родитися рожением человеку, паче же, якоже рече Еуаггелие, яко: «Родися человекъ в миръ».[332] Долгожителное же или скоросмертное, или смертный образъ аще сицевъ или инаковъ случится, суетно есть въскресения славу истязовати. Како бо се дамы поставу имети, в подобне всяко есть: ниже неудобьству, ни неражденью от таковаго различья о воскресении сущю. Еже убо жити начинающее, пожити потребно есть всяко; еже посреде ради смерть случшемуся ему раздрешению, на вскресение исправлешюся, а еже како или когда разрешение бывает, что се къ вскресению? К другому бо разуму блюдет.