Том 8 (XIV - первая половина XVI века, переводная литература)

Тем аще всем то же нам тело оживет пакы, беда есть чаемое. Аще ли не то же, ин некы въстаяй будет паче лежащаго: аще паде убо отроча, въстает же свершен, или спротивно есть. Како есть рещи тому исправитися лежащему възрастней тли, падшему изменену сущю? И вместо старца уношю кто зря, иного вместо ина възнепщюеть: вместо прокаженаго — цела и вместо истаявшася — иже в плоти и иная вся та, якоже яко да не, по единому кто глаголя, молбу приводить слову.

Аще не таково оживеть тело пакы, яково же бе, егда земли примесися, не умершее въстаеть, но иного человека, земля пакы познана будеть. Что убо есть мне в'скресение, аще вместо мене ин живет? Како бо познаюся сам себе, не видя себе в себе? Ни бо буду поистинне «азъ», аще не все ми будет та же в себе, якоже бо в настоящом житьи. Аще ни чье имамъ в памяти начертание, да есть же по таковому словеси, травливъ таковый, уст нестъ, тупоносъ, белузливъ, благооченъ, седина въ власы и врасковою кожею, таже ищющи таковаго, налучаю нарастом долгоноса, черноплотна, и прочая вся еже по образу начертанья инаго имуща, убо сего видевъ, оного ли вменю быти?

Паче же аще потребно есть менших от съпротивлении пребыти, крепчайших оставль. Кто не весть, яко теченью некоему уподобилося есть человеческое естьство, от рожьства въ смерть некым движеньемь преходяще, тогда от движенья престающе, егда и от еже быти престанет. Движение се не местно некое есть преставление, не бо исходить от себе естьство, но изменениемь имать происхожение. Изменение же, дондеже есть се еже глаголеться, никогдаже в том же пребывает. Како бо в тожьстве пребудет, изменующеся? Но якоже сущи в кандиле огнь, еже убо мнетися присно то, светити имат частым бо движением, не отторжено, но и совъкуплено к себе показует, истинною же всегда то приемля себе, никогда то же пребываеть. Извлечена бо теплотою влага вкупе же и споле... и въ плытость собою измени подлежащее. Якоже убо, дващи по тому же пламеню прикасающемусе, несть того же дващи вжеши. Острое бо измененье не ждеть еже второе пакы прикасающагося, аще скорейше се творить, но присно движется, и новъ есть пламень, всегда ражаяся и присно себе примеля, и никогдаже в том же пребывая.

Таково некое и от тела нашего естьстве есть. Пребывающее бо естьства нашего, ради изменнаго присноходяще же и движимо, тогда стоить, егда от живота престанет. А дондеже въ животе есть, стояния не имать и любо исполняется, или издыхает или обоими всяко производится.

Аще убо, кто ни рождься, кто животно тъже есть, но другый пременением бывает, егда възведет паки тело наше к животу въскресение, скоръ некый человекъ всяко единъ будет, яко да ничтоже скудно есть въстающему, — отроча ражаемо, младенець, отрочишь, уноша, мужь, старець и яже посреде вся.

Целомудрию же и блужению плотью действуему, и терпящим же о благочестьи болезная мукам, и ослабающимся пакы к сим ради телеснаго чювьства, обоим симъ показуемом, како есть на суде спастися праведному или тому же прегрешившю, паки же ради раскаяния очищьщюся, и, аще сице случится, пакы на прегрешенье поползишися, пременившю же ся последованию естьства и оскверненому телеси и не сы, и инем от сихъ до конца пребывшю. Котораго блуднаго тело мучимо будет: обетшавшее в старости къ смерти? Но другое бе се от сделавшего грех. Но ли еже осквернися страстию? И где старое? Или бо не вскреснеть, сы недейственое въскресение, или се встанет, и убегнеть мукы подлежай.

Реку ти что и ино — от произносимых намъ от неприемлющих Слово. Ничтоже глаголють безделно от сущих в телеси удовъ естьство створило есть. Ова бо животнаго вину и силу в насъ имат, ихже кроме стояти иже в плоти животу невзможно есть; рекше сердце, ятро, мозгъ главный, душникъ, утроба и прочая вся утробная. Ова убо чювстьвеному движенью отделена быша, ова же действа суть, ина же к приятию пребывающих художне имат. Аще убо в тех же еже потом житье намъ будет, ничтому же преставление бывает. Аще ли истинно есть, — якоже убо истинно есть — еже ни браку жителствовати в житии же по въскресении повелевающее, ниже снедью питаем тогдашнему сдержатися животу, кая будет потреба удом телесным? Не к тому темь, ихже ради ныне суть уди, в животе оном уповаемом. Аще бо яже брака ради къ браку суть, егда то не будет, ничтоже от сущих к нему требуем. Сице и к делу руце, и к течению нозе, и к приятию брашному уста, и къ пищней пищи зубы, и к отсланию утроба, и къ отложению непотребствуемых исходнии проходи. Егда убо она не будеть, яже тех ради бываемае, како или коего ради будет? Якоже нужи быти? Аще убо не суть о теле, яже ничсому же есть к жизни оной сделовати хотящая, не быти ни еже ныне исполняющим наше тело. Въ обоих бо жизнь есть. И не ктому убо что таковое въскресение именует: коемуждо бо от удовъ заеже во ономъ жизни непотребьства не съвъстающимъ телеси.