Том 9 (Конец XIV - первая половина XVI века, подъем общественного значения литературы)

Доблий же терпяше съ благодарениемъ, паче добродетели прилежа и всемъ образ пользы бывая, и словом и деломъ, иже и самому царю въ слух прииде и патриарху, иже и к себе призываху праведнаго, и дивляхуся словесемъ его и разуму. Въ то же время патриархъ Афанасие дивный соборъ състави на некоего Варлама, акиндиньскыя ереси началника, иже Ариава мысляща и Македониева[379] и Владычнее преображение глаголаше привидение быти и многи улови во свою ересь. Патриархъ же со всемъ соборомъ Варлама еретика от церкви отлучи и съ его единомысленики, и проклятию предаша. Он же не преста, пиша и возмущаа церковъ, и многи прельсти. Призванъ же бывъ Стефанъ къ царю по обычаю и по многих беседах рече: «О боговенчанне царю, многих преже тебе бывших превзыде всякими нравы добродетелными и смирениемъ, но о едином не вемъ, како погрешаеши, еже есть глава всему и венець царствию, о немже апостоли подвизашася и мученици плоти не пощадеша, еже есть благочестие». Царь же рече к нему: «Како убо о благочестии насъ мниши погрешати, глаголи убо, о друговъ изряднейши!» И Стефанъ отвеща: «Явлено есть, о царю, презирающему пастырю волчий въ стадо вход и не отгонящу их, такову же быти и тому зверю, аще и пастыря носить имя, и аще злославныя не отгонить, и той зълославенъ судится ото иже умъ имущих. Несть праведно, о царю, царствиа саномъ почтену тебе и толику стаду от Христа пастырю поставлену, того враги во своемъ стаде дръжати, но яко волкы душетленныя отгонити далече и съ Давидом пети: “Ненавидящаа тя, Господи, възненавидех и о вразех твоих истаях, совершенною ненавистию возненавидех их, и въ врагы быша ми”,[380] — и ото всего своего царствиа да повелиши их изгнати. Сице аще сотвориши, церковныа уставиши раздоры и миръ глубокъ даруеши православным, и царствиа скипетры возвеличиши, истиненъ царь истинным христианом будеши, истиненъ пастырь, и ото общаго Владыкы мьзду приимеши — небесъное царствие». Сиа слышавъ самодръжець, премудрости и словесному разуму мужа удивляшеся, много того благодаривъ и похваливъ, рече къ сущимъ въ полате: «Вельми сей мужь в разуме великъ и умныма паче очима многозрительнийши, аще и телесныя сему затвориша». И абие царь повеле Варлама связана к себе привести. Возвести же ему некто от полаты еговы ереси, он же въскоре въ Рим отбеже. Царь же повеле его единомысленики изгнати из града, и изо всех градовъ и весей съ безщестиемъ изгоняти, изо всего своего царства.

Что же по сих? Пятое лето Стефану въ заточении совершашеся, и на праздникъ чюдотворца Николы бдению всенощному совершаему, и запалению свещамъ много, и кажению, и чтению положену житие и чюдеса святаго, Стефанъ из глубины душевныа моление принося и ото многаго труда мало въздремася, зрит очима сердца великаго Николу и к ногама его припад, милости прося. Милостивый же онъ рече: «Рех ти преже не скорбети и показах ти въ своей руце твои зеници, и ныне посланъ есмь исполнити». И воздвигь его и крестное знамение на лици его сотвори, очию же его краи перъстными коснувся, рече: «Господь Исус Христос, иже слепаго от рожениа воочивый, той и твоима очима первый даруеть зракъ». И овъ убо невидимь бысть, Стефанъ же, възбнувъ, трепетенъ бысть — о, неизреченнаго ти милосердиа, Христе! — зряше якоже и преже.[381] И много со слезами благодаривъ и никомуже объяви до времени, но, по обычаю, убрусом закрывъ очи, хожаше съ жезлом. И по мале меньший сынъ его преиде от сеа жизни.

Образ же возвращениа его во свое отечество сице бысть. Посылаше самодръжець греком къ зятю своему серпьскому кралю, да послеть ему воиньстьво на помощь. И болгарене тогда южьная вся подъ собою сътворивше и со множествомъ вои на востокъ грядяху. Посла же с ними и настоятеля обители Вседръжителявы, идеже Стефанъ заточенъ. Его же призвавъ наедине краль Милутинъ о сыне вопрошаше. Чюдный же онъ: «О многострадалномъ ли и вторемъ Иове[382] вопрошаеши мя, о владыко? Недостойна твоа держава вся, аще и тмами житиа твоего будутъ лета, противу Стефановыя нищеты; якоже многоценьное сокровище стяжа того обителъ и весь царствующи град!» И вся сказавъ ему и еже на еретики подвигъ его. Слышав же краль и отеческим милосердиемъ подвигъся, нача плакати, и посла къ царю греческому въскоре к нему послати Стефана. Царь же с радостию, и многы дары давъ, отпусти его, ихже дастъ во обитель Вседръжителя. Пришед же ко отцу, он же со слезами лобзавъ его с радостию и проситъ у него прощениа о съгрешении, еже к нему. Христовъ же подражатель себе повинна сътвори, и рыдание отца утешивъ, и прозрениа своего не объяви ему, ни иному кому, такоже ни въ Цареграде, но по обычаю, убрусом очи закрывъ, хожаше, яко да не паки завистию угасять ему богоданныа очи. Потом же повеле ему отець въ Диоклитийстемъ месте пребывати. Он же паче добродетели прилежаше.

ГЛАВА 198

ЦАРСТВО СЕРПЬСКОЕ СТЕФАНОВО