Том 9 (Конец XIV - первая половина XVI века, подъем общественного значения литературы)

А яко убо еллиномъ есть умышление лукавое таковое мудрование — слыши внятно и уразумей прилежне, что глаголеть о фортуне басненей премудръ некый христианскый философъ.[567] «Счастие у еллинехъ, — рече, — есть же и мнима есть беспромысленое миру строение или движение от безвестных на безвестное и собою бываемое; мы же, благовернии христиане, Христа Бога исповедуем страяюща и правяща вся». И пакы тъй же: «Не человечьскыми помыслы и съветы, но Божиимъ промысломъ и неиспытанными его судьбами устроятися вся человечьская, е же убо человеци несмыслени тихинь и имарменинь[568] обыкошя нарицати, не разумеюще, откуду и чесо ради кому бываютъ случаема». Мы же, благовернии христиане, веруемъ въ Христа, правяща вся. Примети прилежне уставъ, иже по еллинех, фортунинъ: глаголютъ бо они счастию быти беспромыслену строению мира, сиречь не по премудрому и праведну промыслу Божию бываему. Разумееши ли отселе, яко велми латыне и германе хулять на единого преблагаго, и преправеднаго, и премудраго Творца и правителя всячьскых, приписующе къ пречистому образу Спасову богомръзкое подобие счастия, акы некую съпоспешницу и състроителницу ему исповедующе ея, ниже от Божественых писаней научившеся сему — ниже бо обрящеши нигде же въ Богодухновеных писаниих носимо сицево душегубително мудрование, — ниже убо от внешных всехъ философъ[569] хваляемо слышавше е — понеже и неции от них слепу наричютъ ея и беспромысленое миру строение, сиречь не по Божию промыслу и учению бываему? Тии же, осуждающе Епикура философа о них же зле мудръствова и училъ есть, и симъ не хвалят и безбожника его наричютъ, сие глаголюще: «Епикурово злейше учение и сие есть,[570] яко и вся тварь сия счастиемъ некым, а не хотениемъ и судом Божиимъ правится». Слышиши ли, чие сие учение безбожное и како от самех еллинех зле хулимо есть?

Како убо сице удобь и несмыслене сицевый ты въсхищаешися сицевыми безумными блядми немецкыми, и преслушаешь божественаго тайноглагольника, глаголющаго намъ епистолиемъ, еже къ коласаемъ: «Блюдитеся, да никто же вас будет прелщая философиею и суетною прелестию, по преданию человеческому, по стихиамъ мира сего, а не по Христе».[571] И пакы тъй же въ послании, еже къ евреомъ: «Учении различными и чюжыми не скытайтеся».[572] Како же не устрашился оном того же богопроповедника, в нихже глаголеть къ несмысленым галатом: «Аще кто благовествуетъ вамъ паче, еже приясте — сиречь от нас, апостол Христовыхъ, — анафема да есть»;[573] аще и «аггелъ съ небеси»[574] будет сицевый, «анафема да есть», рекше проклят буди. Разумееши ли от сихъ, яко и немци, и латыне под той же апостольстей анафеме суть акы чюжая учения влагающе въ мыслехъ благочестивых.

Потщися убо, Бога ради потщися, отскочи таковыя немецкыя прелести и исповедуй пряме и чисте съ богодухновеными Давыдомъ и пророчицею Анною,[575] глаголющими сице, яве и без хитрословия всякого: «Господь убожитъ и богатит, смиряеть и высить, възставляеть от земля нища и от гноищ въздвизаеть убога». Чесо ради, рци намъ, о священная пророчице? «Да посадитъ его, — рече, — съ силными людий и престолом славным наследника сътворить его».[576] Не фортуною басненою и вертением колесненымъ, но пророкомъ святым преже убо Саула, после же Давида помазавъ ихъ на царехъ,[577] ового убо приемъ от паствы овець «и доилиць», якоже есть писано, ового же ищуща погыбшыя ослята отца своего. Такожде смыслено разсуждай и оно, како Иосиф блаженый прославися въ Египте,[578] яко и второму по фараоне познаватися властелю всего Египта; такожде како же и Моисей въ толику высоту възнесенъ бысть[579] — строением и маниемъ Божиимъ, а не слепымъ счастиемъ и вертениемъ колесненым. Чюжо сие, чюжо есть отнудь и неведомо Святым писаниомъ учение еже о фортуне латынстей, любезнейши ми брате и господине! Сего ради и далече мечеть православных събора прилагающихся сему богопротивному учению. Обретають бо ся сицевии не съ Христомъ събирающе пшеницю чистую,[580] сиречь веру пречисту и непорочну въ небесных его житницах, яже суть сердца и мысли православне верующихъ в него, но паче высыпають от себе и послушающих ихъ вложенное свыше въ мыслех своихъ божественое съкровище, еже о православных догматъ праведнейшаго промысла Божиа. Яже не писана бышя богодухновеными пророкы и апостолы, ниже мудръствовати подобаеть нам, завещаваеть крепце великый всея вселеныя светилникъ Иоаннъ Златоглаголивый.[581]