Том 9 (Конец XIV - первая половина XVI века, подъем общественного значения литературы)

Александре, ведай, иже ни зведешь собе того нижели величаа, повышаа учителевъ законных и учителевъ судовых. Да буди честенъ смирениемь без гордости и пространенъ мыслию, досмотряй исполна, даведываючися конца, и буди милосердивъ. А не свершай гнева своего ниже думою боляръ своихъ, зане же симъ въимешь захотение свое, и усилеет разум твой. А обыскавь путь правый, и чини без медлениа. А не буди бестуж лицемь и срамя люди. А носи порты, иже мило зрети на них, сими бо збудишь душю в собе, а будеши знаменит в людех. И такоже подобает ти, дабы былъ еси слова чистаго и тихаго, а глас бы его тлъстъ, зань же тлъстина гласа его страшит народы и грозно имъ. Про то же мало бы говорилъ темъ гласом толъстымъ, но ли к потребе великой, да уложат в него народ надежду свою.

Такоже мало бы седелъ со всеми слугами, по опщиньству разговариваючи и дворячи, да не бы виделся легокъ въ очию их, а о всем не годится с черьнью. Якоже рекут индеяне: «Когда указуется царь народу за плохо, малит честь свою и безчествуетъ дела своя». А про то же не указал бы ся имъ нижели изредка, въ время воевное или съ сооруженными <...> да в праздникъ великий на году единова. А тогда бы указался народу всему, и стал бы пред ними некоторой речникъ от думець его, наученый закону и мудрости, и реклъ бы имъ, иже государь мой такъ глаголет: «Благодарю Бога, иже есте приступили к послушеньству моему. И азъ вамъ обещаюся такоже стояти при вас животом своим и имениемъ отца своего. А молю вас над темь, дабы есте были покорни закону, и следовали правдивость, и понижали похлебъство.[713] А естли то сами не можете, скажите мне, и азъ допомогу по силе своей. А которая вам тягость от мене видится, споведайте мне: рад язъ хочю полегчити. Ибо не хочю службы вашея с плачемъ, но с радостию, яко же есми повиненъ[714] величати добродеевъ а убивати злодеевъ, зань же симь нарицаюся слуга Божий и его меченосець. А который чюется преступивъ пред мною, покайся от сех местъ, и азъ его прииму по пръвому; а старейшаго моление исполню. А хочю терпети с вами зло и добро в той мере». А симь възвеселятся мужеве, и разговорят с женами и с детми своими о семъ, да възрастят младенець своих за любовь твою, и жена некоими делы научит сына своего любви твоей. А о семъ положат главы своя за тебе, да отстоишься государемь вернымъ, ты и дети твои памятию любве оной.

Александре, не пременяй обычаа земьскаго людскых словъ ради, а над всемь своего обычая. Да буди прилеженъ думати, а сяк бы полегчити всякы дани и мыта гостемь своимь, зан же аще ся уймешь непотребнаго, достанешь потребнаго повышение, и богатьство царево земли его пространячи народу, не стискаючи их. А хотя бы еси имелъ полны съкровища злата, а не будешь ли имети славы добрыа от народа, то все ни за что. А славою доброю полнишь землю свою всеми землями, зань же вси речи драгии изъ своихъ земль повезуть въ твою, да наполнится народ всех потребных своих. А симь будут ти покорни, и въсхотят тя чюжии государевати над собою, зань же они холопиа справедливости. А симь победишь всехъ неприателей своих. Яко же рече мудрый царю своему: «Аще бы намь Богъ нашь възрастилъ от земля вси потребы наши, не превратилъ сердца своего к намъ, се указалъ намъ, иже что възрастил от земля, то не насъ ради, но скота ради». А по то же отчайся малаго, оно же видится велико с первамышлениа, да достанешь малаго с первомышлениа многаго въ умозрении. А буди памятливъ и сладокъ приставающим к тобе и не въсклоняйся къ обычаемь скотским или волчьим — урвати что обретши, искати не потерявьши. Се есть въистину не имущи милосердиа, хотя над темъ, с каго сможешь. Имей милосердие, да не отдалишься от добьрыа славы своеа. А не влегай в похотение свое ествою, и питиемь, и мужьствомъ, и спаниемъ. Мужество бо свиньство есть,[715] а леность преступаеть славу света сего и онаго. Скотство бо погубляет душю, и зашкодит плоти, и убавит дней живота, и дасть женам владети над собою.

Александре, не отпускай милостных друговъ своих, лепших столечниковъ своих. Чтобы еси потешался с ними ествою и питием, а не умноживай сего дабы се трижды или четырижды в году. По сем же достойно тобе чествовати каждого тым, кто чего достоин, а садити кождого по достоянию, и ставити каждого в полъку по достоянию, и примовлятися им, и хвалити их пред ними о достоянию и заочне, и примиряти их, колко мога; зан же сим положится голова подле головы, и привитяжишь неприятели свои. Довати по достоянию портъ, да аще изъ своего плеча — се будеть даръ лепший и ласка яснейшая. А довай сребро, едином оделяй всих.