Том 9 (Конец XIV - первая половина XVI века, подъем общественного значения литературы)

Особление же царское уменшати дворъки и смехи, зан же умножением смеховъ уменьшаеть грозу свою, а честь царская подлуг грозы его. И такоже бы водилися всякии, седящии во беседе его. А коли бы увиделъ некоего безъществующа их, вложилъ бы его в вину. А будет ли близъскых ко царю, подобаеть отдалити его от беседы царское, донде же увоимется легоглавье его. А будет ли делати се нароком, нечестуя царя или беседу его, подобаеть отдалити его удалением великим после казни. А будеть витяжь или воинъ изборный, достоинъ смерти. Якоже рекуть арапове:[716] «Несть бо меж тым, что царствуеть царь над людми или царствують люди над ним — крепость или слабость есть». Такоже Сакулевкуасу[717] главизна о той вещи: «Налепший царь подобенъ орлу, а около его все стервище, а напущи царь что подобенъ ко стерву, а около его орлы».

Александръ, не приступають к послушенству царскому, нижели четырма вещьми: 1. Крепяй законъ; 2. Любовъю твоею до них; 3. Пытанием; 5. Грозою. А унятием кривды от них изведши им вси четыри предреченных. А смеют ли говорить о тобе лихо, смеють учинити; а про то же не дай о собе говорити, да не даси и учинити. А иначе не отведешь дела их, нижели слово отведъ. А ведай, иже гроза умная влечется за справедливостью. Якоже рекуть фарисеи арапьскии:[718] «Подобаетъ царю облечи души слуг своих в грозу, нижели телеса в железа», зан же сим притяжит неприятели свои. Он бо есть подобенъ дождю, его посылаеть Богъ на жизнь земленым, и потреть корабли и порушаеть будование, и по нем снидуть молния, громы, и поплавить житья, и погубить люди и животину, и поставить футрун на мори, и умножится злости людемъ. А ужды не воимутся люди проснти его у Бога, им же пробавятся вся цветущая на потребу им и скоту их. И хвалять Бога за сие милосердие его, а недбають о некоторой лихоты, иже пригодятся им.

Зло и добро речется на четверо: 1. Добро вселично; 2. Лихо вселично; 3. Мало зла, а много добра; 4. Мало добра, а много зла. 1-е бо — несть никто, развеи Бога; 2-е бо — и не сотворено, и несть его; 3-е бо — добро его; 4-е — зло есть. Про то же делай дело свое, дабы мало зла, а много дабра.

Александръ, досмотри нищых града своего и дари их во прискорбный час их, да тии будут въ твой скорбный час пристанны. А сим съхранишъ закон свой и пробавишь царство свое. Александръ, умноживай скарбы житные подлуг людей своих в каждом городе. А что им поможеть мура каменная и зброя железная, не будет ли им поживления? И розмерь вежи и град подлуг бояръ своих народа, а всегда въоружай грады свои яко бы во облажении. Да аще будеть время гладное, но сим пробавиши царство свое.

Вторник. Александръ, остерегайся в речех своих; дабы еси не говорилъ ни о ком ничого лихого, нижели пред тым, кому доверишь у своей чести. А зълюбуй всякому смиренному миръ и ласку свою, и повышай тых, которыи любять правду. Зан же по тому отступять нечестивыи злодеи, надеющися помосты твоея на собе, да будуть творити, еже имаеши очи на делех их.

Александръ, наболши и то тобе заказываю и много тя поучах в том, иже послушеством твоим накозанию исполняются вещи твоя. А про то же уимайся проливати крови, зан же се есть вина, достойна Господеви, ведящему тайну, а ты будешь чинити подлуг рвения ока твоего. А про то стережися о сем велми. Рек Ромас великий: «Аще сотвореный и убиеть иного по образу своему и по подобию, закричать аггели превышнии пред Богом и рекут: “Рабъ твой тот и тот призываеть”. Аще же будеть забитие крови ради иных, отвещаеть им Богь: “Раба убилъ, посему убит”. Аще же в зависти человеческыя ради или мысли лъживыя, отвещаеть им Господь: “Кленуся престолом моим, иже не оставлю крови раба моего”. И не отступають аггели у каждо время молитвеное, донде же помстится кровъ его. Аще же умреть внезапу, ведай, иже се вины ради оноя». Александръ, досыть тобе, паче и всих винъ — долго седение нятцом твоим. И досмотряй о нереченном во книзе сей и о поведании земли своей — сие есть во книгах, сложеных о сем; и обретешь правило делом своим.

Александръ, землян[719] своих, кто что имаеть, досмотряй, а чим тобе служить; изведаешь правосердие их до себе, и како терпить кождый тебе ради. Аще бо наложиши на мало многое — царству своему шкодить. А про то же обживали государи святии имения своя, дабы ведали, како накласти бремена своя на волости земляныи.

Александръ, не изведеши никакого полепшения собе и земли своей, не имеючи образа ея[720] со всеми реками, и полями, и болоты, вдолжь и поперекъ ведая меру ея. И такоже кождому властителю своему, даючи власть, дай же ему образець ея, переписаных людей ея, да ти дасть цело, каково взял. Аще которого сказил — дополнить собою, а вси суды свои переписуя, да положить перед тобою. Аще же будеть правъ, посади его на другий год; аще же сказил ти, полни шкоду свою. Сим бо уведешь и любовъ свою всих, любящих правду, и наполнишь землю свою народомъ и товаром.