Том 9 (Конец XIV - первая половина XVI века, подъем общественного значения литературы)

Александръ, не попережай ничим, нижели испытавъ рады правителя своего. А не отступили прежнии от того слова, иже ради — верхъ накозанию. И во поидани перьском писано, иже некоторый царь думалъ с правителем своим в тайне великой, иже на немъ столпъ царьства его. И рече единъ от правитель его: «Не подобаеть царю, дабы думалъ с каждым от нас о головной думе своей, нежели с каждым от нас особно». Зан же чим будеть тайна покрыта, будеть дума царева славна, и беспечална, и уготована ко исполненью; и менши переказу в ней, зависти нашей межи собою. Якоже рек премудрый: «То есть тайна, что межи двема, а что межи трема — то несть тайна».

Александръ царь, про то же достовай тайницю неприятеля своего всею силою своею. А то собе не зведеть, но ли намъздяючи старейших, что въ его доме, имеючи купцовъ розных языковъ, что ездять вь его землю: зан же сим одолееть несилный силнаго. Рек Ватисто еллин:[727] «Пребываеть царю силы думою правителевъ его, яко прибываеть море реками, что теку в него. Достанеть хитростию и думою болши, ниже силою и витезми». И укозал единъ от царей перьских сыну своему, здовая ему царство свое за живота, и реклъ ему: «Подобает тобе родитися, зан же ты одинъ в людех. Радися с тым, кто в чем бывалъ и смиренъ, и свершенъ умом своим и поведеньем своим, и любить тебе сердцем своим, и поставный словом своим, и говорить о твоей чти за очима, и пространенъ мыслию, не досветчень в недоверяи царству достойному и законному. Но скажет ти неведомое твое, не допустит ти с неприятелем твоим клопота, чтобы не утешилъ его, а ни врагу твоему на тя шоптания, чтобы не отвел его».

А не въимайся царства своего деля, дабы еси не приклал думы своея к думе иного, будет ли дума твоя урядна. Но сим научайся прикладати думу свою со иною думою, аще пременится от думы иного, — досмотряй ей. Будет ли урядна, — приими я, а будет ли неурядна, — приостави ея. И так же искуси правителя своего — указываючи ему потребу свою до скаръбных речей. Радит ли тобе выдовати что во скарбех, буди се легко во очи твоих, зан же любить с прирожения прятати скарбъ. Аще же ти радить взяти товаръ народовъ, ведай, иже злонравенъ есть и отстудить тя всим, а в том пагуба царству. А стравит ли того, что добыл у тебе, накладаючи на полепшение твое, ведай, иже дасть и живот свой за тебе. А налепший правитель — что приступаеть к послушанию твоему, а любить здравье твое, а не похлебуеть тобе, и мерзокъ имать свет сей, и ласкы для твоея даеть живот свой, и все, что имаеть, наполнити волю твою.