Том 9 (Конец XIV - первая половина XVI века, подъем общественного значения литературы)

Кто збираеть дань. Александръ, ведаешь, иже народ — скарбъ твой певьный, иже погибель твоя погибелью их, царство твое ими пробавишь. Про то же мни собе их яко сад, а товаръ их яко насеяние и корень того саду. А сказиш ли корень и семя — чим поставишь существо породу и по подобию? Но якоже милуешь царство свое, так милуй честь их и отимай речи, которыи иже не заживают им. А был бы тот зьбиратель твой искусен в вещехъ, и богат, и не драчливъ, дабы брал овощь, а не уломил бы ветки и не усушил бы кореня. И был бы добронравенъ, и смиренъ, не гневливъ; а не будет ли сяковъ, отженеть от тебе народ, а сим сказить умыслъ царский. И также не приставляй многих брати сребро свое, да не будешь шкоденъ.

ГЛАВИЗНА ПЯТАЯ. О ПУТИ ЕГО, И О ТЫХ, ЧТО НА ПУТЬ ХОДЯТЬ ОТ НЕГО И В ПОСОЛЬСТВЕ ОТ НЕГО, И О ПОВЕДАНИИ ПОСОЛЬСТВИЯ ЕГО

Александръ, подобает ти имети зерцало дорожное, и образ мира сего, и обычаи земскии; сим уведаешь, како имаеш ся сооружати путьми своими. Ведай — наразумит тя Господь — иже посланный свидетельствуеть народу послателеву на разумъ послателевъ. Посланный бо — око послателево, чего сам не дозрить, а ухо слышить, чего послатель не слышить, и язык его заочный. Верен приятелю своему, и любить тебе, делается всякое речи ганебное, и не опой. Такова шли <...> и приказуй ему речи свои, да ведавъ поведание твое во иной вещи. А не приказуй ему о небывшей, зане же можеть пременитися воля твоя в тое, что лепшии хотелъ его тогды. А не будет ли свершенъ оным предреченым, но дсыть нам, чтобы был веренъ, да не приложил бы ни унял бы слово твоего, и мало бы говорил о поведаньях твоих, и остерегал бы ся опойства, и всего похлебьства, и говоренья с недостаточным. А да разумел бы, что слишит, и умел бы отповедати на то. А не будет ли сяковъ, ино толко бы веренъ былъ и донеслъ бы листы твои, да кого посылаешь его, и чтобы принеслъ тобе ответ верный.

Александръ, побачиш ли на своем посланнику, иже сребролюбець и мздоимець, не шли его, зан же можеть соблазнитися, и взяти даръ великий, и стратить тобе много велми. Якоже чинили персове, иже пред каждого посла приносили вино и, подпоивши, приносили перед него сребро и злато и ведали, иже тайница государя его открыта. А захотел ли у них нечего, и присылали ему жонкы красныи, дабы ся открыла тайница его. И также написуй посольство посланнику своему, и вси обыходы его тамашнии, колько можешь, а слово присланных до тебе а также написуй. Отпускаючи их от себе, посади и учестуй по достоянию, и пытай, чтобы ся роспометал во всем посольстве своем. Но будет ли пременяти умыслъ оных речей своих, ведай, иже дума государя его несовершена. Не довай ему много быти у себе, дабы не ведал обыходовъ твоих. А не может ли ся стати тобе, чтобы еси борзо отпустил, но замышляй на него пиры пирити, дабы утаена тайна твоя от него. Не укладай надеи своея на слово, изменяющих слово твое, и мздоимцовъ, зане же сими изменяются умыслы твои. Александръ, остерегайся посылати правителя своего а не отдаляй его от своих очей; и зан же се искажение царъству твоему.

О ПОВЕДАНИИ СЛУГ СВОИХ, И БОЯРЪ, И ВИТЯЗЕЙ. ГЛАВИЗНА 6. ПЯТОК

Александръ, досмотряй кождого слугу своего, какова пильность его до тебе, и мужность его межи братьи своей, и ревность обыхода его и з дховными людьми, и светьскими. И на сякова надейся, иже дасть живот свой за тебе. Не приими к службе своей близко и в раду свою чюжеземцовъ, ножели известных тобе, а варуйся приимати милостника неприятеля твоего, и заговариваеть за него или ведет ся обычаими земли неприятеля твоего. Александръ, не уймешь от лихих делъ слуг своих, нижели урядивши обход их питьем и ядением; и потешайся с ними <...> стрелбою и речми витязскими одинъ день в недели, абы еси виделъ, кождого году как во своем деле. А онъ будет приучен служити тобе тымъ, чим же имаешь витяжити неприятеля своего: а того жадай на них, не иного болшии. А не смотри на отчину их, но на дела их. А повышай ласкою своею к лепшим межи ими, зан же приведешь их к тому, же поидуть из далекия земли навыкати, чим бы имели налепшии послужити тобе. А варуйся зле велми платити службу их: и указатися смутен, видяще шкоду их, и призирати кождого в болезни его, и накладати на него всякими речьми лекарьскими, и делати им честь по животе их по достоянью. А се есть корень ласки твоея — прилюбити к собе слуг своих, которыи же, сие видя, и дадуть радостию каждый животъ свой за тебе; а сим притяжишь неприятеля своего. Александръ, не давай никакия зброи воином своим, нижели ховай про потребу их в своем скарбе; а осмотривай однова на неделю. И дай ея в руки верного, имеюще боловати ея. А суди судом праведным и борони их от каждыя ганбы, яко и сам себе, занеже се есть честь твоя.