Том 9 (Конец XIV - первая половина XVI века, подъем общественного значения литературы)

Александръ, буди не знаком всим, что у войне твоей. А буди вбран в доспех тайный; а может ли ти ся стати тобе, чтобы еси спалъ убранъ — чини ти тое. А не чини так, как чинивали цари глупыи, что указывали ся на войне. А се азъ присегаю тобе: иже николи не минеть видевшеся царю со царем, дабы не мыслилъ о соблажнении его. А се обретено Писмом в начале света, о деле Каинове со Авелем, братом своим. Зан же зависть и любовъ света сего приведеть к сему, что есть власть; по прирожению света сего подобаеть варити его. И ведай, иже война телом и душею, сложени со дву привращеных и уставляющих друг на друга. Душа же их тожде надеется каждый привитяжить, тело же их съоружение обоих полковъ, сей сопротиву сего; а коли бы не мелъ надежи взыскати, разошла бы ся та война; прок же ей, егда одолееть супостата своего. А про то жь умыслъ свой положи скрепити сердце воиновъ твоих; и слюбуй имъ, иже ты изыщешь; и кажи им, иже имаешь доводне се; и умножи им оружие, иже биеть здалека, яко ти напишю. И стал бы законоучитель твой и рек бы им твоим словом — а сам бы стоял тут же во смирении великом, — жалуючи со слезами о кривду супостата своего и обещающи им кождому ласку свою лепшии первое и кождому помнити доброту его и чистое сердце его. И слюбуй им, иже заховаешь их вечными слугами, и оболши им дару своего, и учинишь из селянина боярина, а з боярина витязя. И скажи им, иже писмо и поведание земское пишет о тых, хто покинеть государя своего на поли — ущепенъ чти и веры. А законникъ твой указывал им долже сего поучением законным, и поститися, молити Бога боязнию и з смирением, зан же сим избудуть скорби и печалий, находащих на них.

Александръ, не бийся, нижели в поли или в месте высоком. А будет ли воеватися с тыми, кто выйдеть к тобе на поле, но заставляйся щиты надежными и сторожою певною въ дни и в ночи, дабы не нашелъ враг твой внезапу да превитяжить тя. А не ставляй шатра своего нижели в месте надежном, яко бы гора и подобно место, и близко воды. И умноживай корму дорожного и дровъ, хотя ти не нужно надобе.

Александръ, приучи кони свои гласу пушечному и зверем диким, дабы ся не бояли ничого, сим бо привитяжьшь неприятеля своего. Каждый бо копейникъ твой имел пищаль у копья, дабы на сустречении и огромили кони неприятеля твоего и скрепя сердце воином твоим. Дабы были витязи твои разноличнии: иный бы стрелець, а иный копейникъ. А коли пустишь полкъ на них, то шли с ними слоны и туры,[733] иже в них стрелцы великии и пушечники; внегда будеть им страх, да окрепится сердце их с ними. И раздра войско свое числом подлуг неприятеля своего, и ставляй одесную людей воевных неотступных, и олевую — пушечников, и пищалниковъ, и стрелцовъ огненых,[734] и образовъ страшных, яко учинил есми тобе, коли еси бился со индеяны.[735] Иже слуху оного страшного ужаснулося сердце их, и замешалися кони их — а то все сосудми оными предречеными. Подобаеть же тобе, дабы еси приразил их и ведалъ сооружение оных людей и пушок оных — се будут боятися тебе, зане же коли познають на тобе, и делати дело свое с умыслом налепшим. И росмотривай народу неприятеля своего; а место, которое хворейшее, оттуль починай бити его. И поведися статком, коли расправляешь войну; а сам убранъ, а около тебе люди храбрыи и верныи. И ставляй сторожовъ бывалых во всем. А николи не видали несмо, коли которую рать биють с одного конца, дабы сердца не ужаснулося другого конца. И ставляй подсаду многую со огнем и гласы страшными, занъ же се крепость великая твоим воиномъ и страна великая войне, зан же ужасиши сердце супостата твоего. И чини сосуды страшающи конем своим, имже замешаешь кони неприятелей своих. И умножишь собе вельблудовъ про беремена путнныи и про страх коньский.

О войне. Аще же воеватся будешь с городом, учини собе пороковъ[736] много великих и накидай онъ град огню, и камения, и запаху лихого; сим же порушаешь муръ их и пременишь ветры их. И учини собе судно рушати муръ; а стреляти <...> стрелами, мажючи ядом; поставъ лук коловоротный на них,[737] зан же сим ужасають сердце будущих во твержах великих. А в ночи преступ тых, которыи не умеють битися, и всех грецовъ своих докучати им и мешати сонъ их. А остерегайся всякиа притча ночныя, а не ставляй гетманом и спичником[738] мяккосердых. А можешь — чинити вся где твоя хитростьми, зан же корень поведеный воевного хитрования. И положи битву конець всимъ делом, яко индеяне хитры, а не злосердыи туркове, сердыи и глупыи. А про то же достойно воеватися с каждыми людьми, как ся годит с ними. А не отпускай малой речи одновъ будеть велика, але розмысль о ней преже прихода ей до тебе.