Том 9 (Конец XIV - первая половина XVI века, подъем общественного значения литературы)

О писарех и о печатникох рек. Александръ, достоить тобе выбрати собе писаря писати листы свои таких, иже образують умыслъ твой и сознавають болши иных о доброумъи твоем и расправности умысла твоего всякому досмотряющему в ню; иже не увидишь по них жадного ущепления о расказу умысла твоего. И да недосвечный в посягнении за чюжее. Зан же ими закрыта будеть тайна твоя, а сим усилееть царство. А не имущы тайници — не имущи силы, ни чести. Зан же слово исходить з умысла, а говорение его — се есть телествие оного слова, а писмо — образъ его. Якоже красну словесну быти добровидну, тако же подобаеть тобе, чтобы еси выбрал от писаревъ, хто бы сказал вещь твою исполна словы красными, писмом хорошим. А про то же писарьство — и краса твоя. А не хваливалися цари прежнии, ниже писарми своими, а не уступали на степень честный и превышни толко ими. А про то же как коли он толкуеть умыслъ твой, и смышляеть о тайнах твоих, и прославляеть честь твою по всих беседах действы своими, а тако же прислухаеть тобе чествовати его явно во всих делех подлуг службы его и смыслу его, не толко руки его дела.

О печатнику его. Александръ, ведай, иже печатникъ — скарбник чести твоей и первой по правители. Про то же выбери собе носити печать свою мужа, имуща в собе духъ радный и храбрый, и не было бы подобия лихого парсуною, яко же ти напишю. И был бы достоинъ стати на спици, и полкъ расправити, и посольство, и знал бы суд судити, и такий же законникъ, как и ты. Был бы совершенъ сими обычаи, еже ти напишю:[729] 1. Дабы был человекъ, ученый писму своему, и верил святому Писму по достоянию. 2. Дабы не был упрям и любяй прю, ерамота людемъ. 3. Дабы был веренъ словом своим и заховал тайну братьи своей, опроче твоея шкоды, а о всем — твою тайну. 4. Дабы был промышленъ знати хитрости печатныя вселично и хитрости писменныи, и впадныи, и гретыи, и парсуну листовую по достоинъству всякого человека,[730] и давати записы земския по достоянию, и знати порсуну жадную, кому то он даеть записъ. 5. Дабы не был опой ни поробник, сими же прельщаются вси силни и мудрыи. 6. Дабы миловалъ честь градскую вышши сребра и злата а не брал бы мъзды. 7. Дабы был покорен и справедливости и дапомагатель сиротам и вдовам и боронил их от обиды. 8. Дабы был пиленъ приказанию твоему, и честь поведанием одеяния своего, и згоде братьи своей всей; зане же онъ яко бы часть сердца твоего, и честь твоя при чести его. Про то же постави доброту свою при доброте его а милующих тебе милуй по достоянию их чести своея ради. А может ли быти, дабы был правитель твой то и печатникъ твой, и писарь твой — ино то и налепшии, и тайна твоя безпечалней.

О градодръжцы. Александръ, достойно ти ведати, городы свои держати тому, кто исполненъ всим тым, чим печатникъ твой. А на то чтобы ведалъ, колко людей прислухаеть к городу тому, и чим ся имають покормити до году, и как переживають во облежании, крепити город твой вежами, и горами, и мурою, и всякою обороною градскою, и ведати сооружение города твоего в мирный час, яко и не в мирный; и бывал бы по чюжим землям. И прироженець бы земли твоея или от неприятельския земли и неприяеть неприятелю твоему, якоже ты сам. И судить суды свои изс книгъ, а кладеть пред тобою; а не прославленъ во кривде и во обиде и не позсягнеть за чюжее.

О моршалку его. Александръ, выбери собе на моршальство воина и храбра, и добровидна, и приветлива воиномъ твоим — зан же они милостники твои. Про то же бы не простирал рукы своея ни на кого же от них, а не был бы гордъ никоторому им, ни соромотил бы их и ни словом, и росправлял бы судьбы их, не допуская до тебе, и далил бы ся ганбы их, и был бы ездокъ по чюжим землям, и видал обычаи царьскыи, и был бы роду подобного его; и смел бы главу свою положити о чести государя своего. И уряденъ порты своими, и богобоенъ, не обидяй сироты и вдовъ, и достоинъ в посольстве да таких, яко государь его.

О тых, кто перечитаеть народы и расмотряеть обиды народовъ. Александръ, подобаеть тобе на кождый год ведати, абы тобе каждый человекъ давал головщину от себе и от слуг своих: пенезь наболший от себе, а от жонокъ и от детей — пенязь наменший, дабы еси ведал, колко воиновъ имаешь в своей земъли, и колко людей посполитых, и колко богатых, и колко убогих — чим кто тобе достоинъ служити. А не делай сего дела ниже людьми, верными до себе, и пременяй на кождый год иных бо всих тых, кто серебро твое выбираеть. Зан же сим отведешь ревнование от слуг своих, изведаешь кождого, верного до себе. И тако жь не можешь владети ими, нижли имети каждому заказу другого такова, а сим не будешь знанъ никоторым слугам своим. Александръ, подобаеть ти имети особных своих мастеровъ, что умеють направити каждую изброю; и всим умножити пушечниковъ и всяких стрелцовъ.