Том 9 (Конец XIV - первая половина XVI века, подъем общественного значения литературы)

И были бы в нем нрави сии: 1.Дабы был целъ уды своими, угоден к тым делом, что надобе ему до них. 2. Чтобы был розумен и мудръ, доведаяся борзо, что ему укажет, помятлив <...>, росторопенъ, послушенъ, побачить тую речь, что конець ей. 3. Чтобы был добровиденъ, праводейственъ а не бы был бестужь лицом. 4. Чтобы был приветенъ, доброго языка, чистого, сказати похотение свое словы краткими. 5. Чтобы был хорошим одеянием, быстръ во всих премудростех, а надо всим во премудрости численой зан же она наостряеть разумъ и полепшаеть, яко соль и перець, ины что полепшаеть еству. 6. Дабы был верен словом своим и любить правду, даеть и берет ценою, и мерою, и вагою и прославленъ добром. 7. Чтобы не был опой, ни ожиря, ни поробник, и отдаляет кохание и маниячество. 8. Дабы был щедръ, и промышленъ, и любит честь, и низкого духу. 9. Чтобы были пенязи и вси речи светскии легьки очию его; не клял бы мысли свои толко в тое, что честь царю, и прилюблял бы его людем. 10. Чтобы любилъ справедливых, и омерзял кривду, и сознавая правду праведному, и милостивъ покривденому и пообиденому, а не брал бы мзды ни на кривду, ни на правду, а не премолвил бы жадный человекъ на то; а не имелъ бы дружбы со лживыми, — ни со лживыми, ни со обидолюбци. 11. Чтобы крепился делы своими и в том, что положил в думе своей, и дал бы живот свой на то; а не был бы мякосердъ, но храбръ и помятливъ во войнах. 12. Чтобы был скорописець, а не шепетливъ, и ведал бы накозание преже дней иных, и поведания царская, и обычеи иного закону, и поведания витяжьская, и местьца слуг твоих; и чтобы был роду того, чтобы племя его были правительми или столечники; и бывал в безвременьи или в чюжих землях. И такого же подымай в такую честь, и онъ вси дни свои будеть покорен тобе, и потоить тайны твои, и не восхочеть тобе жадного лиха, про то же распометается на урожение свое, и на очество свое, и на тыи речи предреченныи и воимется от сего. 13. Дабы не был рад говорити о безлепици, и пересмешливъ, и соромотя люди, оманывая люди и скрадя разумь их. 14. Чтобы был не кушал вина, нижели з лекарьскими речми нужою в немощи, не любил бы ленивьства и глупости. И печалил бы ся день и ночь привечати люди и полегчати мыслей оных; дабы дом его отворень всякому пришелцу и отшелцю, чего надобе сем; и да разумеють речи их, и послушаеть дела их, и тешить трудниковъ их, и подоимаеть бремя их; дабы был набоженъ, веруя речи Божии. А не вставляй правителя, нижели кто весть веру твою и дръжить обычай закона твоего.

А ведай, иже сынъ человеческъ честенъ у Бога изо всего света нижняго, а сотворение лепшаго не будеть, пущи его ради. Мы же сами второмышлением искрам небесным, а с ним ставятся обычаи и прирожениа замесу нашему телесному, зане же они привод, а мы приведени от них. Человекъ же первый всим живым честью, а последний всим замесом своим; а часом сотворенъ, а часом гинет. А про то жь несть того обычая въ каждом живом, чтобы не было в человецех. Храбръ како левъ, боязнивь яко заець, щедръ яко куръ, скупъ яко песъ, гневливъ какъ воронъ, бегаеть людей как рысь, приставаеть к ним яко голубъ, збойливъ яко лисица, простъ яко овца, борздъ яко елень, амешкаеть яко медведь, лепъ яко слонъ, уничижается яко оселъ, разбойникъ яко ногь, гордъ яко пава, блудить яко струцел, упрям яко синица, трьпяще яко свиния, смутенъ яко зелюля, хробрует яко конь, ховается яко мышь, очютливъ яко пчела, тужить яко поук, смиренъ яко мравей, мьститъ и враждуеть яко верблуд, повадливъ яко мескъ, нем яко рыба, пищить яко соловей. А наболшии остерегаю тя, дабы ся еси не стужал ни жадному человеку на свете. Зан же глава умова — познати истиннаго Бога, а потом — любити рада по чину добра и лиха.

И такоже заказую тобе, чтобы не был правитель твой велми белъ, а око зекро, ли чернъ а око зекро, или страховиден. Александръ, варуй ставляти правителем некоего племенника своего или ровню своего во очине. А служит ти, а ни доверяй им ни в чем от дел своих и стережися их, яко скоръпий индейских, что забивають посмотром своим.[728] И наболши что к тобе будуть близки, болши ти будуть шкодити. Зан же ревность их до тебе болши чюжих, зан же вси мнятся такии же, яко ты, а не верят, иже царство ти Богом данно; а про то же не досыть им, али же имуть душю твою. А помятуй ся вельми зело. Александръ, ведай, иже се привязано во прирожении, досветчено парсуною и покушением с перводеяния мужми праведными. А се было в начале миротворение, иже завистию убил Каин Авеля, брата своего.