Том 9 (Конец XIV - первая половина XVI века, подъем общественного значения литературы)

О боярех его. Александръ, ведай, иже бояре — крепость земная и честь царская, и дети их прироженейшии ко службе твоей. Ими же самъ исполнишь думу твою и надеженъ еси, коли выедешь из земли своея;[731] и они — мура крепкая народу твоему. Про то давай городы твои достойнейшому от них и старейшому службе своей. А не соромоти явно и честуй кождого словом добрым и порты с плечь своих. А варуйся зело велми понижати, кого еси повышил, но ли по винам его, повышати не по заслузе его — се есть воистинну глупость и вещь та, что отгонить от царей славу их добрую. И такоже милуй дети ихъ по достоянию, и приближай и ко службе своей и болши чюжеземцов непокушеных. И оставляй каждого на очине своей и на выслужении своем, сим бо умножишь любовъ их до себе, и научить сына своего отець положити главу свою за тебе; и не восхотять иного государя над собою, нежели тебе и сына твоего, по оной велицей ласте твоей. Александръ, ведай же кождого боярина своего и печать его; а се подобаеть ти некоих вещей ради, нужных царству твоему. И досмотряй достоиньства каждого человека к службе своей, ни земли его, ни роду его. Якоже рек Ромасъ: «Буди сыном кому хочешь, коли еси мудръ. Занеже несть проку в роду без мудрости и достоиньства своего».

О витязех его. Александръ, витязи — начестнейшии во царстве и укрепителеве земли своей. А про то жь учини собе поведание налепших о съоружении их, дабы ти известно о далеком от них и о близком от них. И сим будешь беспечален, кого от них посылати и на каго наложити полкъ свой, но постави собе числом которым хочешь. Иже наменший во царех — четвертый, зан же страны света сего четыре; и перед и зад, правая и левая; по сему же восток, запод, полдне, полнощь. И всякий царь не обладаеть вечно то на четверти. А восхочешь болши — но до десяти, зан же десятма наполняются четыре оно жь: единъ, и два, и три, и четыри. А наменший царь на десяти столечниковъ, а под каждым столечникомъ десять бояръ, а под каждым боярином десять урядников, але будеть тисяча; и будеть под каждым десять головъ, а се будеть тисячь десять. А коли будешь потребенъ до тисячи, повели одному столечнику — да призоветь бояръ своих, а бояре урядниковъ своих; да изведешь волю свою вократце. И так же, будешь ли потребенъ до ста или до десятка, указуй тым, кто над тыми; да будет ти легко водити их, зан же каждый укажеть тому, кто под ним. А постави правителя над витези человека мудра, и верна, и не горда, и терпяча, и россудна, и знающа порсуны, знающа поведания витязьска, и чем даровати кождого витязя. Сим бо направи дела их, да будеть каждый иметь смыслъ, как ти послужилъ, а не довай малому великого дару, а великому малого дару. А иже честуй златом и камением драгим не иных слуг своих, толко правителя своего, а заховай их во чести земской и дворьской болши иных слугъ своих и проче правителя своего. А все, что писано чинити слузе, чини имъ и привитай их словом добрым. А который ся во чти не поведеть — карай его тайно, а не оставит ли лихого обычая — и скази его явно пред братиею его, а не оставит и — пусти его прочь. А подобаеть им, дабы тя чествовали и боялися болши иных слуг твоих. А не приступали бы к тобе близко, как приидуть пред тебе. Не умноживай говорити с ними явно, а о всем потай, а ни с жадным честником, или гостем, или з незнакомым, зане же се приведеть тя страсти царство свое, якоже сталося Тамостиосу царю[732] и иным прежним царем.

Научи их приносити прошения своя на писанных листех, а присылали бы до тебе людьми, достойными дела сего. И всякий листъ прочти его пред правителем своим и гетманом своим, будет ли о воевном деле. А будет ли годно досмотрети его и наказати на то, и ты откажи и напиши его на другой стороне того же листа, что пустил к тобе слуга твой; и весь род его будеть ти служити всим сердцем своим. А еже не годно писати, откозуй словы добрыми. И бывай веселъ с ними во зьстатии и в беседе гостиной, зан же они весели симь и честуются тым. Умножится любовъ их к тобе и к детем твоим.

ГЛАВИЗНА 7. О ПОВЕДАНИИ ВОЕВНОМ, И О ОБРАЗЕХ ПОЛКОМ, И О СТОРОЖЕХ; КАК ПОДОБАЕТ РОСПРАВИТИ ВОЙСКО, С КИМ СЯ БИТИ И С КИМ СЯ НЕ БИТИ; И О ПРЕМУДРОСТИ ПАРСУННОЙ; КАКО ЗАХОВАТИ ЦАРЮ ЖИВОТ СВОЙ ПИТИЕМ, И ЯДЕНИЕМ, И СПАНИЕМ, И ПОРТЫ. СУББОТА

Александръ, не вымыкайся в лихое место на войне и прилепися в наболших от беседы своея. И был бы полкъ твой сооружение всих полковъ людми, и нарядом, и местом лепши первого полку, и людьми искушеными, и непробегивалыми, и бывалыми в далеких землях. Про то же посылай прироженцы земли своей в далекии земли, дабы ти приносили поведание воевное, и обычаи царскии поистинне, и ведали бы вси притчи воевные. И вси потребы пеших, и конных, и стурмных, и всяких заховай во чести витязьской предреченной. А который тобе принесеть писмо неправое или о поведании земли твоей, или о поведании тебе самого — отдаль его от земли своей. Сим бо накажеши слуги свои, и искрепешь правдолюбцевъ, и обратишь грешных во спасение.