Том 9 (Конец XIV - первая половина XVI века, подъем общественного значения литературы)

И сие слышано бысть от всех, тамо живущих, и стекошаса мнозии, и приносоша болящия и недужныя, и вси здравии быша. И начаша приходити оттовсюду людей множество, приношаху недужныя и разслабленныя изсцелевахуся. И многа чюдеса безсчислена бываху, и начаша чтити Луку вси людие, якоже пророка Ильи, апостола его имеяху в великой чти и славе. Лука же поиде со иконою из с Колочи к Можайску. И якоже приближашася ко граду, изыде во стретение князь Ондрей Дмитреевичь з боляры своими и весь град от великих и до малых да иже и до сущих млеко. И быша знамения и чюдеса многа от ыконы Божия Матери.

Таже оттуду поиде Лука со иконою к Москве, и стретоша ея со кресты митрополит со епископы и со всем священнымъ соборомъ. Такоже и князи и княгини з детми своими, и боляре, и воеводы и вси велможии и все православное крестьянство множество. И быша чюдеса безсчисла многа: слепии прозираху, хромии хожаху, разслаблены востаху, немии глаголаху, глусии слышаху, во всаком недузе сущии здравии бываху. И что много глаголати, елико не может умъ человечь зрещи безпрестани тогда бываемых тмы тмами безсчисленых неизреченных чюдес.

И хожаше Лука от града во град со иконою Божия Матери, и везде чюдеса безсчисленная и неизреченна бываху от то иконы Божия Матери. И вси даяху Луке: князи, и бояре, и вси православные крестьяне, — имения многа в милостиню, и в честь, и в дары, и чествоваху Луку, яко апостола.

Лука же бысть отнюд простъ человекъ, яко от последних поселян, но и добродетель законную имеюще в себе. И возвратися паки в первое место своею иконою с чюдотворною на Колочю и со всем своим богатством, а богатства много безсчислено собра. И постави двор себе, яко некий князь, храмы светлии и велици, и слуг много собра, престоящих и предтекущих ему отроков много имеяше, во утварех украшени. И трапеза его много брашна имееши, тучных и драгих, и пити благовонных много, и ядяше и упивашеся со и сущими его служатели. И на ловы ездяше с ястребы, и соколы, и с кречаты, и псов множество имеяше, и медведи имаше, и сими тешашеся.

От то иконы же пречистыя Богородицы чюдеса многи бываше, еяже Лука во церкви постави, создании от него, идеже ныне манастырь стоит Колочцкий. И приходящии отовсюду одержими всакими недуги, изсцеление приимаху.

Сотвори же ся Лука напрасен и безстуден. Егда убо ловцы князя Ондрея Дмитреевича съ ястребы и соколы повелениемъ князя своего на лов выезждяху, он же соколников бияше и грабяше и ястребы и соколы себе взимаше, и се ни единою, ни дважды, но многажды и всегда бываше.

Князь же Ондрей Дмитреевич терпяше вса сия, иногда же посылаше к нему, он же к нему жестоко и сурово отвещеваше. Князь Ондрей же Дмитреевичь смирением и терпением смолчеваше. Та же нача ловчих княже Ондреевых бити и грабити, и медведи и с ларми взимаше к себе, и с ними веселяшеся и утешашеся.

По сем же некий жестокъ был ловчей у князя Ондрея Дмитреевича, и приготовив время, и улови медведя зла и люта суща и повеле его вести близ двора Лукина. Лука же видев из хором своих и выиде сам к медведю со служащими его и повеле ловчему князе Ондрееву пустити его у себя во дворе. Ловчей же княжь Ондреев лукавство сотвори над Лукою: той час пусти медведя, и приде медведь на Луку, а Лука не успе вскоре отоити, и взаша медведь Луку, едва отняша Луку от медведя, точию дышуща.

И в той час пригна к Луке князь Ондрей Дмитреевич, и видев Луку в последних дышуща, и рече к нему: «Почто еси бесовское позорище и пласание возлюбил и пьянству совокупился, како тя Богъ прославил своея Матери, пречисты Богородицы образомъ чюдотворнымъ, ты же сия ни во чтоже положи, но к неполезному мирскому житию сшел еси, тако тебе и случися».

Он же плакаше и слезы точа, и моляшеся ему, полезное устроити по немъ. Князь же Ондрей Дмитреевич многим его безсчисленым имениемъ на том месте манастырь постави во имя Пречистыя Богородицы и глаголемыи Колочский, и чюдотворную икону Божия Матери в нем постави, иже чюдеса творит и до сего дни с верою приходящим.

Лука же в немъ и пострижеса и поживе в немъ неколико лет и во умилении и в слезах, дондеже и преставися и положен в нем.

ПЕРЕВОД

О ИКОНЕ ПРЕЧИСТОЙ БОГОРОДИЦЫ, ЧТО В МОЖАЙСКЕ НА КОЛОЧЕ

В том же году в пятнадцати верстах от Можайска, в вотчине князя Андрея Дмитриевича, внука Иванова, правнука Иванова и праправнука Даниила Московского, свершилось знамение на Колоче.

Некий человек, по имени Лука, из простых людей, бедных земледельцев, на одном дереве в некоем месте нашел икону Пречистой Богородицы, на которой изображена она держащей на руках Младенца Господа Бога нашего Иисуса Христа. С одной стороны на створке той иконы написан образ Николы-чудотворца, а на другой — Ильи-пророка. Взял ее Лука, с верою поцеловал и поставил ее у поля своего на неприметном месте, на дереве. Но пришел другой человек и забрал ее у него. Лука же умолил его, дав ему хлеб овсяный, и снова вернул себе икону, и с нею возвратился в дом свой.