Загробная жизнь или последняя участь человека

«Приснотекущий, животный (животворный), просветительный Источниче, соприсносущная Отцу содетельная Сила, все смотрение за спасение человеческое прекрасне исполнивый, Христе Боже наш, смерти узы неразрешимыя и заклепы адовы расторгнувый, лукавых же духов множество поправый, приведый Себе о нас непорочное заколение и Тело давый Пречистое в жертву, всякаго греха неприкосновенное же и непроходное и страшным сим. и неисповедимым священнодействием живот нам вечный даровавый, во ад сшедый и вереи вечныя сокрушивый, и во тьме седящим восход показавый, началозлобнаго же и глубиннаго (в глубине крыющагося) змия богомудростным льщением уловивый и веригами мрака связавый в тартаре и огни негасимом, и во тьме кромешней неисчетно сильною Твоею затвердивый крепостию, Великоименитая Премудросте Отчая, напаствуемым великий Помощник явивыйся и просветивый седящия во тьме и сени смертней, Ты, славы присносущныя Господи и Отца вышняго Сыне возлюбленный, присносущный Свете от присносущнаго Света, Солнце правды! Услыши нас, молящихся Тебе, и упокой души рабов Твоих, прежде усопших отец и братий наших, и прочиих сродников по плоти, и всех своих в вере, онихже и память творим ныне, яко в Тебе всех держава и в руце Твоей содержиши вся концы земли. Владыко Вседержителю, Боже отец и Господи милости, рода смертнаго же и безсмертнаго и всякаго естества человеческаго Содетелю, составляемаго же и паки разрешаемаго, живота же и скончания, еже зде пребывания и еже тамо преложения, лета измеряяй живым и времена уставляяй смерти, низводяй во ад и возводяй, связуяй в немощи и отпущаяй в силе, настоящая потребне строяй и будущая полезно управляяй, смертным жалом уязвенных воскресения надеждами веселяяй! Сам убо, Владыко всех, Боже Спасителю наш, Надежде всех концев земли и сущих в мори далече, иже в сей последний и великий спасительный день Пятидесятницы праздника тайну Святыя и Единосущныя, и соприсносущныя, и нераздельныя, и неслиянныя Троицы показавый нам, и наитие и пришествие Святаго и Животворящего Твоего Духа, в виде огненных языков, на святыя Твоя Апостолы излиявый и благовестники тех поставивый благочестивыя нашея веры и исповедники и проповедники истиннаго богословия показавый. Иже и в сей всесовершенный и спасительный праздник очищения убо молитвенная о иже во аде держимых сподобивый приимати, великия же подаваяй нам надежды ослабления от обдержащих скверн и утешению Тобою ниспослатися обдержимым ими: услыши нас смиренных и Твоих раб молящихся Ти и упокой души рабов Твоих прежде усопших на месте светле, на месте злачне, на месте прохлаждения, отонудуже отбеже всякая болезнь, печаль и воздыхание, и учини духи их в селениях праведных, и мира и ослабления сподоби их, яко не мертвии восхвалят Тя, Господи, ниже сущии во аде исповедание дерзнут принести Тебе, но мы живии благословим Тя и молим и очистительныя молитвы и жертвы приносим Тебе о душах их».

«Боже великий и вечный, Святый, Человеколюбивый, сподобивый нас в сей час стати пред неприступною Твоею славою на пение и хвалу чудес Твоих! Очисти ны недостойныя рабы Твоя и подаждь благодать, еже сокрушенным сердцем невозносительно приносити Тебе Трисвятое славословие и благодарение о великих Твоих дарех, яже сотворил еси к нам и твориши всегда в нас. Помяни, Господи, немощь нашу, и да не погубиши нас со беззаконии нашими, но сотвори великую милость со смирением нашим, да, греховныя тьмы избежавше, во дни правды ходити будем, и одеявшеся оружием света, ненаветно пребудем от всякия козни лукаваго и со дерзновением прославим о всех Тебе, единаго истиннаго и человеколюбца Бога. Твое бо есть истинное и великое воистину таинство, Владыко всех и Творче, временное решение Твоих тварей и еже по сих совокупление и упокоение во веки. Тебе благодарение о всех исповедуем, о входех наших яже в мир сей, исходех, иже надежды воскресения и жизни нетленныя по Твоему неложному обещанию предобручают (предначинают) нам, яже и приимем в будущем Втором Пришествии Твоем: Ты бо еси воскресения нашего Начальник, и поживших неумытный и человеколюбивый Судия, мздовоздаяния Владыка и Господь, Иже и приобщивыйся нам преискренно плоти и крове снисхождения ради крайняго, и за милосердие щедрот приемый наша страсти кроме греха, да волею испытавши я, и в немже пострадал еси Сам искусився, искушаемым нам быв самообещанный Помощник, темже и совозвел еси нас в Твое безстрастие.