Житие протопопа Аввакума, им самим написанное

Таже Пилатъ, поехавъ от насъ, на Мезени достроя, возвратился в Москву. И прочихъ нашихъ поборниковъ церковных многое множество погублено, ихже число Богъ изочтетъ. Чудо, какъ то в познание не хотятъ приити: огнемъ, да кнутомъ, да висилицею хотятъ вѣру утвердить! Которые то апостоли научили такъ? Не знаю. Мой Христос не приказал нашимъ апостолом так учить, еже бы огнемъ, да кнутомъ, да висилицею в вѣру приводить. Но Господемъ реченно ко апостоломъ еще: «Шедше в миръ весь, проповѣдите Евангелие всей твари. Иже вѣру иметъ крестится – спасенъ будетъ, а иже не иметъ вѣры – осужденъ будетъ». Смотри, слышателю, волею зоветъ Христосъ, а не приказалъ апостолом непокаряющихся огнемъ жечь и на висилицах вѣшать! Татаръской богъ Магметъ написалъ во своих книгах сице: «Непокарающихся нашему преданию и закону повелеваем главы их мечем подклонити». А нашъ Христос ученикам своим никогда так не повелѣлъ. И тѣ учители явны, яко шиши антихристовы, которые, приводя в вѣру, губятъ и смерти предаютъ; по вѣре своей и дѣла творятъ таковы же. Писано во Евангелии: «Не можетъ древо добро плод золъ творити, ниже древо зло плодъ добръ творити, от плода бо всяко древо познано бываетъ».