Житие протопопа Аввакума

Увы мне, осиротевшему! Оставиша мя чада зверям на снедение! Молите милостиваго бога, да и меня не лишит части избранных своих! Увы, детоньки, скончавшияся в преисподних земли! Яко Давид вопию о Сауле царе: горы Гельвульския, пролиявшия кровь любимых моих, да не снидет на вас дождь, ниже излиется роса небесная, ниже воспоет на вас птица воздушная, яко пожерли телеса моих возлюбленных! Увы, светы мои, зерна пшеничная, зашедшия под землю, яко в весну прозябшия, на воскресение светло усрящу вас! Кто даст главе моей воду и источник слез, да плачю другов моих?

Увы, увы, чада моя! Никтоже смеет испросити у никониян безбожных телеса ваша блаженная, бездушна, мертва, уязвенна, поношеньми стреляема, паче же в рогожи оберчеяна!* Увы, увы, птенцы мои, вижю ваша уста безгласна! Целую вы, к себе приложивши, плачющи и облобызающи! Не терплю, чада, бездушных вас видети, очи ваши угаснувший в дольних земли, их же прежде зрях, яко красны добротою сияюща, ныне же очи ваши смежены, и устне недвижимы.

Оле, чюдо! о преславное! Ужаснися небо, и да подвижатся основания земли! Се убо три юницы непорочныя в мертвых вменяются, и в бесчестном худом гробе полагаются, им же весь мир не точен бысть. Соберитеся, рустии сынове, соберитеся девы и матери, рыдайте горце и плачите со мною вкупе другов моих соборным плачем и воскликнем ко господу: «милостив буди нам, господи! Приими от нас отшедших к тебе сих души раб своих, пожерших телеса их псами колитвенными! Милостив буди нам, господи! Упокой душа их в недрех Авраама, и Исаака, и Иякова! И учини духи их, иде же присещает свет лица твоего! Видя виждь, владыко, смерти их нужныя и напрасныя и безгодныя! Воздаждь врагом нашим по делом их и по лукавству начинания их! С пророком вопию: воздаждь воздаяние их им, разориши их, и не созиждеши их! Благословен буди, господи, во веки, аминь».

Приложение

Житие протопопа Аввакума (Прянишниковский список)

Собрано вкратце из жития святаго священно мученика Аввакума протопопа, пострадавшего за святую православную християнскую веру, принуждением отца его духовного, инока Епифания Соловецкого, да незабвению предано будет дело божие; и сего ради написася сие на славу Христу, сыну божию и богу истинному, и богородице и святым его.

Аминь.

Начало книги сея бытия. Всесвятая троице, боже и содетелю всего мира! поспеши и направи сердце мое начата с разумом и кончати делы благими, их же ныне хощу глаголати аз недостойный; разумея же свое невежество, припадая, молю ти ся и еже от тебе помощи прося: господи, управи ум мой и утверди сердце мое не о глаголании устен служати си, но о разуме глаголемых веселитися и приготовитися на творение добрых дел, яже учюся и глаголю, да добрыми делы просвещен, на судищи десныя ти страны причастник буду со всеми избранными твоими. И ныне, владыко, благослови, да воздохнув от сердца, и языком возглаголю пиша сице: Дионисия Ареопагита о божественных именех, что есть богу присносущные имены истинные, еже есть близостные, и что виновные, сиречь похвальные. Сия суть сущия: сый, свет, истинна, живот; только четыре свойственных, а виновных много; сия суть: господь, вседержитель, непостижим, неприступен, трисиянен, триипостасен, царь славы, непостоянен, огнь, дух, бог, и прочая потому разумевай.

Того же Дионисия о истинне: се бо отвержение истины испадение есть; истинна бо сущее есть; аще бо истинна сущее есть, истинны испадение сущаго отвержение есть; от сущаго же бог испасти не может, и еже не быти несть.