Житие протопопа Аввакума

Он же Дионисий пишет о небесных силах, росписует возвещая, како хвалу приносят богу, разделялся девять чинов на три троицы: престоли, херувими и серафими, освящение от бога приемля, сице восклицают: благословена слава от места господня! И чрез их преходит освящение на вторую троицу, еже есть господства, начала, власти; сия троица, славословя бога, восклицают: аллилуйя, аллилуйя, аллилуйя! По алфавиту, аль отцу, иль сыну, уйя святому духу. Григорий Низский толкует: аллилуйя – хвала богу; а Василий Великий пишет: аллилуйя – ангельская речь, человечески рещи – слава тебе, боже! До Василия пояху в церкви ангельския речи: аллилуйя, аллилуйя, аллилуйя! Егда же Василий бысть, и повеле петь две ангельския речи, а третию, человеческую, сице: аллилуйя, аллилуйя, слава тебе, боже! У святых согласно, у Дионисия и у Василия; трижды воспевающе, со ангелы славим бога, а не четырежды, по римской бляди; мерско богу четверичное воспевание сицевое: аллилуйя, аллилуйя, аллилуйя, слава тебе, боже! Буди проклят сице поюще.

Паки на первое возвратимся. Третия троица – силы, архангелы, ангели, чрез среднюю троицу освящение приемля, поют: свят, свят, свят господь Саваоф, исполнь небо и земля славы его! Зри: тричисленно и то воспевание. Пространно пречистая богородица протолковала о аллилуйи, явилась Василию, ученику Евфросина Псковскаго. Велика во аллилуйи хвала богу, а от зломудрствующих досада велика, – по-римски троицу святую четверицу глаголют, духу и от сына исхождение являют; зло и проклято се мудрование богом и святыми. Правоверных же избави боже сего начинания злаго, о Христе Исусе, господе нашем. Ему же слава ныне и присно и во веки веком. Аминь.

Афанасий Великий рече: иже хощет спастися, прежде всех подобает ему держати кафолическая вера, ея же аще кто целы и непорочны не соблюдает, кроме всякаго недоумения, во веки погибнет. Вера же кафолическая сия есть, да единаго бога в троице и троицу во единице почитаем, ниже сливающе составы, ниже разделяюще существо; ин бо есть состав отеч, ин – сыновень, ин – святаго духа; но отчее и сыновнее, и святаго духа едино божество, равна слава, соприсносущно величество; яков отец, таков сын, таков и дух святый; вечен отец, вечен сын, вечен и дух святый; не создан отец, не создан сын, не создан и дух святый; бог отец, бог сын, бог и дух святый не три несозданнии, но един несозданный, не три бози, но един бог. Подобие: вседержитель отец, вседержитель сын, вседержитель и дух святый. Равне: непостижим отец, непостижим сын, непостижим и дух святый. Не три вседержители, но един вседержитель; един непостижим. И в сей святей троице ничтоже первое или последнее, ничтоже более или менее, но целы три составы и соприсносущны суть себе и равны. Особно бо есть отцу нерождение, сыну же рождение, а духу святому исхождение: обще же им божество и царство.

Нужно бо есть побеседовати и о вочеловечении бога слова к вашему спасению. За благость щедрот излия себе от отеческих недр сын – слово божие в деву чисту бого-отроковицу, егда время наставало, и воплотився от духа свята и Марии девы вочеловечився, нас ради пострадал, и воскресе, в третий день, и на небо вознесеся и седе одесную величествия на высоких, и хощет паки приитти судити и воздати комуждо по делом его. Его же царствию несть конца. И сие смотрение в бозе бысть прежде, даже не создатися Адаму, прежде, даже не вообразитися. Рече отец сынови: сотворим человека по образу нашему и по подобию. И отвеща другий: сотворим, отче, и преступит бо. И паки рече: о, единородный мой! о, свете мой! о, сыне и слове! о, сияние славы моея! аще промышляеши созданием своим, подобает ти облещися в тлимаго человека, подобает ти по земли ходити, апостолы восприяти, пострадати и вся совершити. Отвеща другий: буди, отче, воля твоя! И посем создася Адам, и прочая. Аще хощеши пространно разумети, чти Маргарит: Слово о вочеловечении; тамо обрящеши. Аз кратко помянул, смотрение показу я. Сице всяк веруяй в онь не постыдится, а не веруя осужден будет и во веки погибнет, по вышереченному Афонасию. Сице аз, протопоп Аввакум, верую, сице исповедую, с сим живу и умираю.