ANTOLOGIO

Dordogne nun divenis hema regiono di cirkum 20 000 tale nomizita

Anglosaxoni. Ita nombro povas inflar til 100 000 dum la somero. Multa de

li rezidas lore en la grandanombra gasteyi «bed and breakfast» jerata da

UR-ani, ube posiblesas selektar «bacon» ed ovi por dejunetar se onu ne

prizas le «croissant» (Franca paneti krecento-forma).

Eymet semblas pruvar ke esas posibla ad Angli e Franci pace kunexistar.

Ico, grandaparte, semblas debesar a la takto di enveninti quale Kevin

Walls, qua, dek semani pos apertesko di lua butiko, rezolvis tradukar la

nomo di lua komerceyo ube la maxim bone vendata produkturo esas

Walker Crips. «Antee ol nomesis The English Shop (La Angla Butiko) e me

opinionas ke ico esis kelkete neamikala a la lokani», il dicas dum

adjuntar ke altra butik-posedanti bonvenigis lu; ico ne esas tante

astoniva kande on saveskas ke homi venas de loki ye disto de du trafik-

hori por komprar «bacon» e «Shredded Wheat» tale atraktante personi

di ca regiono ad Eymet.

96

La Cricket Club di Eymet celebras lua 25ma aniversario cayare. Ita

esquado komencis plear sur la futbalo-tereno dil dicita urbo, ma la lokala

autoritatozi ofris a lu propra tereno por lua aktiveso. Se la balda lokala

elekto esos favoroza a la ekpatri-irinti, lore semblas versimila ke plusa

koncesaji grantesos a la Britaniana rezidanti. Ye la 9ma di marto

valideskos lego permisanta a ne-Franca civitani divenar membra dil

komonala konsilantaro. Kin resortisanti di Mikra Anglia esos pronta servar

lia adoptita urbo. La tri kandidati por l'ofico di komonestro, qui omna

esas Franci, kaptis la oportuneso havar Britaniani en lia esquado. «Ico

esas tre flatera invitesar ed ico esas granda signo di acepto» dicas Julian

Urriata, evanta 41 yari, veninta de Nordwest-London, qua kreis

prosperanta entraprezeyo en Eymet tri yari ante nun. En la sama situeso

esas Caroline Haynes retretinta notariino veninta de West-London.

Ensemble kun Urriata, el apogas la komonestral kandidato Jean-Raymond

Peyronnet, qua, se il elektesos, intencas organizar singlasemane

konsulto-dii jerata da lua du Angla konsilanti por helpar la Britaniana

komunajo pri la administrerial problemi e por instigar la kreo di bilingua

jurnali ed elektrofakturi. Tony Martin, evo 63 yari, komputator-vendisto,

opinionas ke ica evoluciono esas bona por ita parto de Francia. Plura yari

ante nun, il klozis lua entraprezeyo en Britania e venigis ad-hike lua

familio inkluzanta tri filii e tri nepoti. Il tre prizas icaloke la sekura stradi

e la bona skoli.

«Lo esas certa ke esas plu multa bona kozi kam mala kozi en Francia»,

ilu dicas. «Ni povas lernar multo de li en Unionita Rejio e, forsan, li povus

lernar kelke de ni qui habitas hike»

(Ek Kuriero Internaciona n°3/2007)

LA FANTOMIZITA DOMO

Fakti autentike travivita.

Olim, kande me esis tre yuna puero e mem ankore infanto habitanta en

la vilajo Rozérieulles, mea matro konoceskis ed amikeskis a yuna

muliero, samevanta kam elu, nomata damzelo Chacha. Ita damzelo

Chacha prenomizita Simone esis celiba ed habitis, kun lua vidva patro ed

olda onklino di qua la nomo esis Lea, bela anciena domo kun granda

gardeno florizita en tranquila ed izolita loko di la vilajo nefore de agri

97

ube on kultivis frukti saporoza (precipue fragi, cerizi, frambi, ribi) e de

proxima boski e kolini verda.

Damzelo Chacha invitis ni ofte, mea genitori e me, a lua domo por

komune repastar kun el e lua familiani. Ico eventis kustumale sundie. Ni

esis afable aceptata da le Chacha e mea genitori interparolis joyoze kun

lia nova amiki. Siorino Lea esis tre afabla ed espritoza homino qua savis

raportar vivoze pri la anciena tempi e mori quin elu travivabis. Pos la

repasto damzelo Chacha pleis piano por ni, nam el esis docistino pri

muziko e lua fratino esabis kantistino en Paris. Ita muzikala dotiteso esis

kelkete stranja, nam lia patro lor lua aktiveso-periodo esis profesionala

kukifisto. Cetere, lor nia rendevui, il koquis por ni delicoza kuketi.

Ma la tempo pasis e mea genitori chanjis lia lojeyo ad urbeto Moulins les

Metz. Le Chacha qui ne esis posedanti di lia habiteyo mustis anke

translojar a sat fora altra loko pro ke lia proprietero volis rekuperar sua

domo por lu e lua familio.

Mea matro tamen mantenis la kontakto kun lua amikino ed uladie – me

memoras ke esis en la yaro 1953 – damzelo Chacha invitis ni por pasar

semanofino en lua nova hemo. La rurala urbeto, ube nun el e lua parenti

habitis, esis ravisanta e charmiva domeno. Ica loko nomizita Marly esis

sat pekunioza urbeto borgezala, plu pleziva kam la vilajo Rozérieulles,

nam la ruro esis plu vasta, same verda e nelimizita per kolini. Enurbe, ni

povis trovar omna avantaji di urbo, quin la vilajo Rozérieulles posedis

nur skarse. Me memoras ke la komerceyi, precipue la mikra vendeyi, qui,

tatempe, ofris por komprado omnaspeca vari esis furnisata per bela