История татар. Том IV. Татарские государства XV-XVIII вв.

Ответ царьской к царю Шигалею. Государь же ему благочестивый отвеща: «царь господине, тобе, брату нашему, ведомо: много есми к ним посылал, чтобы похотели покою; и тебе жестость их ведома, каким злым ухищрением в многие лета лгали и сколко крови христианьские проливали; и Бог милосердый праведный суд показал нам, милосердие свое, а им мстил кровь христианьскую».

О въезде царьском в град. И повеле государь едину улицу очистити к цареву двору, от Муралеевых ворот, мертвых поснести; и едва очистили, и государь въехал в град. Пред ним ехали воеводы и дворяне многие да з животворящим крестом Андрей протопоп, а за государем ехал князь Владимир Андриевичь и царь Шигалей. И приехал государь на царев двор; воеводы же и вси людие православнии здравствоваша государю, и велиим гласом кликнута люди: «многа лета царю благочестивому победителю варварьскому! буди, государь, здрав на Богом дарованней тебе вотчине в векы!» И видеша православнии людие животворящий крест и царя благочестиваго в запустенной мeрзости Казаньской. Преже на том дворе нечестивые царие водворялися и многая кровь христианьская в много лет проливалася и много бед христиане приимали, ныне же въсиа на нем праведное солнце, самое древо животворящее, животворящий крест, и образ Владыкы нашего Христа и пречистыя Его Богоматере и великых чюдотворцов. И православный благочестивый царь, добрый страдалец, з братом своим князем Владимиром Андреевичем и со всем христианьскым воиньством и вси людие благодарение Богу воздаша и рекоша: «Благодарим Тя Владыку Христа, иже в нынешнем роде последнем сиа чудесная соделавша, в темном месте, в запусгенной мерзости свету твоему истинному въсиавшу, вместо сквернаго Магмета и его прелестников крест свой животворящий и образ свой пречюдный нам грешным покававшу, и иноплеменный род с царями их безвести сътворивше в един час. Слава Тобе, Царю Владыка нашь Христе, в Троицы славимый, давый нам такова государя христианом царя в последнее время, якоже прежних царей благочестивых, храбра и мужествена и в заповедех твоих живуща и благоразсудна, милостива и длъготръпелива съгрешающим и от врагов нас избавляюша». Царь же благоверный въздав хвалу Богу и приказал в град воеводам, велел огни гасити и многая сокровища Казаньская велел всему своему воиньству имати; на собя же государь не велел имати ни единыа медницы, ни плену, токмо единого царя Едигер-Магмета и знамена царьские да пушки градские; вся же сокровища Казаньская и жены их и дети велел всему своему воиньству имати. А сам государь поехал на свой двор за город, где преже стоял, и прииде в церковь Сергиа чюдотворца, много слез изливая [220] и Богу благодарная възсылая и с всем воиньством. И поиде государь к столу, и вся своя воя благодарными словесы утешая, и всех жаловати обещавается, и раненых воевод и всех воинов всякыми доволы учрежает.

О послании к Москве. И посылает государь к Москве, Божиа величиа чудесная дела възвестити, к своей царице Анастасии и ко отцу своему и богомолцу Макарию митрополиту и к брату своему князю Юрью Василиевичю боярина своего и дворецкого Данила Романовича Юрьева.

О посылке по улусом. А сам государь послал по всем улусом черным людем ясачным жаловалные грамоты опасные, чтобы шли к государю, не бояся ничего; а хто лихо чинил, тем Бог мстил; а их государь пожалует, а они бы ясаки платили, якоже и прежним Казаньскым царем.

Арьские люди прислали к царю государю бити челом. И прислали к государю Арьские люди бити челом казаков Шемая да Кубиша з грамотою, чтобы государь их черных людей пожаловал, гнев свой отдал и велел ясаки имати, как и прежние цари, и прислал бы к ним сына бояръского, хто бы им сказал царево жалованое слово, а их събрал, понеже он с страху разбежалися, и они бы, учиня государю правду, дав шертъ, поехали к государю. И царь и великий князь послал к ним сына боярьскаго Микиту Казаринова да Камая-мырзу Казаньского. А с Луговой стороны такоже Черемиса приехала к государю бити челом, и государь их пожаловал.

О священи града. Того же лета, Октября 4, город Казаньской вычистили от множества трупиа мертвыхъ, и государь поехал в град и изобрал место среди града и въдрузил на нем крест своима рукама царьскыма и обложил на том месте храм во имя пречистыя Владычицы нашиа Богородицы честнаго Ея Благовещениа. И пел молебен протопоп Андрей с игумены и священникы и святя воды; и поиде государь царь с кресты по стенамъградскым и освятя град во имя святыя и живоначалныя Троица, Отца и Сына и Святаго Духа, и пречистыя Его Богоматери и великых чюдотворцов.