История татар. Том IV. Татарские государства XV-XVIII вв.

О взорвании подкопа. И се прииде время литоргии чести святое Евангелие, солнцу уже въсходящу, и егда кончавше диакон и възгласи последнюю строку в Евангелии: „и будет едино стадо и един пастырь“, — и абие якоже силный гром грянул и велми земля дрогну и потрясеся. Благочестивый же царь из церковных дверей мало поступи и виде градскую стену подкопом вырвану, и страшна убо… зрением земля, яко тма, являшеся и на великую высоту въсходяще и многие бревна и людей на высоту възметающе поганых. Царю же благоверному на молитву уклонившуся, и се внезапу второй подкоп градцкую стену грознее перваго сътвори, и множество граждан на высоте являшеся, овем на полы прерваным, а иным же нозе и руце оторвани, и с великой высоты бревна падаше в град и множество нечестивых побиша.

И поиде воиньство царьское с всех стран на град. И вси воини православнии, Бога на помощь призвавше и кликнувше: [216] „Бог с нами“, а овем же „с нами Бог“, и со всех сторон вскоре устремишася на поганых. Татарове же в граде сквернаго своего Магмета лживаго и съветников его призывают к собе на помощь и говорят: „вси помрем за юрт“. И биющимся обоим в воротех и на стенах крепце, царь же благочестивый стоя в церкви и моля Създателя Бога, такжде и вси людие с великым вопом и плачем и стенанием сердечным призывая Бога на помощь, и се прииде некий ближний царев, глагола ему: „се, государь, время тебе ехати, яко бо убо биющимся твоим с неверными, а многие полкы тебя ожидают“. Царь же отвеща ему: „аще до конца пениа дождем да съвръшеную милость от Христа получим“. И се вторая весть прииде от града: великое время царю ехати, да укрепятця воини, видев царя. Царь же въздохнув из глубины сердца своего и слезы многи пролия и рече: „не остави мене, Господи Божемой, и не отступи от мене, вонми в помощь мою“. И прииде ко образу чюдотворца Сергиа и приложися к нему и любезно целова образ и рече: „угодниче Христов, помогай, помогай нам молитвами твоими!“ И причастися святыя воды и доры вкусив, тако и богородична хлеба, и литоргии скончанне бывши, и благословляет его отец его духовный изрядный Андрей протопоп животворящим крестом.

Поиде царь в полк свой. Исходит царь из церкви, молитвою въоружен, и обращься к своим богомолцем, рек: „меня благословите и простите, а вы безпрестанно Бога молите, а нам молитвою помогайте“. И вступает государь в бранное стремя и восходит на конь свой и поскору поиде х полку своему к граду. И виде государь знамена христианские уже на стенах градных, и приехал самодржец в полк свой и по всем странам посылает, утвержая воины. И видев вси люди, яко государь приближался к ним и мужествене храбрствует с ними, и в той час от всех стран, якоже на крылех, на стены градские възлетели, такоже и с стен в град, биющеся в всех местех жестоко.

Бысть сеча в граде Казани. К государю же от князя Михаила Воротыньского говорят, что Божиим милосердием люди царевы в граде биются с неверными, а государь бы им помогал. Царь же посылает головы из своего царьскаго полку, а велит пешим спешить и помогати своим, на конех бо невъзможно: теснота в граде великаа в хоромех, такожде и от множества людей. Головы же царьскые з детми боярьскыми мужествене нападают на иноверных, и биющеся царевы воини во всех местех от всех ворот мужествене, за руки имаяся, копии и саблями, в теснотах ножи режуще; во многих улицах с обоих сторон христианом и Татарам ударившеся во многи копиа и на мног час стояще на копиах, ни единым поступившим.