Избранные сочинения

Дѣлатель всякий плоды своя любит,
хранит, яко да всуе не погубит,
Да бы ся тѣми напредь ползовати,
нуждѣ пришедшей их употребляти.
5 Домовит бодрый вся нести в дом тщится,
что либо земных прижити случится,
Да в нужды время возможет имѣти
им же бы скудость скорбну одолѣти..
Сѣятель класы в жатву собирает,
10 блюдет, да ничто вотще погибает;
Прятает в гумнѣ, потом вземлет себѣ
на пищи нужду, елико есть требѣ.
И трудолюбный мравий зѣло тщится,
да в лѣто брашно к зимѣ готовится,
15 Им же ся, хладу пришедшу, питает.
Благо есть убо, кто плод собирает
Не токмо земный, но паче духовный,
ибо есть лучший плода вещна словный;
Трудники слова Павел почитает,
20 честь им сугубу дати увѣщает.
Сию ми ползу дадеся познати,
по щедрой бога жива благодати,
В юности верстѣ, егда отрекохся,
мира и в ризы черны облекохся.
25 Тѣмже что писах, тщахся то хранити,
зная, яко впредь может в ползу быти.
Бых же аз инок в четвертой седмицы
лѣт моих, токмо кромѣ единицы;
Негли же двѣ их языком учихся,
30 даже дидаскал быти сподобихся.
Писах в началѣ по языку тому,
иже свойственный бѣ моему дому.
Таже увидѣв многу ползу быти
славенскому ся чистому учити,
35 Взях грамматику, прилѣжах читати,
бог же удобно даде ми ю знати;
К тому странная сущи ей подобна,
в знания ползу бяше ми удобна.
Тако славенским рѣчем приложихся,
40 елико дал бог знати научихся;
Сочинение возмогох познати
и образная в славенском держати.
Писах книжная, яко же вѣтии
пишут и яко от вѣтий вящшии, —
45 Яже возможно будет созерцати,
елма бог даст я миру показати.
Днесь не являю ради завидящих,
их же не знают пред людми хулящих,
Иже в то время не будуть хулити,
50 егда ми даст бог мир духом лишити.
Тогда бо ревность и зависть престанет,
а кождо суду божию предстанет
За рвение си должну мзду прияти.
Но ты даждь, боже, здѣ всѣм ся каяти,
55 Да о зависти сей никто судится,
но всяк во любви сущь тебѣ явится.
Писах и рифмы многи, той я знает,
кто „Многоцвѣтный вертоград“ читает,
Мною сложенный, и псалмы святыя,
60 яже сведох вся в метры славенския.
Особно сия книга есть списанна,
не во едино лѣто начертанна;
В различных лѣтѣх многи нужды быша,
яже ми сия писати бѣдиша, —
65 Яже в старости могут в ползу быти,
егда не лѣть ми будет ся трудити;
От труд готовых мощно будет взяти,
аще ми даст бог старости дождати;
Днесь бо точию лѣто совершаю,
70 еже писменем „наш“ <50> право считаю.
Нужд же тѣх вещи хощеши ли знати,
оглавление изволи читати;
В нем ти всякая нужда изъявится
и лист, на нем же лежит, объяснится.
75 Да даст же господь здраву ти читати,
яже потщахся здѣ аз написати
И юным твоим в науку даяти,
да возумѣют чинно глаголати
В славу божию, такожь святых его,
80 в научение возраста своего.
Ползу ти сими прияти желаю,
а любовь твою тощно умоляю:
Да аще нѣчто погрѣшно узриши,
то ми простити возблаговолиши,
85 Вѣдая, яко не от злобы тое
погрѣшение, здѣ есть внесенное,
Но или яко не успѣх познати
или в памяти не могох держати;
Ина списатель преступно писаше,
90 их же не узрѣ бренно око наше.
Церкви согласно вся тщахся писати,
противных во ум не мыслих пущати.
Тѣбѣ аще что противно явится,
любовь не скоро судити да тщится:
95 Мощно и тебѣ есть нѣких не знати,
изволи ума словес поискати.
Аще же весма что не согласится,
молю, тобою то да исправится;
За любовь господь сие вмѣнит тебѣ,
100 юже на земли возмездит и в небѣ.
Чесого вѣрно аз тебѣ желаю,
святым молитвам твоим ся вручаю, —
Помоли о мнѣ всещедраго бога,
да мя не лишит небесна чертога,
105 Даст же с аггелы вѣчно в нем ми жити,
где бог и тебѣ да даст выну быти.