Избранные сочинения

Псалми святии царя велика суть дѣло,
паче духа святаго повѣствую смѣло, —
Ибо егда Давид я усты провѣщаше,
иже на Израилско царство избран бяше,
5 Самѣм господем богом бысть он умудренны,
пророчествия даром дивнѣ исполненны
От духа пресвятаго, иже наставляше
его на глаголы си, он же я пояше;
Орудие словесно бѣ духу святому, —
10 бяше бо муж по сердцу богу истинному.
Царь небесный земнаго на то умудрил есть,
тайны сокровенныя чрез него явил есть:
Ибо книга си Псалтир тѣми исполненна,
честна, мудра и свята, вся есть божественна.
15 Толико же полезна церкви сотворися,
даже нужднша от солнца быти извѣстися;,
Иоанн Златоустый елма прошен бяше:
„Егда Псалтир престати чести подобаше?“ —
Рече: „Уне есть солнцу в течении стати,
20 нежели псалмов святых вѣрным не читати“.
Тѣмже я церковь мати по вся дни читает,
во всяких си пѣниих их употребляет.
Полезно же и в домѣх оны честно пѣти, —
но без глас подложенных трудно то умѣти.
25 И разум сокровенный спону содѣвает, —
чтый бо ли поющ псалмы со трудом той знает.
Тѣм во инѣх языцѣх в метры преведени,
разумѣти и пѣти удобь устроени.
Им же аз поревновах, тщахся тож творити,
30 в славенском диалектѣ в мѣру устроити,
Да ся от чтущих удобь уразумѣвают
и в подложенных гласѣх сладцѣ воспѣвают.
И помощию бога дѣло совершися, —
се бо Псалтир метрами ново преложися.
35 Нѣции прежде мене негли начинаху,
но за трудности многи от дѣла престаху;
Аз, богом наставляемь, потщахся начати,
бог же даде и концем дѣло увѣнчати.
Еже яко первое в метры преложенно,
40 подобаше да будет первому врученно
В православных ти сущу, пресвѣтлѣйший царю,
ты даждь мѣсто у тебе сему нову дару:
Прежде царем Давидом от духа строенну,
днесь рабом ти в славенский рифмы преведенну.
45 Под трудами Давида мой аз полагаю,
мой Давидовых ради труд прийми желаю.
Он, царь, о тебѣ, царѣ, молит бога в небѣ,
аз, раб царя сил и твой, здѣ молю о тебѣ:
Да многая ти лѣта изволит подати,
50 здравие, мудрость, славу враги побѣждати.
Юн Давид Голиафа силнаго преможе,
даждь ти, юну, силнаго турка збити, боже, —
Сего ти, богомолец твой, вѣрно желаю,
милости царстѣй труд сей и сам ся вручаю.

Твоего пресвѣтлаго царскаго величества

раб смиреннѣйший и присный богомолец

Симеон Полоцкий иеромонах недостойный.

<ВТОРОЕ ПРЕДИСЛОВИЕ К „ПСАЛТЫРИ РИФМОТВОРНОЙ>

ПРЕДИСЛОВИЕ К БЛАГОЧЕСТИВОМУ ЧИТАТЕЛЮ