Избранные сочинения

Благочестивый книги читателю,
во писаниих жизни искателю,
Молю тя, здравым умом да судиши
труд, иже в книзѣ предлежащей зриши, —
5 Не слов измѣну тощно разсуждая,
но в тѣх разума единство лобзая.
Псалтирь се царя купно и пророка
Давида свята, тайна в ней глубока:
Иже дух святый оному сказаше,
10 та пророчески в псалмѣх он писаше.
Всякая служба тѣми украшенна
во церкви святѣй: вся в них божественна.
Без псалмов церкви не возможно быти,
яко без воды рыбѣ не лѣть жити;
15 Та в своем чинѣ, яко преведенна
древле, во церкви да будет храненна.
Тужде аз рифмы тщахся преложити,
не дабы тако в церкви чтеннѣй быти,
Но еже в домѣх часто ю читати
20 или сладкими гласы воспѣвати
Во славу богу, — ибо услаждает
рифм слух и сердце: чести понуждает.
Коль же есть лучше сию прочитати,
неже в суетах время погубляти,
25 Знает то кождо, а то извѣщаю,
поелику сам спастися желаю, —
Яко аще здѣ зрится ново дѣло,
обаче разум псалмов хранит цѣло;
Толк слова мѣнит, множит, уменшает,
30 подобнѣ в рифмѣх нужда содѣвает.
Само сущее в церкви цѣло тебѣ, —
здѣ метафразис к домашнѣй потребѣ.
Во мнозѣх мѣстѣх толк здѣ положися,
еже во сущем глубоко сокрыся.
35 Тѣм не дивися, видя ино слово, —
разум един есть, речение ново
Свѣтлости ради ли за нужду мѣры:
толк отверзает сих сокровищ двери.
Не слушай буих и ненаказанных,
40 в тмѣ невѣжества злобою связанных,
Им же обычай все то обхуждати,
егоже господь не даде им знати.
Не буди общник расколы творящым,
всю мудрость в себѣ заключенну мнящым,
45 А в самом дѣлѣ пребезумным сущым,
упором своим в погибель текущым.
Ни завидящым подражатель буди,
им же чуждии сердце гризут труди,
Иже благая за зависть хухнают,
50 совѣсть поправше, вся уничижают.
Но буди правый писаний читатель,
не слов ловитель, но ума искатель.
А всяко полза имать быти тебѣ,
токмо прилѣжно разсуждати требѣ.
55 Вѣждь же и сие, яко псалми сии
от древних времен писани святии
Стихов мѣрою, от муж умудренных,
добрѣ еллинским книгам изученных.
И во прочиих суть стихотворени
60 языцѣх честных и святи вмѣнена.
Ревнуя убо, тщахся написати
нашим славенским, в рифмѣх миру дати.
Тѣм благодарно прими труды сия,
иным обычны, в России новыя.
65 Чти, пой разумно, хвали ими бога,
от него же мзда будет тебѣ многа.
И за мя, грѣшна, ему помолися,
хулником уста заграждати тщися.
Защищай добро, бог защитник тебѣ
70 даст здѣ вѣк долгий и вѣчность на небѣ,
Ея же вѣрно аз тебѣ желаю,
милости твоей сам ся поручаю.

<ПРЕДИСЛОВИЕ К „РИФМОЛОГИОНУ“>

ПРЕДИСЛОВИЕ КО БЛАГОЧЕСТИВОМУ ЧИТАТЕЛЮ