Книга об Антихристе и о прочих действах иже при нем быти хотящих

На сем месте нецыи ныне не точию антихриста не пришедша не познавают, но наипаче утверждают, акибы от сих 1666 лет стоим уже на брани с самим диаволом. Стоим убо на брани с диаволом не от сих лет токмо, но во все время жития нашего, якоже рече апостол: «Несть наша брань к крови и плоти, но к началом и ко властем, к миродержителем тмы века сего, к духовом злобы поднебесным» (Ефес., 6, 12). И паки тойже глаголет: «Оружия воинства нашего не плотская, но сильна Богови на разорение твердем» (2 Кор., 10, 4). И Петр апостол глаголет: «Трезвитеся, бодрствуйте, зане супостат ваш диавол, яко лев рыкая, ходит, искии кого поглотити» (1 Петр., 5, 8). А о сем речении, «аще кто достигнет тех времен на брань с самим диаволом», подобает разумети, которых тех, не сих 1666, но тех, сиречь самых последних времен, хотящих быти при самом том антихристе, тогда бо с самем сатаною очевидно братися имут, по сказанию святаго Кирила Иерусалимскаго и Стефана Зизания, о чем подробнее будет сказано ниже во главе 17-й. Тако и сей учитель, то есть списатель «Книги о вере», тоже сказует: по внегда бо рещи ему римлян и унитов от восточнаго православия отпадение, и нам того на сие 1666 число опасение: потом и оная времена, по сих хотящая быти, на брань с самим диаволом, наскоре предложи. На подобие то, якоже во Евангелии, егда рек Господь своим учеником о разорении Иерусалима, и тогда внезапно абие о антихристе беседует, глаголя: «Тогда аще кто речет вам, се зде Христос или онде, не имите веры». От толкования: «А еже тогда, не помышляй, яко егда вышереченная о Иерусалиме будут, но веждь, яко свое есть писанию се: якоже и Матфей по рожестве Христове глаголет: во днех онех прииде Иоанн. Которых днех: убо еда ли по рожестве Христове? Ни: но нарочно. Тако убо и зде глаголет тогда: не егда Иерусалим запустеет, но по временем пришествия антихристова» (Благовестник, от Матфея, зач. 99 и от Марка 60). Еще же и в беседах евангельских сказуется: «На горе Елеонстей седящу Исусу, и о иерусалимском запустении и о пришествии Его ученицы Его уведети искаху. Весте же разстояние времен: рек бо о разорении Иерусалима, и соверши о сем слово, и имея о скончании мира глаголати, приведе: тогда сия будут» (на Матфея беседа 10). Тако и зде глаголет, аще кто достигнет тех времен, рекше самых последних, приближенных уже дневи втораго пришествия Христова. Или иносказательне может и сице разуметися: понеже святая соборная и апостольская Церковь Духом Святым провиде большую брань, хотящую быти от диавола на сия времена 1666 лет, сиречь наибольшее смятение и развращение, соблазны и размешение в вере и человецех. Того ради, яко чадолюбивая мати, заранее о сем предсказует своим чадом, якоже чрез прочих священных учителей, тако и чрез сего опасатися повелевает, дабы внезапу что не пострадати. Сиречь опасне блюстися развращений и новизн от Рима или от инуду негде грядущих, но пребывати непозыблемо в древлеправославных святоотеческих содержаниях.

Однако видится, яко не с тем тако предает, акибы по исполнении сих 1666 лет абие начнется самосущественное царствование антихристово, сего не глаголет, но сице рече: тогда не непотребно и нам опасение имети, да не некое бы что зло пострадати по преждереченных. Сиречь, подобает опасатися, дабы такожде не пострадати, якоже и преждереченнии римляне и литовцы, тии бо воистину пострадали, ибо по отступлении от восточныя Церкве впадоша во многоразличныя развращения и ереси. Такожде по сему проречению и зде в Белицей России на сия лета нечто немало пострадали, зане же древлеправославныя святыя книги от церквей аки непотребны изнесши, в тех место новыя приняли, в них же обретаются на мнозе некия нововводныя чины же и уставы, и несогласия со староцерковными святыми книгами, противности же и порицания древлецерковным православным содержанием.

Темже убо яве есть, яко долженствует до сего точию оное проречение относити, а не самого антихриста пришедша на сия лета помышляти. Ибо якоже выше во главе второй книги сея показахом, яко отступление, или нечестие, или ереси не суть антихрист, но сия ино есть, и просто ереси, ино же антихрист. Тако и сей списатель «Книги о вере» явственно сих разньство показует, о антихристе сице глаголет: «А той антихрист человек будет, и родится, якоже глаголет Ипполит Римский, от девицы нечистыя, жидовки сущия от колена Данова». А о ересех рек, яко «по исполнении лет числа 1666 не непотребно и нам от сих вин опасение имети, да не некое бы что зло пострадати по преждереченных». Преждереченнии же кое зло пострадали? Убо ли яко антихрист в то время по тысящи лет к ним прииде? Ни: сам бо выше рек, не яко тогда уже прииде, но родитися ему и быти в будущее время глаголет. Темже кое зло они пострадали, явственно сказует, яко от восточныя Церкви отступили: такожде и зде в России на сие реченное время таковаго же некоего зла опасатися повелевает, еже и бысть, якоже рехом.