Книга об Антихристе и о прочих действах иже при нем быти хотящих

И якоже убо сии вышереченнии святии отцы к сим же и прочий, паче же и пророцы и апостоли глаголют. Яко близ день Господень, и яко конец пришел есть, и настоит судище страшное, и прочая. Зряху бо они, якоже речеся, будущая аки настоящая. Тако и Иоанн Богослов глаголет: «Дети, последняя година, и последний час есть». Аще же бы тогда уже во время пророков и апостолов конец пришел есть, и беяше последняя година и последний час, и настояло судище страшное, то что бы было доселе? И како продолжися оттоле и даже доныне мирское стояние и век человеческий: и не бысть разрушения и кончины и втораго пришествия Христова даже и до днесь? Темже отсюду познаваем, якоже святии пророцы и апостоли, тако и сей, рекше Иоанн Богослов, зря будущая яко настоящая, и дальняя яко близ сущая, и оттоле даже до скончания мира все настоящее житие вменяет, аки едино лето, или аки един час, противу неисчетной безконечности жизни будущия, тако рек: зане же един день пред Господем, яко тысяща лет, и тысяща лет яко день един. Темже и святый Иоанн Златоустый все житие настоящее за едино мгновение полагает (нравоучение 9-е на 1-е послание к Коринфом и нравоучение 2-е на послание к филиписеом). Подобно и прочий святии о краткости жития сего и приближения кончины и втораго пришествия Христова глаголют. Однако видится, яко не с тем, аки бы толь кратко житие се, или аки бы тогда уже приближися скончание мира и второе пришествие Христово, но противу жизни будущаго века толь кратко житие се, егоже они за ничто вменивше, а будущее житие и второе Христово пришествие всегда пред очима аки близ имуще, тако глаголют, якоже выше речеся. И се есть сказание первое о последней године и о последнем времени и часе.

Другое же сказание сицево есть: егда святии апостоли глаголют «дети, последняя година» и паки, егда прииде кончина летом, и прочая подобная сим, то от сих ясно показуется, яко и тогда при воплощении Христове и при апостолех уже бе последняя година, или лето, сиречь последнее время. Темже егда убо услышим глагол о последнем времени настоящих ныне лет, то не подобает помышляти определенное некое время, кончину мира сего являющее: но разумети достоит о времени неопределенном, понеже сугубо разумение имать время последнее. Есть убо время последнее определенное, егоже предел всем есть известен, яко всякое лето, всякий месяц, всякий день и час определены суть времена и кончина их. Ино же есть время последнее неопределенное, егоже кончины ведати невозможно. Тако егда видим человека состаревшася, глаголем, яко человеку сему последнее уже время: аще же и вемы, яко последнее, обаче неопределенное, ибо не знаем известно, когда той состаревшийся скончается. Тако подобает разумети и о последнем времени мира сего. От рожества убо Христова, и от времен святых апостол наста последнее время, но та кончина и последнее время отнюд неопределенно. Сего ради весь век мира сего, от начатка его и даже до скончания, изобразуется от любомудрых веком жития единаго человека. Понеже человек в божественном писании нарицается мир вторый и мир малый, зане вся в нем обретаются та, яже имать мир великий. Сей же мир малый, сиречь человек, имеет три степени: юность, мужество и старость. Тако и великий сей мир имеет три степени, яже суть три закона. Первый закон естественный, от Адама даже до Моисея, и се есть юность мира. Вторый закон Моисеов от Моисея даже до Христа: и се есть мужество мира. Третий закон евангельский, сиречь новая благодать: и се есть мира старость, и последняя година, о ней же рече святый Иоанн Богослов: «Дети, последняя година есть» (о трех законах зри в Благовестнике, от Луки зачало 70, л. 141).

Еще же и инем образом изобразуется. Сей убо малый мир, сиречь человек, имать пять степеней, сиречь пять времен, по нихже шествуя от единаго в другое преходит даже до скончания своего. Первое время – младенство, второе – отрочество, третие – юношество, четвертое – мужество, пятое – старость. Тако и великий мир, или век сей, имать пять степеней, сиречь пять времен, от нихже от единаго в другое преходит, шествуя до скончания своего. Первое время – от Адама до Ноя, и се есть младенство мира. Второе – от Ноя до Авраама, и се есть отрочество мира. Третие – от Авраама до Моисея, и се есть юность мира. Четвертое – от Моисея до Христова перваго пришествия, и се есть мужество мира. Пятое – в самое пришествие и оттоле даже до скончания, и се есть мира старость и последнее время, сиречь последняя година, о ней же рече святый Иоанн Богослов: «Дети, последняя година есть» (о пяти временах века сего зри в Большом Соборнике на листу 684-м).