Книга об Антихристе и о прочих действах иже при нем быти хотящих

В первом знамении показахом от пророка Даниила, како яви ему Дух Святый четыре великая царства, иже едино по другом преемствовати хотяща до скончания мира. Сие же открыся ему образом четырех зверей из моря исходящих. В сем же знамении показати потщимся явление единаго зверя, рекше четвертаго, яко и достойно, рече убо Даниил: «Видех и се зверь четвертый, горд и страшен, и крепок излиха, зубы его железни и велии, и ногти медяни, ядый и отончевая, останокже ногами попираше. Тойже различаяся излиха паче всех зверей прежних, и рогов десять ему, и смотрих в розех ему, и се рог другий мал взыде пред ними». Ниже: «И се очи, аки человечи в розе том, и уста глаголюща велика». В тойже главе толкуя ему, о сем ангел глаголет: «Зверь четвертый – царство четвертое есть на земли, еже преспеет вся царства, и пояст всю землю, и поперет ю, и посечет ю. И десять рог ему – десять царей востанет, и по нем востанет другий, иже преспеет злобами вся» (Даниил, гл. 7).

Святии отцы Ипполит папа римский, Кирил Иерусалимский и Иоанн Дамаскин, во свидетельство своих писаний приемлюще от сея главизны пророчества Даниилова, и сего единонадесятаго царя, виденнаго во образе единонадесятаго рога, разумеют быти самого того антихриста, объявитися хотящаго в римстем начальстве, показанном пророку во образе четвертаго зверя горда и страшна, о немже пространно сказано и в первом знамении. Откуду ясно показуется, яко зверь четвертый горд и страшен, се есть четвертая монархия, или единовластительство римское. Рог оный малый возшедший пред ними, се есть антихрист, иже от мала и худа и безславна рода востати хотящий. Понеже антихрист царствия не будет отчичь и дедичь наследник, но прелестный и лукавый восхититель.

О сем глаголет Даниил пророк во главе 11-й: «И не даша нань славы царства, и приидет со обилием и соодолеет царству лестьми». И преподобный Иоанн Дамаскин глаголет: «Народится рече из блуда, и воспитается тайно, и внезапу привостанет и восцарствует» (книга 4, гл. 27). И святый Кирил Иерусалимский пишет, глаголя: «Не от царей ни от царска рода воздержит царство, но прелестию восхитит власть» (знамение 10). «Егда же исправится царство ему, абие убиет три цари великия, египетскаго, ливийскаго и ефиопскаго» (Ефрем и Ипполит об антихристе). О сих святый Андрей во Апокалипсисе сказует глаголя: «Сии десять рог и Даниил виде, сиречь царей пред антихристом идущих, от нихже триех искоренит, а прочая под ся покорит проклятый» (гл. 17, зач. 54). О сих и Стефан Зизаний учитель церковный глаголет: «Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою со иными седмию цари достанет» (Книга Кирилова, знамение 9).

Понеже егда антихрист трием вышереченным царем одолеет, сиречь египетскому, ливийскому и ефиопскому, тогда и прочий царие покорятся ему. Таже вознесется сердцем на всякаго человека, не точию же, но и на Бога хульная речет, помышляя окаянный, яко царь будет даже до века (Соборник, гл. 8). И оттоле антихрист начнет быти монархом, рекше единовластвующим всея вселенныя обладателем. О сем монаршестве антихристове, яко быти ему по образу августа кесаря, сказует и святый Андрей во Апокалипсисе, во главе 13-й, зачало 36-е. Подобно и святый Григорий Богослов в книзе своей во главе 47-й повествует. Тоже и святый Кирил Иерусалимский в знамении 10-м книги своея пишет. И святый Иоанн Златоустый в беседах апостольских глаголет: «Якоже бо иже прежде сего разоришася царствия, сиречь мидское от вавилонскаго, вавилонское от персскаго, персское от македонскаго, македонское от римскаго, тако и сие от антихриста, а он от Христа» (2 Сол., беседа 4). Зде Златоуст святый антихристово царствование сравнивает с вышереченными царствами и глаголет быти антихристово царствие последующее римскому, якоже римское греческому, греческое персскому, персское асирийскому. Ельма же оная царствия бяху чувственны и бяху монархиями: яве есть, яко и антихристово царство хощет быти чувственное, и будет монархиею, и никим же упразднитися имать, точию Самем Господем Исусом Христом на суд грядущим. И о сем апостол вещает глаголя: «Егоже Христос

Исус убиет духом уст Своих, и упразднит явлением пришествия Своего» (2 Сол., зач. 275).