Книга об Антихристе и о прочих действах иже при нем быти хотящих

Возвратимся паки на преждереченная. Святый Ипполит нрав и действа антихристова показует, глаголя: «В первых бо его родится кроток, тих, любезен, благоговеин, миролюбив, ненавидя неправду, не приемля мзды, идолослужения отвращаяся, писания любя, и прочая. Таже и чудеса сотворит, прокаженныя очистит, разслабленныя воздвигнет, бесы изгонит, о дальних яко о настоящих известит, мертвыя возставит, вдовицам поможет, и прочая. И сия сотворит, яко льстив сый и лукав, и всех хотя прельстити, во еже сотворити его царя. И егда видят его людие и народ толикия добродетели его и таковыя его силы, вси вкупе единым разумом соберутся, во еже сотворити его царя». Ниже: «Исперваубо льстивне прием ложь беззаконный, отречется славы своея. Человецы же пребудут моляще его, и поставят его царя, и по сих вознесется сердцем», и прочая. Ниже: «И спеша воврещи в погибель весь род человеческий, умножит знамения ложная. Людем бо всем, восхваляющим его мечтаний ради, воззовет гласом крепким, яко поколебатися месту, в нем же множества тому предстоят: разумейте людие, колена и языцы мою великую власть и силу, и крепость моего царства, кто силен якоже аз? Кто бог велий разве мене? Кто власти моей сопротиво станет? Представит горы пред очима зрящих, шествует по морю не мокрыми стопами, сведет огнь с небес, сотворит день тму, а нощь – день: солнце бо преобратит аможе хощет, и луну такожде. И единою просто вся стихия землю и море силою мечтаний своих пред зрящими покажет послушны». Ниже: «Тажде повеления его скверный на кииждо град послет, и взаконения во всех странах, с бесы же и с чувственными человеки глаголюща, яко царь велий явися по всей земли: приидите вси и видите крепость его и силу», и прочая. Ниже: «Уведесте ли козни льстиваго, како всячески хощет отставити ум человеком? Бесы же покажет яко ангелы света, и воинства безплотная приведет, имже несть числа, и пред всеми покажет себе на небо вземлема с трубами и гласы и звуки неизочтенными, и воплем крепким, восхваляющим его неисповедимыми песньми, и возблистается яко свет, иже тме начальник: и когда убо якоже на небеса возлетит, когда же на землю сходит со славою многою, когда же яко ангелом бесом заповесть творити повеления его со многим страхом и трепетом».