Книга об Антихристе и о прочих действах иже при нем быти хотящих

Преподобный Ефрем в книзе своей глаголет: «Изреку с болезнию, и возглаголю с воздыханием о настоящем мира скончании, и о змии безстуднем и лукавем, хотящем возмутити всю поднебесную, и вложити страх и пренемогание и люто неверование в сердца человеком, и творити знамения и чудеса и страхования, яко да возможет прельстити и избранныя, и уклонити в ложная знамения и чудеса привиденьми, бывающими от него, по попущению святаго Бога приемлет область антихрист прельстити весь мир, зане умножися нечестие в мире, везде и повсюду злая содевают. Тем убо Пречистый Владыка духом лестьчим хощет искусити весь мир, за нечестие их послабит. Понеже сами тако восхотеша человецы Бога отступити, а неприязнь прияти. Велик подвиг братие во времена она на всех человецех, паче же на верных, егда будут знамения и чудеса от самого змия со многою областию. Егда паки себе являет яко бога в привидениих страшных, на аер летяща, и вся демоны во образе ангельстем летяща со страхом пред мучителем, и возопиет бо крепко, изменуя образы, устрашити хотя без числа вся человеки. Прием бо безстудный область, демоны послет на вся концы земныя, яко да проповедят всем, яко царь велик явися со славою, приидите вси и видите». Ниже: «Не сам же родится сатана, но во образ его приидет прескверный, яко тать лжею говения, хотя прельстити вся человеки. Смирен же и молчалив являяся, яко и се рещи, ненавидя неправду, и отвращаяся идол, почитая же благоверие, и прочая. Над всеми же сими чудеса сотворит и знамения, и страхования со властию многою». Ниже: «Егда бо узрят его людие мнози и народи толика его добродейства, красотою же и силою суща утворена, вси вкупе во единой воли будут, и с радостию великою поставят его царя, глаголюще сами к себе: где убо ин обретается толик человек благ и праведен». Ниже: «Потом же выше меры вознесется сердцем, уже не яко говеин являяся, уже не яко нищелюбец, уже не тих, но всегда от всех яр, нагл, гневлив, и прочая. Чудеса множа страшная, лжею и неправдою се являя. Тацем же коварством преставит горы привиденьми ложными, а не истиною. Народом убо предстоящим и людем многим славящим его за привидения, и возопиет гласом крепким, яко подвизатися и месту, на немже народи предстоят ему. И глаголет со дерзновением: разумейте вси людие великую силу моея области, се пред всеми вами хощу горе оной велицей сущей обои пол моря, да прейдет со онаго полу моря глаголом моим семо ныне к нам. И речет скверный, тебе велю горо, ныне прейди на сию страну моря: и абие потечет гора во очию всем видящим, а не подвигнувшися ей отнюд от оснований, яже Бог вышний утврди и вознесе. Сим бо прескверный области не имать, но весь мир прельстит привиденьми и чары волшебными. Паки же друзей горе, стоящей во глубине великаго моря, острову зело велику велит изыти и на сусе стати в красный позор видящим, острову же не двигнувшуся отнюд, яко гора на сусе, абие оток бывает. Паки тойже змий прострет руце свои и соберет множество гад и птиц, и пойдет верху бездны, яко посуху, привиденьми льстит всяческая. И мнози веровати имут, и славити его начнут яко бога крепка» (слово 105).

В синоксаре в Неделю мясопустную о втором пришествии Христове глаголет: «Преди же Его пришествия приидет сопротивник Христу, и походит негли по Христе, проходя житие, и чудеса сотворит, елика убо и Христос содея, и мертвеца воскресит, обаче по привидению вся содеет». Ниже: «И все сатанино действо подъимет, и напрасно востанет и угодит людем, негли и божественная писания пройдет, и посту навыкнет, и понудится от человек, и царь проповесться».

Святый апостол Павел глаголет: «И тогда открыется человек беззаконию, сын погибели, противник, и превозносяйся паче всякаго глаголемаго бога или чтилища, яко ему сести в церкви Божии, аки богу, показуя себе яко бог есть» (2 Сол., зач. 275). От толкования в Толковом Апостоле. «О антихристе зде беседует». Ниже: «Сей превознесется своею гордостию не токмо на всякаго глаголемаго бога, но и на идолы: не аки ко идолослужению приведет человеки, но тому самому поклонитися, и повелевати себе за бога почитати». Апостол: «Яко ему сести в церкви Божии, аки богу, показуя себе яко бог есть». Толкование: «Не токмо во Иерусалиме, но и в церквах Божиих, и не рече глаголюща, но показуя, сиречь покушаяся показати и делы, и знамении, и чудесы». И в беседах пишет, глаголя: «И открыется человек, рече, превозносяйся паче всякаго глаголемаго бога или чтилища. Не бо во идолослужение введет он, но богопротивен некто будет, и всех разорит богов, и повелит кланятися себе вместо бога, и сядет в храме Божием, не иже во Иерусалиме, но и в церквах, показуя, рече, себе бога, не рече глаголюща, но покушающася показати: ибо дела велия соделает, и знамения покажет чудна».