Первая Ливонская война, 1480–1481 годы. Документы

Unssen vruntliken grot stedes thovoren. Ersamen, leve her borgermester. Wi don iw vruntliken tho weten, dat wi al hir tho Witensten sin dem heren kumpthur gevolget van Wessenberge etc. Item up dessen dach vor maltit quemen breve van dem heren meister van Karxk tho der Pernow tho, unde was begeren[de], dat de kumpthur van Revel mit uns unde mit al der macht solde sik bi em vogen tho Karxk densulven wech vorschreven. So vorbadede de kumpthur vor sick al de Harlen unde Wirlen unde gaff en dit vor. Do seden se, se weiden dessen ort vorwaren unde en dachten, dar nicht hen tho volgen. In deme so quam en breff van dem vagede van der Narwe. De schrift, dat de van der wolde[n] sin rede mit 600 man unde willen inslan bi dem Neien Slate. Do de breff wart gelesen, do wart de vaget van Wesenberge up der stunt rede mit den Wirlen unde sloch wedderumme na Wessenberge. So is de kumpthur alhir mit unssem bisschop unde mit den Harlen unde wi mit unssen hupen so lange alhir tho bliven, wen de here meister schrift eft enbut. De meister schrift in sime breve, dat de heren em gene breve, mer schriven solen, besunder bi erne wissen baden em tho in(t)beden. So is hir van der heren wegen utgesant an dem meister tho Karxk Kersten Thodwen mit werven. Wen he eft en ander dat antwort wedderumme bringet, so werde wi enwor, wor wi echt hin solen, dat uns en lank kerkwech werden wil unde hir grot geltspildinge up lept unde gen voder bekamen konen, wor wi hen volgen. Dar heft de kumpthur unde die havelude enen dach, de Maienstede ingenamen. Se hebben al ver rider unde navorer, der wi nicht enhebben etc. Ersame, leve her borgermester, so is unsse vruntlike bede unde beger, gi it so wilt vogen, dat gi uns entsetten mit vitali unde mit gelde, jo bi namen mit bere unde brode, des wi sodant mit gelde nicht bekamen konen. Hir wilt up vordacht sin unde mit dem rade over spreken, dat wi vorsorget werden. Schut des nicht, so möge gi darup vordacht sin, dat uns al dat volk entthut, unde se seggen kort, se willen umme 1 mr. de weken lant nicht ummethen. Se se ok dat dem heren kumpthur tho Wessenberge vorgeven, en were tho Revel gesecht, se solden tho Wesenberge oft thor Narwe. Do sede de kumpthur, se solden em volgen tho Wittensten, dar weren de veiende up de negede. Dessem is sus gesehen, wilt se wol don unde vorstan desse meninge, bet den wi iw schriven konen unde uns bi dessen baden en schriftlik antwart. Unde wilt dar ok up verdacht sin, wert, dat wi vorder volgen solen, so sendet uns 6 ander perde vor de bussen. Isset, dat gi se wilt wedder hebben, went de perde sin verjaget. Men mot mit den bussen jo so ser jagen, als de rider vorriden. Ok secht me[n] hir, de Russen hebben Terffest gewonnen unde liggen darup etc. Leve here, wert sake, dat wi dem heren kumpthur volgen solden, so mote gi uns mer bussenkrudes senden unde ok 1 t[onnen] hagelschates unde knipkernen krut, des wi nicht mede en hebben. Dat volk heft wol hantbussen, nergen krut dartho to kopen, unde ok bussensten unde mer pile. Wi weren tho Wesenberge vor dem heren kumpthur unde dem vogede unde beclageden uns, wi kenden gene vitali, als ber unde brot ofte mel, krigen. Do seden se beide, se westen uns genen rat, wi mosten ummesen, wor wi wat kregen. Do stunt darbi her Hermen Seie, de lende uns al unde 20 brot unde her Huge van der Lage Yi wsp. brodes, et Bertolt Wrangel van Jesse lende uns 4 t[onnen] bers et 100 brot. Sus mote wi uns biddendes behelpen. Do sede de kumpthur, wi behulpen uns wol bet tho Wittensten etc. Nu wi al hir sin, nu vinde wi al like vele hir als tho Wesenberge etc. Leve her borgermester, dat se wol unde voget it mit dem rade, so dat wi entsettet werden mit vitali, als dregefest viss, vlack vis, dorss, mer fei, spekes, lasses, 2 t[onnen] or mer soltes clen unde gross. Hirmede sit Gade bevale[n]. Gheschr[even] tho Wittensten des dinxtedages na sunte Gregoris anno LXXXI.

Hans van Hulderen, Hans Bokholte.

65