Том 10 (XVI век, литература «государственного устроения»)

Тогда же князь велики посла по великую княгиню брата своево князя Ондрея да князя Михайла Глинского, а наперед великия княгини повеле принести сына своего князя Иванна, плача для великие княгини, а сам на собя постави крестъ Петра чюдотворца.[69] А тогда бысть у него Михайло Юрьев, да Шигона, да стряпчих его бысть в то время: Иванъ Иванович Челядинъ, да шюрин его князь Юрьи Глинской. И принесоша к великому князю сына его на руках, князя Иванна, шюрин его, князь Иван Глинской, а за нимъ приде баба его Огрофена,[70] Васильева жена Ондреевича. Князь же великий снемъ съ собя крестъ Петра чюдотворца, и приложил ко кресту сына своего, и благословилъ его крестомъ, и рече ему: «Буди на тобе милость Божия и Пречистыя Богородици, и благословение Петра чюдотворца, какъ благословил Петръ чюдотворецъ прародителя нашего великого князя Ивана Даниловича, и доныне; и буди на тебе благословение Петра чюдотворца и на твоих детех и на внучатех, от рода в род; и буди на тобе мое грешное благословение, и на твоих детех и внучатех, от рода в род». И приказа же тогда князь велики Огрофене: «Чтоб еси, Огрофена, от сына моего от Ивана пяди не отступала!» И отпусти сына своего великого князя Иванна.

Тогда же приде к нему великая княгиня Елена, едва же держаху ее братъ его князь Ондрей Иванович, а з другую сторону боярыни Елена, Иванова жена Ондреевича Челядина.[71] Биюще же ся великая княгини, и плачеся горко, слезы же ея непрестанно текущи от очию ея, яко источникъ велий зело. Много же бысть слезъ, плача и рыдания во всех людех. Князь же велики теши еа, глаголаше ей: «Жено, престани, не плачися! Болезнь ми есть лехче, не болитъ ми ничто, благодарю Бога», понеже бо князь велики не чюяше собя. И на мал час уняв ея князь велики, и предста от слез великая княгини. И начатъ говорити великая княгини: «Государь князь велики! На кого меня оставляеши, и кому, государь, дети приказываеши?» Князь же велики отвещав, рече: «Благословил есми сына своего Ивана государьством — великим княжениемъ, а тобе есми написал въ духовной своей грамоте, какъ в прежних духовных грамотех отець наших и прародителей, по достоянию, как прежнимъ великимъ княгинямъ». И нача великая княгини бити челомъ о сыне, о князе Юрьи, чтоб его благословил. И посла князь велики по сына, по князи Юрья, и принесоша князя Юрья, ещо бо князь Юрьи мал бе, единого году. И благословил его князь велики, и дасть ему крестъ Паисиской,[72] и приказа отнести тот крестъ по преставлении своемъ боярину своему Михайлу Юрьевичу, а во отчине тако же отвечал: «Приказал есми в духовной грамоте, написал по достоянию». Тогда же великая княгини не хотяше итти от него, но отсла ея князь велики,[73] и простися с нею князь велики, и отдасть ей последнее свое целованье. Жалосно же бе тогда видети, слез, рыдание исполнено в то время!

И тогда князь велики посла по владыку по Васьяна и по старца по Мисаила по Сукина, и повеле ему платие принести чернеческое, и в то время попыта игумена кириловского, на то, понеже мысль его была преже того постричися у Пречистой в Кирилове монастыре.[74] И сказаша ему, что игумена кириловского на Москве нетъ. И тогда посла по игумена по троицкого по Ясафа; Мисайло же пришед к нему и принес платие черное.

Приде же к нему Данил митрополитъ, и братъ его князь Юрьи, и князь Андрей, и бояре все, и дети боярские. И нача ему говорити митрополитъ и владыка Васиян, чтобъ князь велики послал по Пречистые образ болший, чюдотворенные Владимирские,[75] еже Лука еуаггелистъ написа, и по Николу, чюдотворца Гостуньского.[76] Князь же велики посла по Пречистые образ и по Николу, и принесоша Пречистые образ и Николу чюдотворца вскоре. И призва къ собе дворецкого своего тверского Ивана Юрьевича Шигону, и посла его ко отцу своему духовному Алексею протопопу, и повеле ему принести къ собе дары изъ церкве запасные, и повеле его бы пытати, во обычай ему то дело, егда же разлучается душа от тела. Протопоп же отвеща, егда мало того бывало. И повеле ему внити в комнату з дароношениемъ, и повеле ему стати противу собя, и повеле стряпчему своему Федору Кучецкому стати с протопопомъ поряду, занеже бо Федець виде, когда преставление его отца, великого князя Ивана.

И тогда повеле дьяку своему крестовому[77] Данилку пети канон[78] великия мученици Екатерины и канун на исход души, и отходную повеле собе говорити. И какъ начал канон пети, и забывся мало и прочхнувся отъ сна, и нача говорити, какъ началъ канунъ пети, аки видение виде: «Государыни великая Екатерина, пора царствовати!» И возбудився, аки от сна, и приимъ образ великомученици, и любезно приложися к ней и коснуся рукою правою образу ея, понеже бо в те поры рука ему болна сущи. Тогда же принесоша к нему мощи великомученици Екатерины, и приложися к мощемъ, и рукою своею правою, и лежа на одре своемъ; и призва к собе боярина своего Михайла Семеновича Воронцова и поцеловався с нимъ, и прости его.