Том 10 (XVI век, литература «государственного устроения»)

И призва тогда князя Михайла Глинского, да Михайла Юрьевича, и докторов своих Николая Люева да Фефила, чтоб прикладывати к болячке масть или бы нечто пустити в рану, чтобы от нея духу не было. И нача ему говорити боярин его, Михайло Юрьевич, тешачи государя: «Государь князь великий, чтобъ водка нарядити и в рану пущати и выжимати, ино, государь, видечи такова тя государя истомна, чтобы, государь, спустити з день или з два, что было, государь, хотя мало болезни твоей облегчание, ино бы тогда вотка пустити». Князь же великий призва Николая и нача ему говорити: «Брате Миколае, пришел еси из своея земля ко мне, а видел еси мое велико жалованье к собе. Мощно ли тобе, чтобъ облехчение было болезни моей?» И глагола Миколай: «Государь, князь велики! Яз, государь, был во своей земли, слышав твое государево великое жалование и ласку, и я, государь, оставил отца и матерь и землю свою и приехал до тебя, государя, и видел, государь, твое государево великое жалование до собя, и хлебъ, и соль. А мошно ли мне мертваго жива сотворити, занеже, государь, мне Богомъ не быти!»[65] Князь же великий обратися и нача говорити детемъ боярскимъ и стряпчимъ своимъ: «Братие, Николай надо мною познал, что яз не вашь». Стряпчие же и дети боярские при немъ заплакаху горко, помалу его для, а вышед вон — горко плакаху и рыдаху, и быша яко мертви, видяще государя при конце.

И противу недели тоя нощи, коли причастися пречестныхъ тайнъ, и утешися мало, и нача, аки во сновидении, пети: «Алиллуиа, алиллуиа, а слава тебе, Боже!» И потомъ, пробудився, начатъ говорити: «Како Господеви годе, тако и бысть; буди имя Господне благословено отныне и до века!»

И приказа же князь великий со вторника к среде декабря въ 3 день, пред Николинымъ днемъ, и повеле отцу своему духовному Алексею протопопу собе держати служебныя дары у Благовещения. И тогда же прииде игумен троицкый Асафъ,[66] и рече ему князь велики: «Помолися, отче, о земскомъ строении и о сыне моемъ Иване, и о моемъ согрешении; дал Богъ и великий чюдотворецъ Сергий мне вашимъ молениемъ и прошениемъ сына Ивана, и аз крестил его у чюдотворца, и дал есми его чюдотворцу, и на раку чюдотворцову положил его, и вамъ, отче, своего сына на руки дал,[67] и вы молите Бога и Пречистую его матерь и великих чюдотворцов о Иванне, о сыне, и о моей жене, горчице; да чтоб еси, игумен, прочь не ездил, ни из города вон не выезжал!».

В среду же прииде к нему отець его духовный Алексей протопоп и принес к нему святыя дары. Князь же великий не можаше с постеля востати, но под плечи подняху его, и причастися святыхъ тайн, и по причащении мало звару вкуси. Призва къ собе бояр своих: князя Василья и князя Иванна Васильевичи Шюйских, и Михайла Воронцова, Михайла Тучкова, князя Михайла Глинского, Шигону, Петра Головина, дьяков своих: Меньшово Путятина, Федора Мишурина, и быша у него тогда бояря от третьяго часа и до седмого;[68] и приказавъ имъ о своемъ сыну великомъ князе Иване Васильевичи, и о устроенье земскомъ, како бы правити после его государьства. И поидоша от него бояре, а у него оста Михайло Юрьев, да князь Михайло Глинской, да Шигона, и быша у него до самые нощи. И приказав о своей великой княгине Елене, како ей без него быти и какъ к ней бояромъ ходити, и о всемъ имъ приказа, как без него царству строитися.

И тогда приидоша к нему братия его, князь Юрьи и князь Андрей, и начаша его притужати, чтобъ нечто мало вкусил. Князь же велики вкуси единыя миндальныя каши мало, токъмо ко устомъ принесе; и поидоша от него братия. И повеле къ собе воротить брата своего князя Ондрея. Тогда же бысть у него Михайло Юрьев, князь Михайло Глинской, Шигона, нача имъ говорити князь велики: «Вижю самъ, что животъ мой къ смерти приближаетца; хочю послати по сына своего Иванна, и хочю его благословити крестомъ Петра чюдотворца; и хочю послати по жену свою, по великую княгиню Елену, и хочю простится с нею». О сей же речи возвратися князь велики: «Не хочю послати по сына своего великого князя Иванна, понеже сынъ мой мал, аз лежю в великой своей немощи, и нечто бы от меня не дрогнул сынъ мой». Князь же Андрей и бояре начаша говорити великому князю и притужати: «Государь князь великий! Пошли по сына своего по князя Иванна, благослови его. И пошли, государь, по великую княгиню».