Том 17 (XVII век, литература раннего старообрядчества)

Во едину же от нощей, месяца майя к дватцать третьему числу, случися жене его и братиям и всем сродником, сущим во храмине той, уснути, той же беснующийся взем сапог, обу едину ногу свою и во единой срачице изыде из дому своего, никому не ведущим. Возбнувше[3160] же сущии во храмине и не видеша его, начаша в доме своем со свещами искати его, бояшеся, дабы, скрывся негде, удавления не посътрадал. И егда обыскаша весь дом и не обретоша, тогда в печали сущи и сетовании, недоумеющеся, како искати его. Един же от сродник его рече: «Иду в корчемницу, негли тамо обрящу его», — понеже обычай он имеяше тамо чясто в нощех ходити ради пития. Хотящу же ему тамо ити и, егда изыде из врат, узре приближающася ко вратом дому его человека, грядуща з горы путем, иже есть от града Галича к царствующему граду Москве, во единой срацыце, имея ногу едину обувену. Он же, видев, позна его и, поим, въведе его в дом и вопросиша его, где бе. Он же поведа им: «Егда вы вси уснуша, аз же взем един сапог и обу ногу свою, не могий же другаго сапога вскоре обрести, изыдох из дому своего, да некако от вас познан будет исход мой. Восхотех же ити в корчемницу и тамо пити, якоже обычай имех прежде, и не вем, како погреших путь. Мнех убо, яко х коръчемнице гряду, и се обретохся в поле под древом. Ощутив же аз сие и возъзрех ошуюю страну, видех обитель преподобнаго Паисия и в той обители во святей церкви свет велий, разумех, яко в той обители поют в си час всенощное бдение, свет же велий в церкви от возжения свещь. Познах же и древо, под нимъже обретохся, яко противо обители в манастырском поле, зовома береза. Егда же вся сия ощутих, тогда возвратихся в дом мой. И приходящу ми ко вратом, усретох сего сродника, он же поим мя, въведе в дом мой». Сердоболи же его, слышавше сия, недоумевахуся, како в толикий малый час быв под древом и паки обретеся у врат дому своего. Ведяше, яко древо оно от дому его отъстоит за едино поприще. И едва прииде им во ум, яко егда изыде из дому своего, тогда, бесом водим, скоро достиже древа оного, егда же под древом оным обретеся, тогда преподобный отец Паисий, видя его, хотяща погибнути, свободи его от диавола, понеже и сам глаголаше, яко егда ощутившу ему древо оно, тогда первее всех возре на шуюю страну ко обители преподобнаго. И тако от древа оного к дому идяше, направляем преподобным Паисием. Свет же велий в церкви бысть, понеже в той день во обители память сотворяли преподобному и в нощи той бысть всенощное пение. И сего ради сродницы его восхотеша вести его во обитель к раце преподобнаго и недоумевашеся, како бы его довести, видевше его нелепая глаголюща.