Том 17 (XVII век, литература раннего старообрядчества)

И по мале времени они, окояннии демони, пришедше к ней, бывши же ей единой в дому отца своего. И начаша ея окояннии мучити и метати ю: ов демон во един угол храмины, а ин в другий угол, ин же на печь — и тако ея мучаху на многи часы. И взяша некое уже[3181], и привязавше ю за шию, и взяша камень жерновный, и воздеша на уже, и положиша ей на лице и на персии[3182], и столь туто же воздеша, и повесиша ея к стропу[3183] со всем. Слышавше же соседи бывающая над тою беснованною и поведаша отцу ея. Он же пришед и не видев никогоже в дому, токмо едину дщерь свою лежащу, и уже на шии ея, и камень, и стол. И не веде она, како отрешися от верху храмины. И бывши ей аки мертве, на многи часы, и от того мучения едва очнуся. Прииде же отец ея и разреши. Такожде и соседи приидоша и видеша тело ея все избито и сине. А болезни она никакоже чюяше на теле своем.

Отец же ея и мати к нощи запираху ея едину во храмину, бояху бо ся ея: егда они, окояннии демони, к ней прихождаху, и она бывает вне ума. И дают ей демони копие железное, дабы заклала отца своего. Заутра же востав, показует копие отцу своему истинно, а не привидением. Бысть же ей таковое мучение безпрестани, покоя от них нимало имеяше. А иныя их вражия козни невозможно и писанию предати, мнози тому вражию кознодейству в той волости свидетели.

Посем же приидоша окояннии тии демони воднии многое множество и начаша нудити ея, чтобы она жила у них и веровала бы, якоже и они во отца своего Сатану, такожде бы и пила, и ела с ними, и волю бы их творила. Прежде ласканием и честию хотя прельстити ю, от християнския веры отвратити и глаголаху ей: «Видиши ли, Соломоние, каково житие наше все добро. Будеши ты у нас в чести велицей, и не будеши ты у нас ничим скудна». Она же ничесоже отвещеваше им. Видевше же они, окояннии демони, что добротою и ласканием не возмогоша прельстити ю и превратити от истинныя веры Христовы, и начаша ея мучити: растягоша и расковаша ея по стене, руце и нозе в смыки[3184] вбиша и начала ея копии колоти, и рожны збодати, и ногты все тело ея драти. И паки вопросиша ю: «Веруеши ли в нас и во отца нашего Сатану?» Она же ничтоже им отвеща. И расковаша ея, и возведоша на некое высокое место, и взяша ея за руце и за нозе, и ринуша долу[3185], ей же лежащи аки мертве.

И взяша ю оттоле они, темнообразнии демони, и приведоша ея паки к себе. И даша ю некоей девице, а называют ея они, окояннии, Ярославкою[3186]. Таже[3187] девица нача ея вопрошати: «Како ты прииде семо[3188], и коего града или веси, и отца, и матери?» Соломония же все сказа, яже о себе. Девица же рече ей: «Аще ты, Соломоние, не хощеши жити зде, и ты у них ни яждь, ни пей и ничто им отвещай. И они тебя помучат да и отпустят». И по мале времени глаголаша ей они, окояннии: «Веруеши ли в нас?» Она же ничтоже им отвеща. Они же, темнообразнии лукавии дуси, отнесоша ю на лес едва живу сущу от многаго мучения. И с великим трудом к своему дому едва дойде.

И живши ей в дому отца своего 6 дней. И паки они, окояннии темнозрачнии, пришедше, и невидимо взяша ю, и унесоша к себе. И бысть 2 дни и 2 нощи, и зачала от них во утробе, и носила их полтора годы. Егда же прииде время родити ей, и бе в дому отца своего, и выслала из дому отца своего вон со всеми живущими. И сказа им, что хощет родити: чтобы их тии темнообразнии демони не убили. И как она почала родити, прииде к ней темнообразных демонов жена и нача с нею водитися. И роди их 6, а видением они сини и темни. И взя их та жена, которая с нею водилася, и унесе их из храмины под мост. Отец же ея прииде в дом свой со всеми домашними, и начата ясти. И они, темнообразнии демони, воставше, начата камением метати и землею бросати. Отец же ея, и мати, и вси живущии в дому, видевше таковое диавольское неприязньство и дщери своея погибель, и побегоша вси из дому. Она же, Соломония, едина остася.

Жена же темнообразная прииде к ней и принесе ей сосуд крови, и веляше ей пити. Она же не можаше пити. И рече ей темнообразная жена: «Когда ты не пиеш крови, и ты заколи отца своего». Она же рече им: «Дайте мне еще урочное время, и аз заколю отца своего». Того бо ради глаголаше им, яко не можаше терпети мучения их, от темнообразных, ихже родила, понеже ссаху[3189] за сосцы, якоже змии лютии.

3 дни и 3 нощи не внидоша в дом вси домашний страха ради диявольского от каменного метания. И в 4 день едва внидоша и не видеша никогоже. Соломонию же паки унесоша темнообразнии они демони и оскверниша ю. И зачала во утробе от их диявольского насилия, и родила 2 демонов в дому отца своего. И невидимо унесоша их от нея. В ыное же время родила одного темнообразного демона и паки еще родила двоих темнообразных демонов. А когда она родит, и она хлеба не яст нимало, но приношаху ей невидимо темнии синцы оны птичью кровь, и траву, и корение — и тем ея питаху.