Том 17 (XVII век, литература раннего старообрядчества)

И не по мнозе времени они, окояннии, взяша ея невидимо и унесоша к себе в воду. И бысть у них 3 дни и 3 нощи. Отцу же ея и матери отчаявшимся живота ея, и плакахуся о ней вельми горько. И егда они, окояннии, принесоша ея к себе, и начата веселитися того ради, яко детей им родила. И принесоша их пред нея, и вопрошаху их: «Что вам сия жена?» Они же рекоша: «Мати нам есть». Посем же они, окояннии демони, седоста по местам, кождо[3190] друг друга честию больши творящи и почитающи, и начата ясти и пити, и принуждати и Соломонию с собою пити и ясти, ей же не хотяще. Они же, окояннии, начата мукам претити ей, она же и неволею повинуся им. И даша ей ковш, и начата вина наливати, и всем темнообразным повелеша подносити и имены всех называти. Она же всем подаваше от первых и до последних, бяше бо их многое множество. Глаголюще же друг ко другу: «Всяко мы ея мучили: и били, и ножами резали, и копием кололи, и ногты тело ея драли, дабы отступила от веры своея и в нас веровала, и жила бы у нас. И никакоже возмогохом отвратити ея от веры». Глаголюще: «Сварим в котле воды и тамо кинем ея, негли[3191] повинется нам». И не збысться злый совет их.

И паки отдаша ю девице Ярославке. Соломония поведа ей все, еже у них слыша. Таже девица Ярославка рече ей: «Соломоние, хощеши ли аз тебя у них отпрошу ко отцу твоему и матери сходити и проститися?» И нача ея учити и сказывати их имена, как коегождо их зовут. И учила же ея та девица по десяткам. Она же, Соломония, всем им имена познала. Посем же рече девица Ярославка: «Как тебя, Соломоние, они от себя отпустят ко отцу проститися, и ты вели отцу своему те имена переписати, которые тебе аз сказывала. И вели ему те имена проклинати[3192] во святом олтари, идеже безкровная жертва приносится Господу Богу. Посем тебя и, окоянным, невозможно будет унести и не приближитися». И прииде та девица Ярославка ко оным темнозрачным демоном и рече им: «Отпустите Соломонию ко отцу проститися. И, простяйся она со отцем своим, будет зде вечно жити».

Они же послушаша ея, и понесоша Соломонию ко отцу ея, и принесе на некое блато. Бяху бо их, окоянных, многое множество. И начаша ея, Соломонию, в болоте топити. И в то время бысть туча велия с молниею, и з громом страшным, и с тресканием зельным. И нача их, окоянных, молниею полити и громом побивати, и убило их, окоянных, многое множество. Бяше бо их блато и езеро исполнено, аки смолою подернуто. Она же, Соломония, от них побежа и скрыся в некую яму. Они же, окояннии оставшии демони, и тамо ея нашедше и всякими муками неудобьсказаемыми паки начаша мучити ея. И в той час паки бысть буря велия, и гром, и молния. И они, окояннии, едва от нея отступиша. Она же у них убежа и дойде до дому отца своего с великою скорбию.

Видевше же отец и мати ея, возрадовашася зело. Мневши же родители ея, яко уже вечно не бывати ей из воды от темнозрачных демонов. Она же, Соломония, нача поведати отцу своему и матери вся бывшая ей от демонов, и како ея девица Ярославка учила их имена и велела их имена отцу ея проклинати во святем олтаре, идеже безкровная жертва приносится Господу Богу. Отец же, и мати, и вси сердоболи[3193] ея слышавше от нея таковая от демонов бываемая и начаша плакатися, и едва престаша от плача. Посем же отец ея написа имена те, якоже сказа ему Соломония. Священники же Никита нача их, окоянных, проклинати во святем олтаре. Она же, Соломония, от того демонского мучения в недуг телесный впаде.

Во един же от дней от тоя болезни она, Соломония, мало усну. И видит во сне некую жену святолепну, пришедшу к ней, и глагола ей: «Соломония, пойти ты ко граду Устюгу, а зде не живи. И от волхвов себе исцеления не ищи, не будет тебе помощи от них». Она же, Соломония, вопроси имени ея. Она же рече ей: «Аз есмь преподобная Феодора»[3194]. И абие[3195] невидима бысть. Соломония же убудися от сна, нача поведати видение отцу своему. Отец же ея повеле ей итти ко граду Устюгу. Она же рече: «Не могу сего и слышати», — возбраняше бо в ней демонская сила. Отец же едва умоли ея итти ко граду Устюгу и отвезе ея.

И бывши на Устюзе, повелеша ей жити у соборныя церкви Пресвятыя Богородицы на плошади у вдовы некия именем Соломонии же. И нача ея водити по церквам, и в соборную церковь Пресвятыя Богородицы, и к святым и праведным Прокопию и Иоанну[3196], устюжским чюдотворцом. Демони же, живущия в ней, начата утробу ея рвати. Она же, Соломония, в недуг телесный впаде. Родители же ея призвавше соборныя церкви священника Никиту. Он же пришед, исповедав ея и причастив Святых Христовых Тайн. И по мале времени уздравися. И прииде ей во ум таковое желание, чтобы паки итти ко отцу своему, и отвезоша ея.