Том 17 (XVII век, литература раннего старообрядчества)

Радуйся, добропобедная венечнице преподобная мати великая княгиня-инокиня Анно, благоволи бо Бог от юности твоея освятити тя божественным своим светосиянием, и обогатити благодатию своею, и просветити сердечнии твои очи зрети к будущему пребыванию, наставити на путь добраго онаго течения. Того ради яко царским путем шествовала еси[3380], блаженная, девство свое сохранщи неврежденно до закона своего сопряжения[3381], тем и первие угодила еси Христу Богу, емуже ныне молися даровати нам мир и велию милость.

Радуйся, девьство и чистоту возлюбивши, уневестися нетленному жениху своему Христу Богу. Якоже целомудренная Анна день и нощь молящися Господеви[3382], такоже и ты, блаженная, пребыла еси в посте и молитве, выну[3383] себе снабдевающи[3384], и породи си дух спасения, имже и спасе душу свою, тем и угодила еси Небесному Царю и Владыце всех, емуже ныне молися даровати нам мир и велию милость.

Радуйся, нищим питателнице неоскудная, и сирым и вдовицам крепкая помощнице, и всем скорбящим утешение, и ко всем же убо милостиву душу свою имущи, с любовию и тихостию милостыню подающи, надеющися от Христа Бога сугубу себе прияти во оном веце, по реченному от него, яко милостивии милостив и суд приимут[3385]. Ты же, преподобная, поревнова сицевому Господню речению, тем и угодила еси ему, Творцу своему и Богу, и получи си от него Царство Небесное и венец нетленный, моли и́[3386] спастися душам нашим.

Радуйся, достохвалняя мати великая княгиня-инокиня Анно, яко за многую твою добродетель к Богу сподобилася еси от него чюдотворнаго дара, многих болящих различными недуги исцелявши, яко некоим драгим богатеством обогащаеши, и всех удивляеши чюдесы своими. Тем тя ныне молим: моли Христа Бога даровати нам мир и велию милость.

Радуйся, тезоименита бывши целомудренней Анне[3387], выну же готовящися к вечному селению, по божественному изволению, к немуже и отъиде в вечный покой и веселие, и пребываеши в неизреченных светлостех со всеми святыми, угодившими Богу, радующися и веселящися, наслажающися божественаго светосияния, моли даровати нам мир и велию милость.

Слава. И ныне, глас 8. Приидете вси вернии рустии народи, почтем, и похвалим, и согласно воспоем сию росийскую нашу похвалу, яко пресветлую звезду, осиявающую град свой Кашин чюдесы своими, нищим питателницу, сирым и вдовам заступницу, скорбящим утешителницу, сию блаженную в женах преподобную матерь великую княгиню Анну. Сия убо прейде ко Христу Богу в вечныя обители и ныне пребывает с чинми ангельскими в горних онех селениях, радующися и веселящися. Тем возопием к ней, сице рекуще: Радуйся, руская похвало, всем женам красное удобрение[3388], граду Кашину просвещение, и прияла еси от Христа Бога Царство Небесное и венец нетленный, моли и́ спастися душам нашим.

И ныне. Догматик, глас 8: Царь Небесный.

Паремьи преподобническия. 1-я: Праведных душа в руце Божии. 2: Праведницы вовеки живут. 3: Праведник, аще постигнет скончатися.

На литии. Стихеры, глас 2. Под<обен>: Кими.

Кими похвальными песньми похвалим чюдотворивую сию преподобную матерь великую княгиню-инокиню Анну в настоящее сие торжество в пречестнем храме, но верою и любовию возопием ей, рекуще: Радуйся, верным людем заступнице теплая, и всей земли Рустей красное утвержение, и всему христоименитому жителству удивление, юже тя[3389] венцем венчает Христос Бог наш, имеяй велию и богатую милость.

Кими похвальными песньми составим ликование в честней сей памяти преподобный матери великия сея княгини Анны и духовно помолимся: моли благоверному царю нашему великому князю Алексею победителная на враги даровати[3390], тебе бо имамы теплую молитвенницу и ходатайцу ко владыце Христу Богу нашему, подающему нам мир и велию милость.

Кими похвалными добротами воспоем преподобную матерь Анну? Яко звезда осиявает нашу Рускую землю и град свой Кашин своим к Богу предстоянием и молением, и яко крин[3391], процвела есть во своем отечествии труды своими и подвиги, и ныне молит Бога за благовернаго царя нашего и великаго князя Алексея и за вся его православный люди, воеже[3392] всем спастися, память ея верою и любовию почитающим.

Слава, глас 5. Стецытеся, вси правовернии людие, сошедшеся составим празднесвеная в настоящее сие торжество великия княгини-инокини Анны и возопием ей, сице рекуще: Радуйся, Духа Святаго пребывалище, яко ангелы и человеки удивила еси, блаженная, чистым своим и непорочным житием, и прешла еси ко Христу в вечный покой и в небурное пристанище. И днесь по смерти твоей честныя мощи твои чюдодействуют, исцеление подают всем приходящим к ним с верою. Крестоносный же царь и великий князь Алексей, патриарх же и вси людие радуются и веселятся о обретении честных мощей твоих, и ныне пребывавши у Христа Бога в Царствии Небеснем, моли спастися душам нашим.

На стих<овне>. Стихеры, глас 8. Подо<бен>: О, преславное.