Том 17 (XVII век, литература раннего старообрядчества)

О, преславное чюдо, яко в немощнем естестве велия крепость явися, и бесовская прелесть победися, и вся козни его разрушишася, и наветы упразднишася. О, блаженная мати в женах, преподобная великая княгиня-инокиня Анно, моли о нас человеколюбца Христа, Бога нашего.

Стих: Честна пред Господем.

О, великих божественых дарований на тебе, мати преподобная великая княгиня Анна, яко от младых ноготь твоих вселися в тя Христос, Бог наш, тем и многия добродетели сотворила еси, и всех удивила еси своими натризнении[3393], моли спастися душам нашим.

Стих: Что воздам Господеви о всех.

О, досточюдная мати Анна, похвала еси граду Кашину и всем женам и инокиням красное удобрение, и, яко доброплодная лоза, посреде их процвела еси добрыми своими детелми, и прешла еси к вечному селению, и ныне моли о нас Христа Бога спастися душам нашим.

Слава, глас 6. Приидите вси иноцы и инокини и простии мужие и жены, благочестивии богатии и убозии, хотящей спастися, поревнуим[3394] сей блаженней и чюдотворивей преподобней матери велицей княгине Анне, како тело свое постом и бдением, и зельным[3395] воздержанием до конца изнури и всех удиви. И яко велия светилница явися во всех верных женах и инокинях в добрых своих детелех, и прейде ко Христу в вечная селения, и ныне пребывает в невечернем свете со ангельскими чинми, радующеся и веселящися, и молит о царе и о всех людех, воеже спастися душам нашим.

И ныне. Бого<родичен>: Богородице, ты еси лоза истинная.

На утренни. На первой стихологии. Седален, глас 1. Подобен.

Днесь созывает нас обретение честных мощей твоих, преподобная мати Анно, празновати день памяти твоея. Царь же и великий ерарх, и мы, вси людие, радующеся и веселящеся, почитаем святую память твою. Ты же, блаженная, поминай нас, верою и любовию чтущих святое твое преставление. 2-ж<ды>.

Слава. И ныне. Бого<родичен>. Свет от света произыде и в твою девичю утробу вниде, и плотию обложися, и недомыслено и несказанно Сын твой Христос, Бог наш, ис тебе родися, егоже рожеством вся тварь обновися и идольская лесть разорися. Тем молим тя, Пречистая: Моли и́, да спасет душа наша, яко милосерд.

По 2 стихологии. Сед<ален>, глас 4. Подобен: Скоро предвари.

Премудрый Бог премудростию своею все содевает и святыя своя прославляет. Такоже и на тебе, преподобная мати, сотвори, прослави тя на земли и на небеси, и имаши к нему дерзновение, моли за царя и за вся люди, яже в православии живущая, яко да подаст нам милость свою в день судный. 2-ж<ды>.

Слава. И ныне. Бого<родичен>. От всех родов произбранная, и от всех пророк пронареченная, и от всех человек препрославленая, и от ангел удивляемая, Мати Бога вышняго, удиви[3396] на нас, недостойных рабех своих, милость свою и моли за ны Сына своего и Бога нашего, яко да подаст нам милость в день судный.

Хвалите имя Господне. Величания: Ублажаем тя, преподобная мати Анно, и чтем святую память твою, наставница инокиням и собеседница ангелом. Псалом «Терпя потерпех»[3397]. По полиелеосе седален, глас 8. Подобен: Премудрости.

От юности твоея произбра тя Господь во вселение себе, преподобная мати Анно, и от вседержителныя руки его положися венец нетленен на версе твоем[3398], и осиянна была еси от него божественым его светозарением и ныне насыщаешися таковыя славы и веселия, и молишися за свое отечество и за всю землю Рускую, и святую и честную память твою почитающия и воспевающая Христу: Слава ти, Господи, творящему дивная своя чюдеса. 2-жды.

Слава. И ныне. Бог<ородичен>. Солнце разумное возсия от пречистыя твоея утробы, от негоже вся тварь видимая и невидимая просветися и терние греховное искоренися. Тем и мы, убозии и недостойнии раби твои, молим тя, да избудем тины греховныя и да получим милость в день страшнаго пришествия его твоими матерними к нему молитвами.

Степенна антифон 4-го гласа. Прок<имен> и Еваггелие преподобным женам. По 50-м псалме стихира, глас 6.

Тебе ходатаицу и молитвенницу благоприятну имамы к Богу, преподобная мати великая княгиня Анно. Ты бо молиши за благовернаго царя нашего и великаго князя Алексея и за вся православныя люди, яко да избавимся от бед, и скорбей, и от всякаго навета вражия. Тем спрославляем твою святую и честную память и восхваляем тя, блаженную в женах, не престаи моли о душах наших.

Преподобней канона два на 8. Глас 3, емуже краегранесие[3399] сицево: Достойно похвалити великую княгиню.

Песнь 1. Ирмос: Иже воды древле.

Даждь ми, Господи, разумение, да достолепно воспою и возпрославлю благоугождшую ти предбывшую сию великую княгиню-инокиню Анну, и возопию тебе, Христу моему, яко прославися.

О тебе, блаженная мати Анно, хощу ныне язык подвигнути и слово простерти, споспеши ми, недостойному, молитвами твоими яже к Богу, да достойне воспою тя и воспою Господеви моему, яко прославися.

Со младых ноготь своих страх Божий имела еси в сердцы своем, блаженная, егоже до конца содержащи, укрепляема божественою благодатию, тем и душю свою спасла еси, выну поющи Христу, яко прославися.