Том 17 (XVII век, литература раннего старообрядчества)

Сей убо преподобный отец Елиазар рождением бе града Козельска благочестиву родителю: отца иереа именем Афанасиа, матери же именем Татианы. Сей первие прииди в Соловецкий монастырь боголепнаго Спасова Преображения и преподобных и богоносных отец наших Зосимы и Савватиа чудотворцев. И поживе ту лета доволна во страсе Божии, в мирском пребывании. И оттуду прииди на Анзерский остров при игумене Иринархе[356] Соловецкаго монастыря в лето 7124 (1616) года. И ту поживе и пострижеся во иноческий образ от иеромонаха Фирса. И поживе ту един, в пустыни работая Господеви, 4 лета. И по сем, Божиим изволением и повелением благовернаго и благочестиваго государя царя и великаго князя Михаила Феодоровича[357] всеа России и по благословению великаго господина, святейшаго Филарета патриарха Московскаго и всея России, церковь древяную воздвиже во имя живоначалныя Троицы, и братию собра, и келлии устрой. Таже по неколиких летех каменную церковь созда и украсив всяким церковным украшением. И в ней два престола: Знамение пресвятыя Богородицы и преподобнаго Михаила Малеина[358].

И сподобися слышати Божественный глас свыше, глаголющь к нему, еже написати ему образ Спасителев. Он же написа образ повелением Божиим красками. А назменил[359] ему той образ в Соловках монах Памва иконописец[360] чернилы. И слышит глас, глаголющь к нему во дни умилно: «Напиши образ мой». Он же не посмел писати. И паки на другий день заутра глас бысть крепчайши перваго и со гневом: «Напиши мой образ Христов!» Он же, уповая на Господа и помоляся, написал красками образ, уповая на милость его святую. Ему же буди слава, честь и поклонение ныне и присно и во веки веков. Аминь.

Сей бе собеседник преподобному Иринарху игумену Соловецкому. Некогда преподобному Елиазару пребывающу в келлии своей. И слышит вне келлии глас, глаголющь велегласно. Он же изыде из келлии своея и виде человека с конем шерстию сера, впряжена в сани, и в них медведно[361], и полстию покрыты, сани привращающа к дверем, дабы мощно в них сести безтрудно. И призрак той, видя преподобнаго, изшедша из келлии, и поклонися ему обычно, и исправя от игумена Иринарха благословение его, и возвести ему вещь о скором приезде своем. Сице рек: «Зовет тя игумен Иринарх вскоре некоея ради нужный потребы и некоего пременения». Оному же удивльшуся игуменскому незапному пременению. И вскоре восхоте ехати в монастырь. И пригласи пославшаго в келлию свою. Оному же отрицающуся и понуждающа его незамедленно ехати. Преподобному же скоро срядившуся. И вышед за сени. И воззрев на святую церковь живоначалные Троицы, и прекрестися крестным знамением. И абие изчезе басовский призрак с конем и с саньми, и невидим бысть. И от сего преподобный приим искус и болма подвизашеся на диавола постом и молитвами и всенощным стоянием и бдением. И тако победив диавола.

И сподобися от Бога прорицати будущая, и благочестивому государю царю и великому князю Михаилу Феодоровичю молитвою сынонеплодие разрешил, и Божественаго же гласа насладихся. И чудес благодать восприим, и от ученик его пастыря России ко исправлению споказа. В славу же святей Троице обитель безмолвну возсоздав во спасение и уединение, коемуждо особ подвизатися, в нейже, обуреваемый злыми, много исцеление приемлют, молитвами его наставляеми.

И тако подвизася преподобный Елиазар, первый бе началник и строитель Анзерскаго скита. И поживе богоугодно доволна лета, и в старости мастите преставися ко Господу в лето 7164 (1656) года месяца ианнуариа в 13 день. И погребен бе невдалее от церкви живоначалныя Троицы, созданней от него. И потом братиа поставиша над ним молитвенный храм — часовню. И поставиша икону, образ Господа нашего Иисуса Христа, на поклонение приходящим с верою.

О учениках строителя Елиазара

Бе ученицы преподобнаго Елиазара: иеромонах Никон, монах Никодим, монах Никифор. И той монах Никодим бысть вторый строитель в Ванзерском ските по старце своем, преподобнем Елиазаре. И поживе во всяком воздержании неколико лет и преставися с миром в лето 7181-ое (1673) месяца ианнуариа в 22 день. Пребысть в монашеских подвизех 43 лета.

Третий ученик блаженнаго Елиазара — монах Никифор. И той бе во младых летех пребывая житие постническое же и безмолвное. И пребысть в монашеских исправлениях немного лет. И преставися в вечный покой.

И погребены бысть оба в той же часовни с преподобным Елиазаром.