Том 17 (XVII век, литература раннего старообрядчества)

Кашенския конюшенныя слободы тяглеца Артемья Скорикова сын его отрок Иоанн быв разслаблен, лежал в дому отца своего многое время, не владел ничем и даже главы своея не мог приподнять. И в той болезни привозили его к Пресвятей Богородице Успению и ко гробу преподобныя, и повелеша служити молебен Пресвятей Богородице Успению, и над гробом великия княгини Анны литию служити, и ко гробу того отрока приложиша. И от того часа незапно тот отрок Иоанн здрав бысть и отъиде в дом свой, славя и хваля Бога и Пречистую Богородицу и их угодницу преподобную матерь княгиню Анну.

Чудо 4. О ослепшей женщине

Дворянина иноземца Иоанна Иоаннова сына Детновскаго жена его, именем Иулиания, очима велми больна была и от тоя болезни не видела рук своих многое время. Слышав же о чудесех, бывающих у гроба преподобныя благоверныя великия княгини, муж же ея Иоанн Детновской в то время был в Кашине на воеводстве. И привозил ея к Пресвятей Богородице Успению и ко гробу преподобныя Анны, и певше молебен Пресвятей Богородице Успению, и у гроба преподобныя литию служили, и по окончании молебна и литии приложили ея ко гробу великия княгини Анны. И в том часе прозре на многоцелебном гробе преподобныя и от болезни той здрава бысть. И отъиде в дом свой, радуяся и славя Бога и Пречистую Богородицу и угодницу их преподобную благоверную великую княгиню Анну.

Чудо 5. О беснующемся человеце[3693]

Дмитровского монастыря, что в Кашине, слуга Феодор, Стефанов сын, Маламахов лежал болен, и в той болезни помутился умом, и не познавал никого из домашних своих, и бесновался многое время. Свои же его едва привезоша к Пресвятой Богородице Успению ко гробу преподобныя благоверныя великия княгини Анны. И пели молебен Пресвятей Богородице Успению, и литию у гроба благоверной служили, и по окончании молебна и литии приложили его ко гробу преподобныя. И от того часа тот Феодор людей познал и ум по-прежнему возвратих, и от той болезни здрав бысть, и отъиде в дом свой, радуяся и славя Бога и Пречистую Богородицу и преподобную великую княгиню-инокину Анну.

Чудо 6. О разслабленной инокине

157-м[3694] году генваря в 5 день привезли Михайловскую жену Гавренева Софию, Власову дочь, разслабленну в Кашин в Сретенский монастырь девичий, и в той болезни пострижеся, и наречено бысть имя ей во инокинях Феодосия, и в монастыре лежала в разслаблении многое время. И обещася та инокиня Феодосия помолитися в церкви соборней Пресвятей Богородице Успению, и повеле себя отвести в соборную церковь. И повелеша пети молебен Пресвятей Богородице, и воду святити, и панихиду по великой княгине служити, и ко гробу ея приложили. И от того часа та старица Феодосия здрава от разслабления молитвами преподобныя благоверныя княгини Анны, и отъиде в монастырь, радуяся и славя Бога и Пречистую его Матерь и угодницу их преподобную благоверную и великую княгиню Анну.

Чудо 7. О беснующейся жене[3695]

Сретенскаго девичья монастыря крестьянина Тихона Иванова жена его Евдокея одержима была недугом зелным, и в той болезни ума отступила, и не знала никого, и лежала в дому своем в том недузе много время. И привозили ея к Пресвятей Богородице Успению и ко гробу преподобныя, и молебен Пресвятей Богородице пели, и воду святили, и панихиду по великой княгине служили. И по окончании молебна и панихиды приложите ее ко гробу преподобныя и даша ей святыя воды пити. И от того часа та Евдокея людей познала, и умом стала цела, и от недуга исцеление получи молитвами преподобныя великия княгини Анны, и отъиде в дом свой здрава, радуяся и славя Бога и Пречистую его Матерь и угодницу их преподобную великую княгиню Анну.

Чудо 8. О разслабленной жене

Кашинския Конюшенный слободы тяглеца Ивана Зызюкина жена его, именем Ксения, в недузе лежала много лет, и, не владея ничем, была разслаблена пять лет, и в той болезни обещалась Пресвятей Богородице Успению и преподобной благоверной княгине Анне, пришедши в соборную церковъ, помолитися. И по тому обещанию привезоша ее к Пресвятей Богородице Успению и ко гробу преподобныя княгини Анны, и, певше молебен Пресвятей Богородице, воду святили, и панихиду у гроба по благоверной княгине служили, и по окончании молебна и воды освящения и панихиды даша ей святыя воды пити и ко гробу благоверныя княгини Анны приложили. И от того часа та Ксения от разслабления исцеление получи и бысть здрава, яко николиже боле, молитвами преподобныя великия княгини Анны, и отъиде в дом свой, славя и благодаря Бога и Пресвятую Богородицу и преподобную матерь княгиню Анну.

Чудо 9[3696]