Том 5 (XIII век, литература трагического века)

Потом же ехаста в Володимерь, и собравша мало дружины, и молящася Богу о нашествии татарь, да Богь избавить я. Не могуща же дружины собрати, сласта семо и онамо. Прилучи же ся Василковымъ людемь выехати и обретше татаръ биша я, и колодники имаша.

Потом же, Куремьсе стоящю у Лучка, створи Богъ чюдо велико. Луческъ бе не утверженъ и не уряженъ. И сбегшимся во нь многимъ людемь, и бе бо зиме, бывъши и воде велице. Оному же пришедшу к Лучьску и не могшу ему преити, хотяше мостъ прияти. Гражаномъ же отсекшимъ мостъ. Он же порокы постави, отгнати хотя. Богъ же чюдо створи, и святы Иванъ, и святый Никола: ветру же таку бывшу, яко порокомъ вергшу, ветру же обращаше камень на не. Пакы же мечющемъ на не крепко, изломися Божиею силою пракъ ихъ. И не успевше ничтоже, вратишася во станы своя, рекше в поле.

Якоже древле писахомъ во Куремьсину рать о зажьженьи города Холмъ. Холмъ бо городъ сиче бысть созданъ Божиимъ веленьемь. Данилови бо княжащу во Володимере, созда градъ Угорескь и постави во немь пискупа. Яздящу же ему по полю и ловы деющу, и виде место красно и лесно на горе, обьходящу округъ его полю. И вопраша тоземець: «Како именуеться место се?» Они же рекоша: «Холмъ ему имя есть». И возлюбивъ место то, и помысли, да сожижеть на немь градець малъ. Обещася Богу и святому Ивану Златоусту, да створить во имя его церковь. И створи градець малъ. И видевъ же, яко Богъ помощникъ ему, и Иоанъ спешникъ ему есть, и созда град иный, егоже татарове не возмогоша прияти, егда Батый всю землю Рускую поима. Тогда и церковь святой Троице зажьжена бысть, и пакы создана бысть.

Видивъ же се князь Данило, яко Богу поспевающу месту тому, нача призывати приходае немце и русь, иноязычникы и ляхы. Идяху день и во день и уноты и мастере всяции, бежаху ис татаръ седелници, и лучници, и тулници, и кузнице железу, и меди, и сребру. И бе жизнь, и наполниша дворы окрестъ града поле села.

Созда же церковь святаго Ивана, красну и лепу. Зданье же ее сиче бысть: комары 4, с каждо угла преводъ и стоянье ихъ на четырехъ головахъ человецскихъ, изваяно отъ некоего хытреца. Окъна 3 украшена стеклы римьскими; входящи во олтарь стояста два столпа от цела камени и на нею комара и выспрь же, верхъ украшенъ звездами златыми на лазуре, внутрьнии же ей помость бе слитъ от меди и от олова чиста, яко блещатися, яко зерчалу; двери же ей двоя украшены каменьемь галичкым белымъ и зеленымъ холмъскымъ тесанымъ; узоры те некимь хытречемь Авдьемь прилепы от всехъ шаровъ и злата, напереди ихъ же бе изделанъ Спасъ, а на полунощных — святы Иванъ, якоже всимъ зрящимъ дивитися бе. Украси же иконы, еже принесе ис Кыева, каменьемь драгымъ и бисеромъ златымъ, и Спаса, и пресвятое Богородице, иже ему сестра Федора и вда из монастыря Федора, иконы же принесе изо Уручего, Устретенье от отца его. Диву подобны, яже погореша во церкви святаго Ивана, одинъ Михаилъ остася, чюдных техъ иконъ! И колоколы принесе ис Кыева, другия ту солье, то все огнь попали.[666]

Вежа же среде города[667] высока, якоже бити с нея окрест града, подсздана каменеемь вь высоту 15 лакотъ. Создана же сама древомъ тесанымъ и убелена, яко сыръ, святящися на всеи стороны. Стюденець, рекомый кладязь, близъ ея бе, сажений имущи 35. Храме прекраснии, и медъ от огня, яко смола ползущь.

Посади же садъ красенъ, и созда церковь святыма Безмездникома во честь, имать 4 столпы от цела камени, истесанаго, держаща верхъ. С техъ же другый и волтарь пресвятаго Дмитрея, стоить же ти предъ бочными дверми красенъ, принесенъ издалеча.

Стоить же столпъ поприща от города каменъ, а на немь орелъ каменъ изваянъ, высота же камени десяти лакотъ с головами же и с подножьками 12 лакотъ.

Увидивъ же сицю пагубу граду, вшедъ во церковь и виде пагубу, и сжалиси велми. Помолився Богу, паки обнови, и церковь освяти пискупомъ Иваномъ. И паки помолився Богу и созда и твьржьша и выша. Веже же такое не возможе создати, бе бо грады иныя жижаи противу безбожнымъ татаромъ, за то не созда ея.

Въ лето 6768. Созда же церковь привелику во граде Холме во имя пресвятыя приснодевыя Мария, величествомъ, красотою не мене сущихъ древних, и украси ю пречюднами иконами. Принесе же чашю от земля угорьскыя мрамора багряна, изваяну мудростью чюдну, и змьевы главы беша округъ ея, и постави ю пре дверми церковьнымы, нарецаемыми царскыми, створи же в ней крестилницю крестити воду на святое Богоявление. Створи же в ней блаженый пискупъ Иванъ, от древа красна точенъ и позлащенъ. Дне и вне дивлению подобенъ.

Времени же минувшу, и приде Буранда безбожный злый со множествомъ полковъ татарьскыхъ в силе тяжьце и ста на местех Куремьсенех. Данило же держаше рать с Куремьсою и николи же не бояся Куремьсе, не бе бо моглъ зла ему створити никогдаже Куремьса, дондеже приде Буранда со силою великою. Посла же послы к Данилови, река: «Иду на Литву. Оже еси миренъ, пойди со мною».[668]