Том 5 (XIII век, литература трагического века)

Данилови же седшу с братомъ и со сыномъ, печалнымъ бывше, гадахуть: ведахуть бо, аще Данилъ поедеть, и не будеть с добромъ. Сгадавъше вси, и еха Василко за брата. И проводи братъ до Берестья, и посла с нимъ люди своя. И помолився Богу, святому Спасу избавнику, яже есть икона яже есть в городе Мелнице[669] во церкви святое Богородице и ныне стоить в велице чести; обеща ему Данило король украшениемь украсити и.

Василкови же едушу по Бурундаи одиному по Литовьской земле, обретъ негде литву, избивъ ю и приведе саигатъ Бурондаеви. И похвали Бурандай Василка, «аще братъ твой не ехалъ». И воеваше ездя с нимь. Ищющю ему сыновца своего Романа,[670] воеваша землю Литовьскую и Нальщаньску.[671] Княгиню бе бо оставилъ у брата и сына своего Володимера.[672]

Потом же Данило король, ехавъ, взя Волковыескъ и Глеба князя пославъ я, и держашеть и во чести, яко болма бо еха ко Волковыску, ловя яти ворога своего Вышелка и Тевтивила. И не удуси его в городе, искаше ею по стаемь, посылая люди, и не обрете ею. Беста бо велику лесть учинила: я Вышелгъ сына его Романа. И пакы посла Михаила, и воева по Зелеви,[673] ища ею, и не обрете ею. Потом же мысля ити на Городенъ, творя ею тамъ.

Посла же по Лва, сына си, и по люди своя. И приехаша в городъ Мелникъ. Хотящу ему ити к Городну, и всимъ тоснующимся, и бысть весть из ляховъ у короля Данила, яко татарове на Ятвязехъ суть.

Лвови же рекшу, яко: «Вои твоя голодна есть и кони ихъ». Он же отвещавъ и рече ему: «Пошлемь стороже ко Визне». Вдасть же Данило король брашна воемь до досытка и конемь ихъ.

Послано бо быста преже два посла во Ятвязе уведатъ о брате. Татаромъ же приехавшимъ во Ятвязе, ята быста посла и прашаше: «Где есть Данило?» Она же отвещаста: «В Милници есть». Онем же рекшимъ, яко: «То есть мирникъ нашь, братъ его, воевалъ с нами. Туда идемь».

Сторожем же изминувшимся с ними, они же проидоша ко Дорогычину. Бысть же весть Данилу, послаша Лва и Шварна вонъ и Володимера, река имъ: «Аще вы будете у мене, вамъ ездети в станы к нимъ, аже ли азъ буду»...[674]

По сем же минувшему лету.

Въ лето 6769. Бысть тишина по все земле. В ты же дни свадба бысть у Василка князя у Володимере городе: нача отдавати дщерь свою Олгу за Андреа князя Всеволодича Чернигову. Бяшеть же тогда братъ Василковъ Данило князь со обеима сынома своима, со Лвомъ и со Шварномъ, и инехъ князей много, и бояръ много. И бывшу же веселью не малу в Володимере городе.

И приде весть тогда Данилови князю и к Василкови, оже Буронда идеть оканный проклятый, и печална бысть брата о томъ велми. Прислалъ бо бяше, тако река: «Оже есте мои мирници, сретьтя мя. А кто не сретить мене, тый ратный мне». Василко же князь поеха противу Бурандаеви со Лвомъ, сыновцемь своимъ, а Данило князь не еха с братомъ, послалъ бо бяше себе место владыку своего Холмовьского Ивана.

И поеха Василко князь со Лвомъ и со владыкою противу Бурандаеви, поимавъ дары многы и питье, и срете и у Шумьски. И приде Василко со Лвомъ и со владыкою передо нь с дары; оному же велику опалу створшу на Василка князя и на Лва; владыка стояше в ужасти величе.

И потомъ рече Буронда Василкови: «Оже есте мои мирници, розмечете же городы свое все». Левъ розмета Даниловъ и Стожекъ, оттоле же пославъ Лвовъ розмета, а Василко пославъ Кремянечь розмета и Луческь.

Василко же князь ишь Шюмьска посла владыку Ивана напередь ко брату своему Данилови. Владычи же приехавшю к Данилови князю, и нача ему поведати о бывшем, и опалу Бурандаеву сказа ему. Данилови же убоявшуся, побеже в Ляхы, а из Ляховъ побеже во Угры.

И тако поиде Бурандай ко Володимерю, а Василко князь с ними. И не дошедшу ему города, и ста на Житани на ночь. Бурандай же нача молвити про Володимерь: «Василко, розмечи городъ». Князь же Василко нача думать в собе про городъ, зане не мощно бысть розметати вборзе его величествомъ. Повеле зажечи и, и тако черес ночь изгоре всь. Завътра же приеха Бурандай в Володимерь, и виде своима очима городъ изгоревши всь, и нача обедати у Василка на дворе и пити. Обедав же и пивъ и леже на ночь у Пятидна. Завътра же присла татарина именемь Баимура. Баимуръ же приехавь ко князю и рче: «Василко, прислал мя Буранда и велел ми городъ роскопати». Рче же ему Василко: «Твори повеленое тобою». И нача роскопывати городъ, назнаменуя образъ победы.

И по семь поиде Бурандай к Холмови, а Василко князь с нимь, и с бояры своими и слугами своими. Пришедшимъ же имъ к Холмови, городъ же затворенъ бысть, и сташа пришедше к нему одаль его. И не успеша вои его ничтоже. Бяхуть бо в немь бояре и людье добрии и утвержение города крепко порокы и самострелы.