Том 7 (Вторая половина XV века, литература эпохи исторических размышлений)

Некогда бо, времени некоему минувшу, княгини благочестиваго князя Михаила, непраздна суща и въ утробе имуща отроча, и прежде уставленаго Богомъ дне, рекше прежде шестихъ недель рождениа, отроча въ чреве матерни умерша познавашеся. И понеже времени наставшу рождениа, и мертвое отроча не можаше от чрева матерня произыти, темже и княгини в болезни велицей бывше, недоумеяшеся, что сътворити, обаче уже и живота отчаявшеся и ничтоже ино, токмо смерть пред очима имущи. Благочестивый же князь Михаилъ, зря супружницю свою тако стражющу, печалию съкрушашеся, но не имеаше что сътворити, токмо Бога моляше. Богъ же иже всемъ человеком хотя спастися и в разумъ истинный приити. Прииде же въ умъ князю Михаилу, и въспомяну принесеную священную воду от манастыря блаженаго Кирила, еяже ради Богъ того помилова, и повеле принести оставшее от воды тоа. И велить болезненое чрево княгини священною водою помазати. И сему тако бывающу, и абие отроча мняшеся живо быти въ чреве матерни. И темже мертво прочее родися, и княгини нечаемо от болезни пременися, и въ еже умрети бяше жити сподобися и бысть здрава, хвалящи и благословящи Бога. Такоже и благочестивый князь Михаилъ възрадовася о здравии супружници своей, видевъ, яко помилова ю Богъ. Иже прежде мало сего мняше ю въ гробъ вселяему, ныне же живу и здраву виде, веселяшеся, тако и съ всеми людми своими хвалу же и величие въздающе Богови и Пречистей Богоматери и блаженому отцю Кирилу.

Темже благочестивый князь Михаилъ велию веру стяжа къ Пречистей Богоматери Кирилова манастыря и многая предасть тоя обители села же и езера. Не токмо тогда, но и всегда многа имениа непрестанно даяше, подобяся въ всемъ отцу своему, благородному князю Андрею Димитриевичю, и тъй бо благочестивый князь Андръй многа дасть и даяше манастырю Пречистыа, Кириловы обители. И аще о сем взыщеши, всюду обрящещи памятемъ достойна ему даяниа, иже суть и доныне всемъ знаемы и въ вечьную и некончаему всемъ бывшим родомъ память его.

ЧЮДО СВЯТАГО КИРИЛА

И ниже да умолчано будеть чюдо, бывшее блаженымъ Кириломъ, иже прежде сего мало бывшее. Купца некоего Иоанна сынъ, Иванъ именемъ, съй бесом позавиденъ бывъ, и ума иступльшу, и некыя страшныя и странныя гласы испущаще. И что много глаголати: и прочее всехъ человекъ мудрований оставленъ бывъ. Отець же его Иванъ, яко виде сына своего Ивана от благыхъ паче на горшая попущением Божиимъ и наветомъ того самого беса предуспевающа, посылает того на Белоезеро в манастырь, идеже блаженый Кирилъ лежаше. И тамо ему бывшу, и такоже начат беситися и некая словеса странна и гнусная глаголати не токмо на человека, но и на самого Бога и святых Его.

И тако сему бывающю, и часто къ чюдотворному гробу овогда приводиму, овогда же самому приходящу, игумен же съ братиею молитвовавше о немъ. И едва по многыхъ днехъ възможе въ чювство приити, исцеление получи и бысть здравъ и смысленъ, якоже и прежде, благодатию того истиннаго Господа нашего Исуса Христа и помощию Владычица нашеа Богороднца и молитвами святаго отца Кирила. Отиде же здравъ в дом свой, благодарность Богови въздая и святому. Темже отецъ его и мати и ини мнози, егоже преже зряху тако стражюша и ума иступившу, последи же здрава и целомудрена видяще того, вси единодушно прославляху величиа Божиа и блаженаго отца Кирила.

Многа же иная изрядная чюдеса блаженаго Кирила быша и бывают даже и до сего дне — не точию егда бяше въ временней сей жизни, но и по преставлении, — ова явлена, ова же неявлена. Богу же обоя ведома, ихже писанию не предашеся множества ради. Сие же нечто мало отчасти житиа блаженаго написашеся, — да уведят вси и уверятся, яко Господь нашь Исус Христос славящих его прославляеть и зде утаити хотяща благая своя деланиа всюду добродетели ради явлены и славны творить. Блаженый же Кирилъ в пустыни токмо живяше, слава же того и добродетель повсюду, яко некиимъ легким крилом, происхождаше, «не бо мощно бяше граду укрытися, верху горы стоащу».[300]

Такова бяху Кирилова исправлением произволениа, такова блаженаго отца мира и яже в мире отвръжение. Сицево житие взыскающихъ лице Бога Иаковля, таковый подвигъ спастися хотящимъ. Что бо честнейше, иже онъ стяжа в жизни сей? Глаголю же всехъ прьвее любы къ Богу, к симь же — чистоту телесную, и с нею же всякъ узрить Господа, худость ризную, безмерную простоту, любовь къ всем нелицемерную, постъ, молитву, въздержание, бдение, веру несуменну, слезы непрестанныи, съкрушение сердца и смирение, егоже ради, речеся: «Сердце съкрушено и смирено Богъ не уничижит».[301]