Том 7 (Вторая половина XV века, литература эпохи исторических размышлений)

Прииде же некоа болярыни, едина от славных, Ксениа именемъ, ради поклонениа гробу блаженаго Кирила. С неюже бяше пришедшихъ человекъ много. Едина же некая жена от служащихъ ей, кормилица сыну еа, едино око слепо имущи и ничтоже темъ окомъ в шести летех видящи, бяше бо белмо, якоже сказуеть, о всемъ оце ея. Яко прииде в манастырь жена, яже око слепо имуще, всех утаився по заутрени, и приходить въ гробницю, идеже есть гробъ святаго Кирила, и начят съ слезами молитися. И абие по некоемъ часе молитве слышить, яко грому велию изшедшу от гроба блаженаго Кирила, яко мнети тъй, сквозе уши ея прошедшу и къ слепому оку ея коснувшуся. Иже от страха того и грома, яко мертва, на землю падши, и надолзе лежаше от прилучившемся. И рукою своею слепаго ока касаашеся, и понеже, здравое око рукою закрывши, искушааше, аще что иже преже слепым окомъ видит. Увидевши же сама, яко помилова ю Богъ молитвами святаго Кирила, радовашеся. Темже не утаено бысть, но паче явлено святаго преславное чюдо, темже вси хвалу Богови въздаша и Пречистей Его Матери. Болярыни же Ксениа, кормивъ братию и многу милостыню давши, и възвратися в дом свой, славяще и хваляще Бога и блаженаго Кирила.

ИНО ЧЮДО СВЯТАГО

Принесоша же в манастырь святаго человека некоего, Констянтина именемъ, зело болезнию одръжима. И тако ему от болезни изнемогающи и к концю живота приближающася ему, своя съгрешениа исповедуеть игумену, и тако игуменъ святых таинъ причащаеть и. Пришедши же нощи, видит некый от старець тоя обители человека светоносна, идуща к келии, идеже Констянтинъ тъй лежаше. Мало иже посреди видить некиа человекы, зело странно видение имущихъ и грядущихъ въслед предпрошедшаго мужа. Яко приидоша тамо, идеже Констянтинъ лежаше, болезнию одръжимъ, и начаша съваритися съ преже пришедшимъ мужемъ, что яко: «Прииде, ничтоже не имея зде в немъ. Нашь бо есть и намъ повинулся есть». Другый же глагола, яко: «Нашь есть и к намъ прибеже». Сим же тако спирающимся, видит тъй братъ игумена тоя обители съ братиею пришедшихъ и сварящимся о Констянтине. И симъ тако бывающимъ, видить блаженаго Кирила пришедша и глаголюща къ братии, что яко: «Молвите, аще зде умреть и погребенъ будетъ, то и Пречистые есть и нашь. Аще ли проче отидет, то не нашь есть».

Пришедшу же дню, видевый видение брат сказаше игумену и братии видение, еже виде. Ведяху бо вси, яко тъй Констянтинъ лукавое житие прохождаше. Того дни и преставися тъй Константинъ и погребенъ бысть в монастыри том. Темже вси слышавше и прославиша Бога и Пречистую Его Матерь и преподобнаго Кирила.

ИНО ЧЮДО

Петра же некоего болярина сынъ, Василие именемъ, бесомъ обладанъ бывъ, и сего ради ума своего иступилъ бяше. И бесы многыми явленми странными и страшными являхуся ему и смертию претяще. Пришедшу же ему в манастырь блаженаго Кирила и у гроба святаго Кирила бывшу, нощи же пришедши, прииде и тъй въ трапезу, нечто от золъ отраду надеяся тамо приати. Такоже и тамо многа зла пострадавъ от бесов: многыми различными страшными видении являхуся ему. Иже тому посреди таковых зле стражющю, яко в тонокъ сонъ сведенъ бысть, и видит блаженаго Кирила въ светлых ризах, яко жива, пришедша. И токмо от видениа святаго и абие беси без вести быша. Въставшу же Василию от видениа, и позна себе здрава, яко ничтоже пострадавъ бяше, радуяся. И оттоле здравъ и смысленъ бысть, якоже и прежде. И отиде прочее в домъ свой, и благодарность Богу исповедуя и того угоднику, блаженному Кирилу.

ИНО ЧЮДО СВЯТАГО КИРИЛА

Некый же князь, Давыдъ именемъ, Семеновичь, в болезнь велию впаде и не могаше нимало двигнутися, вси бо уди тела его разслабишася. И тако ему стражющу, и прочее живота отчаятися мняши, и велить себе нести в манастырь Пречистые, яко да тамо помолитися. И тако ему принесену бывшу близ манастыря, — и тако 4 мужи ношаху его на постели, и пред враты манастыря бывшимъ, повеле себе поставити ту. И начат съ слезами молитися, и по молитве ощути мало болезни своеа пременение. Въстав же на своихъ ногахъ, двема человекома подкрепляемъ, и, в церкви бывъ, моляшеся. Такоже и богоноснаго отца Кирила гробу пришед, и много съ слезами помолився, яко да облегчить ему святый болезненое его. И бысть день ту в манастыри, моляся. И пришедши нощи, и яко въ иступлени бывшу, видит блаженаго Кирила в церкви, съ инеми священникы в ризах стояща и крестъ в руце дръжаща. «Яко видевшу ми, — рече, — святаго, и начах съ слезами молитися ему: “Избави мя от належащая ми болезни!”» Святый же знаменавъ его честным крестомъ, егоже имяше в руце своей, и рече: «Не скорби прочее, аз бо помолю Бога и Пречистую Его Матерь, яко да исцелееши. Но не забуди обита своего, еже обещался еси». Възбнувъ же от видениа князъ Давыдъ и разуме болезнь облегчившуся ему, и, отраду приемъ, радовашеся. Наутриа же въста на ногах своихъ и иде въ церковь здравъ молитвами и явлениемъ блаженаго Кирила.