Том 7 (Вторая половина XV века, литература эпохи исторических размышлений)

Сиа братиа слышаще, от рыданиа не можаху престати. Святый же утешаше ихъ, глаголаше: «Не скръбите въ день покоа моего. Уже бо мне час есть почити о Господе. Предаю же вас Богови и Того Пречистей Матери. Тъй да съхранить вас от всех искушений лукаваго. И сынъ мой Инокентий съй да будет с вами игуменъ в мое место, и сего имеите, яко и мене, и съй ваши недостатъкы исполнит». Сиа и на многа, утешая их, глаголаше, и бяше тако радуяся и веселяся, якоже некто от далних и туждиихъ странъ въ свое отечьство приходяще. И никоея же печяли имяше, но паче надеждею будущих веселяшеся. О единомъ бо точию попечие имяше и моляшеся: да ннчтоже от общаго житиа не разорити и да не будуть в нихъ раздоры или свары. О семъ бо паче и здравъ печяшеся.

И таже часу отхождениа его къ Господу приближающися, вся братиа к нему прихождаху и целоваху его съ слезами, последняго благословениа просяща. Тъй же, яко чадолюбивый отець, всех облобызаше, всехъ миловаше и всемъ последнее благословение оставляше, и от всехъ же прощениа и самъ прошаше. И в самый убо тъй час, вънже хотяше телеснаго съуза разручитися, святый пречистых и животворящих таинъ Христа Бога нашего причастився и пречистую свою трудолюбную душу мирно и тихо к Господу отдасть, еще молитве въ устехъ его сущи. Отсуду же бяше благоюхание некое всемъ слышатися.

Братиа же тогда что не хотяху от скорби сътворити, лишение отца умилно зряще. Врачя отщетившеся, не тръпяху; учителя отъяти, рыдаху; кормнику не сущу, недоумевахуся; вся болезненая тогда предлежаху. Таже и лице его просветися и бяше светло множае паче, егда в жизни бяше; и не бяше на лици его никоеяже черности, ни смяглости, якоже обычай есть умершимъ бывати.

Темже на одре положивше честно и на своих главахъ къ церкви того священныя мощи принесоша съ всякою подобающею честию и псалмопениемъ, яко отца провождаху.

Предреченный же слуга его Авксентие на селе тогда трясавицею боляще и зело стражющу и от тоа болезни яко въ иступлении ума бывшу, видит блаженаго Кирила пришедша и крестъ в руце своей дръжаща и иного священника, Флора, велико житие по Бозе имея, И тако Кирилъ знаменавъ честным крестомъ Авксентиа, и абие в той час исцеление получи и бысть здравъ. Въспрянув же человекъ тъй, обрете себе здрава и абие скоро с радостию тече къ блаженому Кирилу, хотя ему исповедати, яко да того явлениемъ исцеление приимша. Не ведяше же, яко святый преставился есть. Пришедшу же ему в монастырь, и обрете святаго уже къ Господу отшедша и от ученикъ надгробными песньми провождаема, притекъ же къ святымъ того мощемъ, съ слезами облобызаше, вкупе же и чюдо святаго всем исповедаше, како явися ему святый и исцеление дарова ему. Темже братия яко мало нечто от печяли пременившеся.

Надгробное пение съ многою честию скончавше и съ многою светлостию землею покрыша многострадалное и трудолюбное тело и съсуд Пресвятаго Духа в лето 6935-го, месяца иуниа в 9.

Добре упас врученную ему паству и на пажити животныа наставивъ. Таковы подвигы блаженаго Кирила, такова исправлениа, такова чюдеса, дарованиа, такова того исцелениа.

Бяше блаженый Кирилъ, егда прииде на место то, летомъ шестимдесятим, пребысть же на месте том лет 30, яко всех летъ житиа его девятдесятъ.

Множайша же и ина чюдеса, при животе бывшая блаженаго Кирила, и множества ради, и паче же и пред многыми леты бывшее, писанию не предашеся. Сиа же нечто мало, отчасти быша написано токмо, да не вконець умолчана будуть святаго повести.

Сему же тогда тако бывающю, и стаду осиревшю от богоноснаго отца, Инокентие бывает игуменъ тоа обители, якоже блаженый Кирилъ повеле еще си живъ. Темже тщашеся вся, елико виде от отца, собою делы исправити. Подобно же есть рещи о игумене Инокентии: не тако просто, ни яко прилучися блаженый Кирилъ тому манастырьское строение вручаеть, но ведый его издетска житие велико имуща. О чистоте же телесней несть что глаголати! И бывша в послушании у Игнатия, мужа велика пред Богомъ, 11 лет, и никояже своеа воля имый.

И симъ тако бывающим, по преставлении же блаженаго Кирила единому лету токмо прешедшу и осени наставшей, братия тоя обители, яко едино съгласившеся съ блаженым Кириломъ, от сего житиа к Господу изыдошя числомъ множае 30 братий, по проречению блаженаго Кирила, иже рече къ ученику своему Христофору: «Веруй ми, чадо, яко ни единъ вас прьвее мене от житиа сего не изыдеть. По моемъ же преставлении мнози от вас приидуть въслед мене», — еже и бысть. Последи же всех тех братий и игуменъ Инокентий к Господу отходит.

По преставлении же игумена Инокентиа бысть в него место вышепомянутый Христофоръ игуменъ тоя обители. Съй убо Христофоръ много книгъ написа святому манастырю своею рукою. И никакоже възнесеся мыслию, заеже таковой обители игуменъ бывъ, но тако бяше въ всяком благочинии и смирении, съблюдая своего житиа любомудрие, яко да ничтоже останет делы неисправлено, елико виде блаженаго Кирила творяща. Толику же нищету ризную възлюби, елико промежю старець не знати его, яко игуменъ есть.