Том 7 (Вторая половина XV века, литература эпохи исторических размышлений)

В лето 6936. Витофтъ ходилъ къ Новугороду и стоялъ у Порхова; они же добиша ему челомъ 5000 рублевъ, владыка зъ бояры новогородьскыми 5000 рублевъ другую даша ему, а за полонъ дастъ владыка свою тысячю рублевъ.

Тое же зимы месяца ноября 17 преставися преподобный игумен Никонъ, чюдный старець[521] в 5 час дни.

В лето 6937. Приходиша татарове к Галичю и града не взяша, а волости повоеваша, а на Крещение приидоша изгономъ на Кострому, и попленише ю, и отъидоша на Низ Волгою. Князь же великы Василей, то слышавъ, посла за ними дядь своихъ, князя Андрея и Костянтина, и с ними Ивана Дмитреевича;[522] они же до Нижнего Новагорода ходивъ, и не угониша ихъ, и възвратишася.

В лето 6938. Въ Смоленьсце явися волкъ голъ, безъ шерьсти, и много людей елъ, а в Троцехъ[523] озеро стояло семь дней кроваво. Того же лета Витофтъ умре,[524] бывъ на великомъ княжении 38 лет. И седе по немъ Швитригайло.[525] А князь Юрьи разверже миръ съ великымъ княземъ и, оставя Галичь, седе, шедъ, в Нижнемъ Новегороде; и князь великы посла на него рать с дядею своимъ, княземъ Костянтиномъ. Онъ же то слыша, и отъиде за Суру, и ста на брезе, и князь Костяньтинъ, стоявъ противу, възвратися, зане не бяше, какъ преити на нь. И князь Юрьи по отшествии ихъ пакы прииде в Новъгородъ. Того же лета Айдаръ[526] повоевалъ землю Литовьскую, и градъ взя Мченескъ, и Григорья Протасьева поималъ,[527] а Киева не доиде за 80 верстъ, воюя.

В лето 6939. Князь великы Василей посылалъ князя Феодора Давидовича Пестрого на Болгары, и, шедъ, взя ихъ. Въ то же лето знамение бысть на небеси: столпы огнены. Тогда же засуха велика была, земля и болота горелы, мъгла же стояла 6 недель, яко и солнца не видети, и рыбы въ воде мерли. Того же лета Фотей митрополитъ преставися.[528] Князь великы в Орду поиде, и князь Юрьи после поиде, и дастъ царь Махметъ[529] великое княжение Василью Васильевичу.

В лето 6940. Преставися князь Андрей Дмитреевичь.[530] И князь велики вышолъ и седе на великомъ княжении.[531] И князь Юрьи иде въ свой Звенигородъ, а придалъ ему царь Дмитровъ.[532]

В лето 6941. Женися князь великы Василей Васильевичь, февраля 8, и на той свадбе Захарья Ивановичь Кошкынъ имался за поясъ у князя Васильа у Юрьевича у Косого,[533] и князи и бояре разьехашася по домом. И князь Василей да князь Дмитрей Шемяка совокупяся, и поидоша къ отцю своему въ Галич. Тое же весны князь Юрьи Дмитреевичь съ детми, Иванъ Дмитреевичь с ним,[534] совокупя силу многу, и приидоша к Москве безвестно на великого князя, канунъ Мироносицам, в суботу, апреля 5, на Клязму, за 20 верстъ. Князь же великы выиде противу ихъ не во мнозе и, побився мало, и побеже къ Москве <...>. И взявъ матерь и княгиню свою, и поиде къ Тфери, а со Тфери иде на Кострому. Князь же Юрьи седъ на Москве, и посла детей своихъ, Василья да Дмитрея, за великымъ князем, и сказаша его на Костроме; онъ же и самъ поиде за нимъ и прииде х Костроме; и доби челомъ князь великы дяде своему, князю Юрью, и дасть ему Коломну городъ въ уделъ, а миръ свелъ Семенъ Ивановичь Морозовъ, любовникъ княжь Юрьевъ.[535] Москвичи же вси, князи и бояре, и воеводы, и дети боярьскые, и дворяне, от мала и до велика, — вси поехали на Коломну к великому князю, не повыкли бо служити уделнымъ княземъ,[536] и Иванъ Дмитриеевичь с детьми. Видевше же се князь Василей да Шемяка, и убиша Семена Морозова, боярина отца своего, в набережныхъ сенехъ, рекуще: «Ты учинилъ ту беду отцю нашему и намъ. Издавна еси коромолникъ, а нашь лиходей, не дашь намъ у отца нашего жити». И въструбивше, поехаша с Москвы и поидоша на Кострому. Князь же Юрьи видевъ, яко непрочно ему седение на великомъ княжении, и посла къ великому князю, да идетъ на свой стол, а самъ иде въ свой градъ в Рузу,[537] а князь великы прииде с Коломъны на Москву и помирися со княземъ Юрьемъ, и докончалные поимали на том и крестъ целовали, что великому князю въ его отчину не въступатися, а князю Юрью княжения не хотети, ни детей своихъ приимати, ни помочи имъ не дати на великого князя. И, умирився, князь Юрьи поиде въ Галич, а князь великы князя Юрья Патрекеевича посла[538] воеводою на Юрьевичи со всемъ своимъ дворомъ. Они же отступиша съ Костромы и сташа на Куси, а в то время приспеша къ нимъ вятчане, и от отца прииде имъ помочь, и бысть имъ бой, и одолеша Юрьевичи, и воеводу, князя Юрья Патрекеевича, яли, и приидоша опять на Кострому и, какъ Волга стала, и ни пошли к Турдеевымъ врагомъ <...>.